Okwolekebwa 11 - Baibuli Ekibono kya Katonda 2014

Abadhulirwa ababiri

¹ Agho naagheebwa olupimo nga luli ng'oti mwigo, ghaabaagho ankoba ati: “Situka opime eisinzizo lya Katonda ni alutaari, obale n'abalisinzizaamu.

² Aye oluya lw'eisinzizo luleke, otalupima, kuba lwagheebwa abamaghanga agandi abaidha okumala emyezi amakumi ana n'ebiri (42) nga baniinirira ekibuga ekitukuvu.

³ Ndituma abadhulirwa bange babiri nga beesibye ebikaakaati olw'okunakughala, naabagha obukumu bamale enaku lukumi na bibiri na nkaaga (1,260) nga bakobera abantu ebibono bya Katonda.”

⁴ Abadhulirwa abo, n'emiti emyoliva ebiri, n'ebikondo by'entaala ebibiri ebiri mu maiso ga Musengwa ow'ensi.

⁵ Bwe ghabaagho ayenda okubakolaku akabi, omuliro gubava mu kanwa gwasiriiza abazigu baibwe. Kiisi ayenda kubakola kabi, atyo bw'alifa.

⁶ Abo bali n'obukumu okukingula amaadhi gaaloba kugwa mu kiseera kye bamala nga bakobera abantu ebibono bya Katonda. Era bali n'obukumu obw'okufuula amaadhi omusaayi, n'okuleeta ku nsi ebibamba ebya buli nsambo, buli ghe baba nga bendeire.

⁷ Bwe balimala okugha obudhulirwa bwaibwe, ekisolo ekiva mu lwina olutakoma kiribatanulaku olutalo, kyabaghangula, era kyabaita.

⁸ Emirambo gyaibwe girisigala mu ngira dh'ekibuga ekinene, Musengwa waibwe mwe yakomererwa ku musalaba. Eriina ery'ekibuga ekyo ery'okugereesa ni Sodoma oba Misiri.

⁹ Abantu aba kiisi kika, kiisi ighanga, kiisi lulimi na kiisi luse, baliringirira emirambo gyaibwe okumala enaku isatu n'ekimega, baaloba kugiganha kuziikibwa mu magombe.

¹⁰ Abantu ab'oku nsi balisagamba baasangaala era baagheerezagania ebirabo olw'okufa kw'abalanzi abo bombi; kuba abo baaleetera abantu ab'oku nsi okudaagadaaga einho.

¹¹ Aye enaku eisatu n'ekitundu bwe dhaabitagho, Katonda yaabafuuwamu omuuka ogw'obulamu, baayemerera. Abaababona baatya inho.

¹² Abalanzi abo ababiri baawulira amamiro agava mu igulu nga gabakoba gati: “Mwidhe eno ghaigulu.” Baajiira mu kireri, baaniina mu igulu ng'abazigu baibwe babona.

¹³ Mu kaseera ako keene, ghaabaagho musisi ow'amaani. Ekitundu kirala ku bitundu eikumi eby'ekibuga kyazikirira, n'abantu kasanvu (7,000) baafiira mu musisi oyo. Abantu abaawonagho baatya inho, era baasaaka ekitiisa kya Katonda ow'eigulu.

¹⁴ Eky'entiisa ekyokubiri kibise, aye ekyokusatu kiri kwidha mangu.

Eigwala eryomusanvu

¹⁵ Agho malaika owomusanvu yaafuuwa eigwala lye. Ghaabaagho amamiro mu igulu nga gakoba gati: “Obwakyabazinga obw'ensi bufuuse bwa Musengwa waife era bwa Kurisito: aidha kufuganga ebyanda n'ebyanda.”

¹⁶ Agho abakulembeze amakumi abiri n'abana (24) abatyama mu maiso ga Katonda ku makonero gaibwe ag'obwakyabazinga, beeyala ghansi baasinza Katonda.

¹⁷ Baakoba bati: “Tukweyanza Musengwa Katonda, Aghanga Ebintu Byonabyona, aligho era eyaligho. Kuba okozeisa obukumu bwo waatoolera okufuga.

¹⁸ Abantu abataikiriza baidhula inho, aye obusungu obubwo bwaidha, ekiseera kyatuuka eky'okusalira abafu omusango, n'eky'okugheeramu empeera abagheereza bo abalanzi, n'abatuukirivu, n'abantu bo boonaboona abakutya, abakulu n'abato; era ekiseera eky'okuzikiririzaamu abo abazikiriza ensi.”

¹⁹ Eisinzizo lya Katonda ery'omu igulu lyaigulwagho n'Esanduuku ey'Endagaano ye, yaaboneka mu isinzizo omwo. Agho ghaabaagho okumyansa okw'eigulu, n'okududumuka, n'okutyabuka okw'olukuba, n'ensi okutengeeta, n'omugozi omungi.