Okwolekebwa 10 - Baibuli Ekibono kya Katonda 2014

Malaika n'akazingo akatono ak'ekitabo

¹ Agho naabona malaika owundi ow'amaani ng'ava mu igulu. Yali avaire ekireri, era ku mutwe gwe nga kuliku musoke, mu maiso ge ng'ali kwaka ng'oti ndhuba, ate amagulu ge nga gali ng'oti mpango dha muliro.

² Yali n'akazingo ak'ekitabo akatono mu ngalo, nga kazingulule. Ekigere kye ekisaadha yaakita ku nhandha, ate ekigooda yaakita ku bukalu.

³ Yaayeta n'amaani mu mamiro agali ng'oti ga mpologoma eri kuwologoma. Bwe yamala okweta atyo, enkuba omusanvu dhaatyabuka.

⁴ Enkuba bwe dhaatyabuka nali nja kughandiika, aye naawulira amamiro agava mu igulu nga gakoba gati: “Ebyo enkuba omusanvu edhityabwike bye dhikobye bigise nga bya kyama era tobighandiika.”

⁵ Agho malaika ye nabona ng'ayemereire ku nhandha ni ku bukalu, yaagololera omukono gwe omusaadha y'eigulu,

⁶ yaalayira mu liina lya Katonda omulamu ebyanda n'ebyanda, eyatonda eigulu ni byonabyona ebirimu, n'ensi ni byonabyona ebirimu, n'enhandha ni byonabyona ebirimu. Malaika oyo yaakoba ati: “Tighakaali kulwa.

⁷ Aye mu nnaku edho malaika owomusanvu mw'alifuuyira eigwala lye, olwo Katonda alituukiriza ekyama kye nga bwe yakobera abagheereza be abalanzi.”

⁸ Agho nairamu okuwulira amamiro ge nali mpuliireku nga gava mu igulu. Gankoba gati: “Ja otoole akazingo akatono ak'ekitabo akazingulwirwa, akali mu ngalo dha malaika ayemereire ku nhandha ni ku bukalu.”

⁹ Naaja ye malaika naamusaba okumpa akazingo akatono ak'ekitabo. Yankoba ati: “Kaako, toola olye. Kaidha kukukaayirira mu nda, aye mu kanwa kaidha kudhuudhuula ng'oti mudheenene gwa ndhuki.”

¹⁰ Agho naatoola akazingo akatono mu ngalo dha malaika naakalya, mu kanwa kaadhuudhuula ng'oti mudheenene gwa ndhuki. Aye bwe namala okukalya kankaayirira mu nda.

¹¹ Agho Katonda yankoba ati: “Oli n'okwiramu okulanga ebyo ebirituuka ku bantu abangi, ni ku maghanga, ni ku nnimi, ni ku bakyabazinga.”