Okuvaayo 9 - Baibuli Ekibono kya Katonda 2014

Okufa okw'ensolo

¹ Agho Musengwa Katonda yaakoba Musa ati: “Ja oingire mu kisaagaati kya kyabazinga omukobe oti, ‘Musengwa Katonda, Katonda ow'Abaheburayi akoba ati, leka abantu bange baje bansinze.

² Kuba bw'oloba okubaleka baje, n'obaloberaku,

³ manha oti omukono gwange guja kwika n'endwaire embi einho, gukube ensolo dho dhoonadhoona dhe baaya: embalaasi, endogoyi, engamiya, ente, embuzi n'entaama.

⁴ Ate nja kubisa bundi ensolo edh'Abaisiraeli okuva ku dh'Abamisiri ensolo edh'Abaisiraeli tidhija kufaaku naire endala eti.

⁵ Nze Musengwa Katonda ntairegho olwaidho nga lwenja okukola ekyo.’ ”

⁶ Olunaku olwairirira Musengwa Katonda yaakola nga bweyakoba. Ensolo dhoonadhoona edh'Abamisiri dhaafa, aye ku dh'Abaisiraeli kwaloba kufaaku naire ndala eti.

⁷ Kyabazinga yaatuma okubuuliriza, era baamukobera nga ku nsolo edh'Abaisiraeli bwe kutaafaaku naire ndala. Aye era omwoyo gwa kyabazinga gwasigala nga mukalangufu yaaloba kutya, era yaaloba kuleka Baisiraeli kuja.

Amabuubuuto

⁸ Olwo Musengwa Katonda yaakoba Musa ni Aaroni ati: “Muyoole ku ivu n'engalo dhaimwe okuva mu kifo aghookerwa ebiwumbe, memale Musa alisuule ghaigulu nga kyabazinga alingiriire.

⁹ Liidha kufuumuukira ku nsi Misiri yoonayoona ng'oti nkungu, era buli ghantu lireete ku bantu ni ku nsolo amabuubuuto agaabika ni gavaamu amabwa.”

¹⁰ Kale baayoola ku ivu okuva mu kifo aghookerwa ebiwumbe, baaja baayemerera mu maiso ga kyabazinga, Musa yaasuula eivu ghaigulu mu mpewo. Lyaja lyaleeta ku bantu ni ku nsolo amabuubuuto agaabika ni gavaamu amabwa.

¹¹ Abalogo ku luno tibaasobola kwegeza mu Musa, kuba boona baali baidhwire amabuubuuto ng'oti n'Abamisiri abandi boonaboona.

¹² Aye era Musengwa Katonda yaaleetera kyabazinga okukalanguka omwoyo, yaaloba kutya era yaaloba kuwulira nga Musengwa Katonda bweyali amaze okukobera Musa.

Omugozi

¹³ Agho Musengwa Katonda yaakoba Musa ati: “Enkyo wuuna inho oje ye kyabazinga oyemerere mu maiso ge omukobe oti, Musengwa Katonda, Katonda ow'Abaheburayi akoba ati, ‘Leka abantu bange baje bansinze.

¹⁴ Ku mukuzi guno nja kukubonereza nga nkusindikira ebibamba iwe mwene, n'abakungu bo, n'abantu bo abandi, olwo omanhe ng'ezirayo wundi ali ng'oti ninze Musengwa Katonda, mu nsi yoonayoona.

¹⁵ Kuba mu kiseera kino nandibaire nga naginga omukono gwange naakukuba iwe n'abantu bo, nga mbasindikira obulwaire obubi, era ngoli iwe buti oli mufu.

¹⁶ Aye ekyakulesaagho ng'oli mulamu lwa kwenda nkwoleke amaani gange, eriina lyange lisaakibwe mu nsi yoonayoona.

¹⁷ Weetwala ng'owa ghaigulu einho, waaloba kuleka bantu be ni baja.

¹⁸ Aye bona eno, enkyo mu kiseera ng'oti ni kino, nja kubasindikira omugozi gugwe ogutagwangaku kasookanga Misiri ebaagho.

¹⁹ Kale ni tuma baize eka ebyayo byo byonabyona ebiri mu nsiko era babingize. Kuba omugozi guja kukuba era gwite kiisi ekiriba mu nsiko kyonakyona k'abe omuntu oba ensolo.’ ”

²⁰ Agho abandi ku bakungu ba kyabazinga baatya olw'ebyo Musengwa Katonda bye yakoba, baalagira abairu baibwe okungira n'okungiza ebyayo byaibwe.

²¹ Aye yaabaayo abataafaayo abaaleka abairu baibwe n'ebyayo byaibwe ku luya.

²² Agho Musengwa Katonda yaakoba Musa ati: “Ghanika omukono ng'ogwolekeza ku igulu, omugozi gugwe ku nsi Misiri yoonayoona, gugwe ku bantu, ni ku nsolo, ni ku kiisi kimera mu nsiko kyonakyona aghazira kubitiza, mu Misiri mwonamwona.”

²³ Kale Musa yaaghanika omwigo gwe ng'agusonse ku igulu. Musengwa Katonda yaasindika ku nsi okumyansa, n'olukuba, n'omugozi, byagwira ensi Misiri.

²⁴ Omugozi gwagwa, okumyansa kwayaka ng'oti muliro ghagati mu mugozi obutazikira, era omugozi gwaba mungi inho ogutagwangaku mu Misiri kasookanga ebaagho.

²⁵ Omugozi gwakuba kiisi ekyali mu nsiko mu Misiri mwonamwona: gwaita abantu n'ensolo, gwamenhamenha emiti gyonagyona era gwazikiriza ebimera ebindi byonabyona.

²⁶ Mu kiketezo eky'e Gosheni Abaisiraeli mwe baabanga, ni mwonka omutaagwa mugozi.

²⁷ Agho kyabazinga yaayetesa Musa ni Aaroni yaabakoba ati: “Ku mukuzi guno, ndhikiriiza gunsinze, Musengwa Katonda mutuufu aye nze n'abantu bange niife abakyamu.

²⁸ Muneegayiriregho eri Musengwa Katonda, kuba titukaaghanga kugumira kubwatuka kwa lukuba na mugozi bino. Ndidha kubaleka muje era tikikaabeetaagisa kusigala nga mukaali muno.”

²⁹ Musa yaamwiramu ati: “Olunaafuluma ekibuga kino nti, ndidha kughanika emikono nsabe Musengwa Katonda, okubwatuka okw'olukuba kusirike era n'omugozi gwonagwona guweegho, olwo omanhe ng'ensi ya Musengwa Katonda yenka.

³⁰ Aye ndidhi nga iwe n'abakungu bo mukaali kutoolera kutya Musengwa Katonda.”

³¹ Mperaano, emisiri egy'obuti obwavangamu wuuzi dhe baalukangamu engoye empegheevu era n'emisiri egya sayiri, omugozi gwagizikiriza; kuba sayiri yali amaze okwenga era ng'obuti bule bwakamulisa.

³² Aye engaano, tiyayonoonekaku naire, kuba erwagho okutuuka.

³³ Kale Musa yaafuluma ekibuga ekyo, yaaghanika emikono yaasaba Musengwa Katonda okubwatuka okw'olukuba n'omugozi era n'amaadhi byalekera.

³⁴ Aye era kyabazinga olwabona ng'amaadhi, n'omugozi, n'okubwatuka birekeire, mwene n'abakungu be kabiri baayonoona, baakalangusa emyoyo baaloba kutya.

³⁵ Kale omwoyo gwa kyabazinga gwasigala nga mukalangufu yaaloba kutya. Era yaaloba kuleka Baisiraeli ni baja, era nga Musengwa Katonda bweyali amaze okukoba ng'abita mu Musa.