Okuvaayo 8 - Baibuli Ekibono kya Katonda 2014

Ebikere

¹ Agho Musengwa Katonda yaakoba Musa ati: “Ja oingire mu kisaagaati kya kyabazinga omukobe oti Musengwa Katonda akoba ati, ‘Leka abantu bange baje bansinze.

² Bw'oloba okubaleka okuja, ndidha kubonereza ensi yo nga ngisindikira ebikere.

³ Omwiga Kiyira gwidha kwidhula ebikere kamaala bituuke n'okwingira mu ndhu yo, ni mu kisenge y'osula, bituumire ni ku buliri bwo kwene. Era bija kwingira ni mu ndhu dh'abakungu bo, ni mu dh'abantu bo boonaboona, era ni mu ziiko dho dhe bafumbiramu emigaati, ni mu ntamu dhe bakandiramu engaano.

⁴ Ebikere bija kukutuumiraku iwe, bituumire ku bantu bo era ni ku bakungu bo boonaboona.’ ”

⁵ Musengwa Katonda yaakoba Musa ati: “Koba Aaroni oti, ‘Golola omukono gwo ogugemye omwigo gwo, ogwolekeze emiiga, emyala n'ebidiba, obireetere okuvaamu ebikere biidhule ku nsi yoonayoona Misiri.’ ”

⁶ Kale Aaroni yaagolola omukono ng'agusonse ku bifo ebyo ebyalimu amaadhi, era ebikere byavaamu byaidhula ku nsi yoonayoona Misiri.

⁷ Aye abalogo baakozesa eirogo lyaibwe, boona baaleetera ebikere okwidhula ku nsi Misiri.

⁸ Kyabazinga yaayetesa Musa ni Aaroni yaabakoba ati: “Muneegayiriregho eri Musengwa Katonda antooleku ebikere bino era abitoole ni ku bantu bange, ndidha kuleka Abaisiraeli baje bagheeyo omusengo ye Musengwa Katonda.”

⁹ Musa yairamu kyabazinga ati: “Gh'onaayendera gh'onankobera, naakusabira iwe n'abakungu bo, era n'abantu bo, ebikere bizikirizibwe bibaveeku era bive ni mu ndhu dhaimwe, bisigale mu mwiga Kiyira mwonka.”

¹⁰ Kyabazinga yaamukoba ati: “Nsabira olwaidho.” Musa yaamukoba ati: “Ndidha kukola nga bw'osabye, era olwo onaamanha nga ezirayo katonda ali nga Musengwa Katonda waife.

¹¹ Ebikere biidha kukuvaaku iwe, era bive ni mu ndhu dho, ni ku bakungu bo, ni ku bantu bo; biidha kusigala mu Kiyira mwonka.”

¹² Musa ni Aaroni baava aghali kyabazinga baafuluma. Musa yaaja yaasaba Musengwa Katonda atoolegho ebikere nga bweyali amaze okusuubiza kyabazinga.

¹³ Musengwa Katonda yaakola nga Musa bweyamusaba, ebikere byafa ebyali mu ndhu n'ebyali mu mpya, n'ebyali mu nsiko.

¹⁴ Baabibunga byavaamu emungo kamaala, ekiwunha kyaidhula Misiri.

¹⁵ Aye kyabazinga bweyabona ng'ekizibu ekyo kiviiregho yaakalangusa omwoyo gwe, yaaloba kutya era yaaloba kuwulira nga Musengwa Katonda bweyakoba.

Obudhuuni

¹⁶ Agho Musengwa Katonda yaakoba Musa ati: “Koba Aaroni oti, ‘Ginga omwigo gwo okube enkungu eri ghansi ku itaka woonawoona mu Misiri efuuke obudhuuni.’ ”

¹⁷ Baakola batyo Aaroni yaakuba n'omwigo gwe enkungu eyali ghansi ku itaka, obudhuuni bweyugha ku bantu ni ku nsolo. Enkungu yoonayoona eyali ghansi ku itaka woonawoona mu Misiri yaafuuka budhuuni.

¹⁸ Abalogo baagezaaku okukozesa eirogo lyaibwe okufuula enkungu obudhuuni, aye baalemwa. Obudhuuni bwebbuutanga ku bantu ni ku nsolo.

¹⁹ Abalogo baakoba kyabazinga bati: “Ago maani ga Katonda.” Aye omwoyo gwa kyabazinga gwasigala nga mukalangufu ogutatya, era tiyawulira nga Musengwa Katonda bweyakoba.

Ensowera

²⁰ Agho Musengwa Katonda yaakoba Musa ati: “Wuuna inho oje oteege kyabazinga ng'ali kuja ku mwiga omukobe oti, ‘Musengwa Katonda akoba ati, leka abantu bange baje bansinze.

²¹ Bw'oloba okubaleka baje, manha oti ndidha kukusindikira ebikuukuulu eby'ensowera bikwidheku iwe, biidhe ku bakungu bo, ni ku bantu bo. Ensowera dhiidha kweyugha dhiidhule mu ndhu dho, ni mu ndhu edh'Abamisiri abandi buli ghantu ghaidha kwidhula nsowera, waire ghansi ku itaka.

²² Aye ku lunaku olwo, ekiketezo eky'e Gosheni eyo abantu bange ye baba, nja kukibisa mu nsambo ya ndhawulo. Eyo teja kubaayo bikuukuulu bya nsowera, era olwo mulimanha nga ninze Musengwa Katonda ali kukola ebintu ebyo mu Misiri.

²³ Era ntyo bwe nja okwoleka nga bwe ghaligho endhawulo ghagati agh'abantu bo n'abantu bange. Ekyo ekyewuunhio kija kubaagho olwaidho.’ ”

²⁴ Era atyo Musengwa Katonda bweyakola yaabasindikira ebikuukuulu eby'ensowera byaidhula mu ndhu ya kyabazinga, ni mu ndhu edh'abakungu be. Ensowera dhaidhula ensi yoonayoona Misiri era ensi eyo yaafafaagana olw'ensowera edho.

²⁵ Agho kyabazinga yaayetesa Musa ni Aaroni, yaabakoba ati: “Muje mugheeyo emisengo eri Katonda waimwe nga muli mu Misiri muno.”

²⁶ Aye Musa yaamwiramu ati: “Bwetunaakola tutyo tikiibe kituufu, kuba tunaaba nga tuli kughaayo ebintu ebyenhinhasa Abamisiri ng'emisengo ye Musengwa Katonda waife. Era bwe balitubona baja kutwitisa mabaale.

²⁷ Tuteekwa kuja mu irungu nga tutambula olugendo olumala enaku eisatu memale tugheereyo eyo emisengo ye Musengwa Katonda waife, nga mwene bw'alitulagira.”

²⁸ Agho kyabazinga yaabakoba ati: “Kale ndidha kubaleka muje mu irungu mugheereyo eyo emisengo ye Musengwa Katonda waimwe, kasita muba nga timuuje ghala inho. Muneegayiriregho eri Musengwa Katonda oyo.”

²⁹ Musa yaamwiramu ati: “Olunaava ghano nti, nga neegayirira Musengwa Katonda, olwaidho atoolegho ebikuukuulu eby'ensowera okuva ku iwe, ni ku bakungu bo, era ni ku bantu bo abandi boonaboona. Aye ku mukuzi guno otairamu kutuguyaguya ng'olobera abantu okuja okughaayo emisengo eri Musengwa Katonda.”

³⁰ Kale Musa yaava aghaali, kyabazinga yaaja yeegayirira Musengwa Katonda.

³¹ Musengwa Katonda yaakola nga Musa bweyamwegayirira yaatoola ebikuukuulu eby'ensowera okuva ku kyabazinga mwene, ni ku bakungu be, ni ku bantu be abandi boonaboona ghaabula ensowera esigala naire endala eti.

³² Aye kyabazinga ni ku mukuzi guno yaakalangusa omwoyo gwe yaaloba kutya, era yaaloba kuleka Baisiraeli ni baja.