Okuvaayo 7 - Baibuli Ekibono kya Katonda 2014

¹ Agho Musengwa Katonda yaakoba Musa ati: “Bona, nja kukufuula obe ng'oti oli Katonda ye kyabazinga, ate Aaroni muganda wo abe ng'oti mulanzi wo.

² Bye nkukoba byonabyona bikobere Aaroni. Aaroni akobe kyabazinga aleke Abaisiraeli baje, bave mu nsi ye.

³ Aye nja kukalangusa omwoyo gwe alobe kutya, waire nga ndikola obumanhiso n'ebyewuunhio emikuzi egigheraku mu Misiri.

⁴ Ndidhi nti taja kuwulira agho ni, ndita ku Misiri omukono gwange ogw'amaani era naatoolayo abantu bange Abaisiraeli mu bikunsu, nga mmaze okubonereza Misiri n'ebintu ebitiisa.

⁵ Ku lunaku olwo lwe ndigolola omukono gwange ni nkuba Abamisiri, era ni mbatoolamu abantu bange Abaisiraeli, Abamisiri abo lwe balimanha nga ninze Musengwa Katonda.”

⁶ Musa ni Aaroni baakola nga Musengwa Katonda bweyabalagira.

⁷ Musa yali agheza emyaka kinaana egy'obukulu, ate Aaroni ng'agheza kinaana n'esatu, mu kiseera ghe baayogerera ni kyabazinga.

Omwigo gwa Aaroni gufuuka omusota

⁸ Musengwa Katonda yaakoba Musa ni Aaroni

⁹ ati: “Kyabazinga bw'alibakoba ati, ‘Okukakasa kye mukoba mukoleyo ekyewuunhio,’ olikoba Aaroni oti, ‘Toola omwigo gwo ogusuule ghansi agho mu maiso ga kyabazinga gufuuke omusota.’ ”

¹⁰ Kale Musa ni Aaroni baaja ye kyabazinga, baakola nga Musengwa Katonda bweyabalagira. Aaroni yaasuula omwigo gwe ghansi mu maiso ga kyabazinga n'abakungu be, gwafuuka omusota.

¹¹ Agho kyabazinga yaayetesa abasaadha be abagezigezi n'abalogo, boona baakozesa obulogo bwaibwe baakola ekintu n'ekirala.

¹² Kuba buli muntu ku abo yasuula omwigo gwe ghansi, era gyonagyona gyafuuka emisota. Aye omwigo gwa Aaroni gwamira egyaibwe gyonagyona.

¹³ Aye era omwoyo gwa kyabazinga gwasigala nga mukalangufu, yaaloba kutya era yaaloba kuwulira nga Musengwa Katonda bweyakoba.

Ebibamba eikumi ebyagwira Misiri Omusaayi

¹⁴ Agho Musengwa Katonda yaakoba Musa ati: “Omwoyo gwa kyabazinga mukalangufu era taidha kuleka bantu baje.

¹⁵ Kale ja ye kyabazinga oyo ku nkyo, omuteege ng'ali kuja ku mwiga, agho nga ku mbali kwa gwo. Ja ng'ogemye omwigo gule ogwafuukaku omusota,

¹⁶ omukobe oti, ‘Musengwa Katonda, Katonda ow'Abaheburayi yantuma y'oli, yaakukoba oleke abantu be baje mu irungu bamusinzize eyo, aye ni ye buli eno okaadheemye okuwulira.’

¹⁷ Buti ni, Musengwa Katonda akoba ati, ‘Kino kye nja okukola kw'onaamanhira nga ninze Musengwa Katonda: nja kukuba ku ngulu ku maadhi ag'omwiga Kiyira n'omwigo guno gwe ndi nagwo mu ngalo, era amaadhi ago gaja kufuuka musaayi.

¹⁸ Ebyenhandha bija kufa era omwiga Kiyira guja kuduuka ekiwunha ekinene ng'Abamisiri tibasobola na kunhwa maadhi gaamu.’ ”

¹⁹ Agho Musengwa Katonda yaakoba Musa ati: “Koba Aaroni oti, ‘Toola omwigo gwo ogololere omukono gwo ku bifo mu Misiri byonabyona ebibaamu amaadhi bino: emiiga, emyala, ebibali n'ebidiba amaadhi gaamu goonagoona gafuuke musaayi. Era ghaja kuba omusaayi mu nsi Misiri yoonayoona, waire ni mu bintu ebiterekebwamu amaadhi.’ ”

²⁰ Agho Musa ni Aaroni baakola nga Musengwa Katonda bweyabalagira, nga kyabazinga n'abakungu be babona. Yaaghanika omwigo, yaakuba amaadhi agaali mu mwiga Kiyira, era amaadhi ago goonagoona gaafuuka musaayi.

²¹ Ebyenhandha ebyali mu mwiga Kiyira byafa era omwiga ogwo gwaduuka ekiwunha ekinene ng'Abamisiri tibaghanga na kunhwa maadhi gaamu. Buli ghantu mu Misiri nga ghaidhwire bwa musaayi.

²² Aye abalogo ab'omu Misiri boona baakola ekintu n'ekirala ekyo nga bakozesa eirogo lyaibwe kale omwoyo gwa kyabazinga gwasigala nga mukalangufu, yaaloba kuwulira, era nga Musengwa Katonda bweyakoba.

²³ Agho Kyabazinga yaakyuka yairayo mu ndhu ye. Ebyo ebyaligho byonabyona yaaloba kubitwala ng'ekikulu mu mwoyo gwe.

²⁴ Abamisiri boonaboona baaja nga basimasima agho okumpi ni Kiyira okufuna amaadhi ag'okunhwa, kuba baali nga tibasobola kunhwa maadhi gava mu Kiyira omwo.

²⁵ Ekyo kyaba kityo okumala enaku musanvu okuva Musengwa Katonda lwe yakuba omwiga Kiyira.