Okuvaayo 6 - Baibuli Ekibono kya Katonda 2014

¹ Aye Musengwa Katonda yaakoba Musa ati: “Buti oja kubona kye nja okukola kyabazinga oyo, kuba aja kukakibwa bukakibwe na maani abakobe baje bwenebwene olw'okukakibwa okwo aja na kubabinga bubinge bave mu nsi ye.”

Katonda airamu okweta Musa

² Agho Katonda yaayogera ni Musa, yaamukoba ati: “Ninze Musengwa Katonda.

³ Nabonekera Aburahamu ni Isaaka era ni Yakobo nga Katonda Aghanga Ebintu Byonabyona aye tibeeyolekerangaku nga nkozesa eriina lyange eitukuvu erya Musengwa Katonda.

⁴ Era nakola nabo endagaano okubagha ekiketezo eky'e Kanaani, ekiketezo mwe baabanga ng'abasenze.

⁵ Ate ekindi naawulira okulira okw'Abaisiraeli, Abamisiri be baafuula abairu, naidhukira endagaano yange.

⁶ Agho ni, kobera Abaisiraeli oti, ‘Ninze Musengwa Katonda, era ndidha kubatwikula emirimo emikalangufu Abamisiri gye babakaka okukola. Nja kugolola omukono gwange ogw'amaani, mbonereze Abamisiri n'ebibonerezo ebikakali, mbanunule imwe era mbawonie okuba abairu baibwe.

⁷ Ndidha kubafuula bantu bange, era nze mbenga Katonda waimwe. Olwo mulimanha nga ninze Musengwa Katonda waimwe, nga mbatwikwire emirimo emikalangufu Abamisiri gye babakaka okukola.

⁸ Era ndidha kubatwala mu nsi ye nalayira okugha Aburahamu, Isaaka ni Yakobo. Ensi eyo nja kugibagha imwe, ebe yaimwe ku bwaimwe. Ninze Musengwa Katonda.’ ”

⁹ Musa yaakobera atyo Abaisiraeli aye baaloba kumuwulirisa, kuba okukozesebwa obwiru n'obukambwe byali byabamalamu amaani n'eisuubi.

¹⁰ Agho Musengwa Katonda yaakoba Musa ati:

¹¹ “Ja ye kyabazinga ow'e Misiri omukobe aleke Abaisiraeli bave mu nsi ye.”

¹² Aye Musa yairamu Musengwa Katonda ati: “Bona eno, ate oba nga Abaisiraeli tibampuliriisa, memale kyabazinga anampulirisa atya? Nze tiri mwogezi mulungi.”

¹³ Aye Musengwa Katonda yaagha Musa ni Aaroni ekiragiro, okutwalira Abaisiraeli ni kyabazinga ow'e Misiri, nga kya kutoola Abaisiraeli mu Misiri.

Badhaadha ba Musa ni Aaroni

¹⁴ Reubeni mutabane wa Yakobo omukulu yali n'abaana bano: Hamoki, Pallu, Hezironi, ni Karumi. Buli muntu ku abo yavaamu ekika. Edho n'enda edhaasimuka mu Reubeni.

¹⁵ Simeoni yazaala abaana mukaaga era nga ni bano: Yemueli, Yamini, Ohadi, Yakini, Zohara ni Shaulo omwana w'omukazi Omukanaani. Edho n'enda edhaasimuka mu Simeoni.

¹⁶ Levi yazaala abaana basatu era nga ni bano ng'ojiira ku nse dhaibwe: Gereshoni, Kohathi ni Merari. Era Levi oyo yaaghangaala emyaka kikumi n'asatu na musanvu (137).

¹⁷ Gereshoni yazaala abana babiri era nga ni bano ng'ojiira ku nda dhaibwe, Libuni ni Shimei.

¹⁸ Kohathi yazaala abaana bana era nga ni bano: Amarama, Izahara, Heburoni ni Uzzieli. Era yaaghangaala emyaka kikumi n'asatu n'esatu (133).

¹⁹ Merari yazaala abaana babiri era nga ni bano: Mahali ni Mushi. Abo boonaboona baaba nga n'enda edhaasimuka mu Levi okujiira ku nse dhaibwe.

²⁰ Amuramu mu kufuna omukazi, yafuna songa we nga bamweta Yokebeda era baazaala abaana abalenzi bano: Aaroni ni Musa. Era yaaghangaala emyaka kikumi n'asatu na musanvu (137).

²¹ Izahara yazaala abaana basatu era nga ni bano: Kora, Nefega ni Zikiri.

²² Uzzieli yeena yaazaala abaana basatu era nga ni bano: Mishaeli, Elizafani ni Sithiri.

²³ Aaroni yaafuna omukazi nga bamweta Elisheba, mughala wa Amminadabu era nga mwanhina Nahashoni. Baazaala abaana era nga ni bano: Nadabu, Abihu, Eleazari ni Ithamari.

²⁴ Kora yazaala abaana basatu: Assiri, Elukana ni Abiasafu; edho nga n'enda edhaasimuka mu Kora.

²⁵ Eleazari mutabane wa Aaroni yaafuna omukazi ku baghala ba Putieli, baazaala omwana baamutuuma eriina Finehasi. Edho n'enda edhaasimuka mu Levi era abo n'abakulu baadho.

²⁶ Aaroni oyo ni Musa, Musengwa Katonda ni be yakoba okutoola Abaisiraeli mu Misiri nga babatoolayo mu bikunsu bikunsu.

²⁷ Era ni beene abo abaayogera ni kyabazinga ow'e Misiri ku ky'okutoola Abaisiraeli mu Misiri.

Ekiragiro kya Musengwa Katonda eri Musa ni Aaroni

²⁸ Ku lunaku Musengwa Katonda lwe yayogera ni Musa mu Misiri,

²⁹ Musengwa Katonda oyo yakoba Musa ati: “Ninze Musengwa Katonda. Kobera kyabazinga ow'e Misiri, byonabyona bye nkukoba.”

³⁰ Aye Musa yaakoba ati: “Wo Musengwa Katonda, okiidhi bukalamu nga nze tiri mwogezi mulungi. Memale kyabazinga anampulirisa atya?”