Okuvaayo 5 - Baibuli Ekibono kya Katonda 2014

Musa ni Aaroni nga bali mu maiso ga kyabazinga ow'e Misiri

¹ Ebyo nga biwoire, Musa ni Aaroni baaja ye kyabazinga ow'e Misiri baamukoba bati: “Musengwa Katonda, Katonda wa Isiraeli akoba ati, leka abantu be baje mu irungu bakolere eyo ekibinuko eky'okumusinza.”

² Aye kyabazinga yaabakoba ati: “Musengwa Katonda naani, ye ndi n'okuwulira era ni ndeka Abaisiraeli okuja? Nze tiidhi Musengwa Katonda oyo, era tiidha kuleka Baisiraeli kuva ghano.”

³ Baamukobera bati: “Katonda ow'Abaheburayi yatweyolekera era buti tuli kukusaba otuleke tuje mu irungu nga tutambula olugendo olumala enaku eisatu, tugheereyo eyo omusengo eri Musengwa Katonda waife oyo; kuba bwe tutakola tutyo asobola okutusindikira obulwaire obubi, oba okutusindikira olutalo baatwita baatumalagho.”

⁴ Aye kyabazinga yaakoba Musa ni Aaroni ati: “Lwaki muli kwenda okutoola abantu ku mirimo gyaibwe? Muje mukole gye muteekwa okukola.”

⁵ Era kyabazinga yaakoba ati: “Mubona abantu abagheze obwaga agho mu nsi, nga kabiri mwenda kubawuumuza baleke agho emirimo gye bateekwa okukola!”

⁶ Ku lunaku lwene olwo kyabazinga yaalagira Abamisiri abaasalanga amakatala, n'Abaisiraeli abaakakanga banaibwe emirimo

⁷ yaabakoba ati: “Okuva n'olwaleero mulekere agho okufuniranga abantu eisubi ery'okukozesanga amatoofaali nga bwemubaire nga mukola. Mubasindike baje balyesololeze beene.

⁸ Aye ate mutakendeeza ku mughendo gwa matoofaali ge bali n'okuwumba buli lunaku. Kuba bakongoze tibenda kukola, kyebava ni baba agho nga bansiniriza bati, ‘Tuleke tuje tugheeyo omusengo eri Katonda waife.’

⁹ Abantu abo mubongere emirimo emikalangufu babe nga bakola inho, babule ekiseera eky'okuwulirisa eby'obuguya.”

¹⁰ Kale Abamisiri abaasalanga amakatala, n'Abaisiraeli abaakakanga banaibwe emirimo, baaja baakobera abantu bati: “Kyabazinga akobye ati takaabafunira isubi.

¹¹ Muje beene, mufune eisubi lyaimwe woonawoona ghe musobola okulifuna. Ate omughendo ogw'amatoofaali ge muli n'okuwumba buli lunaku tigukendeireeku naire.”

¹² Kale abantu baasaatuukira mu biketezo byonabyona ebya Misiri nga baagala eisubi.

¹³ Abamisiri abaasalanga amakatala, nga babadeeba buli kaseera bati: “Mumaleyo omughendo ogw'amatoofaali aga buli lunaku agaabasalirwa, nga bwe mwakolanga nga babafunira eisubi.”

¹⁴ Era baagwa ku Baisiraeli be baataagho okukaka banaibwe emirimo baabakuba nga bababuuza bati: “Lwaki omughendo ogw'amatoofaali ge muli n'okuwumba buli lunaku tiguwoireeyo olwaleero?”

¹⁵ Agho Abaisiraeli abaakakanga banaibwe emirimo baaja, baalirira kyabazinga bati: “Isebantu kyabazinga, lwaki obisa otyo abairu bo?

¹⁶ Tibakaatugha isubi, aye ate baatukaka okukuba amatoofaali. Era bona eno, abairu bo tukubwa inho ate nga omusango guli ku bantu bo beene.”

¹⁷ Aye yaabairamu ati: “Muli bakongoze timwenda kukola. Era kye muva ni munsiniriza muti, ‘Tuleke tuje tugheeyo omusengo eri Musengwa Katonda waife.’

¹⁸ Muje mukole! Ghazira isubi lija kubagheebwa. Ate muteekwa okuwumba amatoofaali mu bungi obwabuliidho ng'eira.”

¹⁹ Abaisiraeli abaakakanga banaibwe emirimo baabona nga batuuse ku budaaga okukobwa bati, “Mu buli ngeri timukendeeza ku bungi bwa matoofaali ge mubairenga nga muwumba buli lunaku okuva einhuma ere.”

²⁰ Bwe baali bava ye kyabazinga baayagaana Musa ni Aaroni abaali agho nga babateegereire,

²¹ baabakoba bati: “Musengwa Katonda aboine kye mukoze, era aidha kubasalira omusango gubasinge! Kuba mutuleeteire okukyayibwa kyabazinga n'abakungu be, era mwabaleetera okuba n'ensonga ye banaavangaku okutwita.”

²² Agho Musa yaira ye Musengwa Katonda yaasaba ati: “Wo Musengwa Katonda, lwaki oleese obuzibu ku bantu bano? Lwaki wantuma nze.

²³ Kuba kasookanga ndidha kwogera ni kyabazinga mu liina lyo, kyabazinga oyo atuusiiza ku bantu bano obuzibu kamaala, aye iwe waaloba kubatoola mu buzibu obwo.”