Okuvaayo 40 - Baibuli Ekibono kya Katonda 2014

Okutaagho n'okutukuza Weema ey'Okwagaananirangamu ni Musengwa Katonda

¹ Musengwa Katonda yaakoba Musa ati:

² “Ku lunaku olusooka olw'omwezi ogusooka mwidha kutaagho Eweema ey'Okwagaananirangamu ni Musengwa Katonda.

³ Mwidha kutaamu Esanduuku ey'Endagaano, era mugikingirize n'olutimbe olwawula Ekifo Ekitukuvu Einho ku Kifo Ekitukuvu.

⁴ Agho mwidha kuleeta emeeza mugiteegho n'ebikozesebwa byaku, era muleete ekikondo eky'entaala mukyemerezeegho, mukiteeku n'entaala dhaaku.

⁵ Olwo mute alutaari eyakolebwa mu zaabu ey'okuniokezaaku obubbaani, mu maiso ag'Esanduuku ey'Endagaano, era muteegho ekikinzaagho ekyakolebwa okuba mu omulyango ogwingira mu Weema Entukuvu.

⁶ Bwe mumala mwidha kuta alutaari ey'okwokeraku ebigheebwayo ebyokebwa mu kifo kyayo, agho okulingirira omulyango ogwingira mu Weema Entukuvu.

⁷ Olwo mute ekyogero ghagati agh'Eweema Entukuvu eyo ni alutaari eyo, era mukiteemu amaadhi.

⁸ Mwidha kukola olugugiriro ku Weema Entukuvu, era mu mulyango gwalwo muteemu ekikinzaagho.

⁹ “Agho mwidha kufuna omuzigo ogusiigibwa musiige ku Weema Entukuvu n'ebirimu byonabyona ebija okukozesebwanga, bibe bitukuvu.

¹⁰ Era mwidha kusiiga alutaari ey'okwokerangaku ebigheebwayo ebyokebwa n'ebikozesebwaku byonabyona mubitukuze n'omuzigo.

¹¹ Era mutyo bwe munaatukuza ekyogero n'ekityamo kyakyo, nga mubisiiga omuzigo.

¹² “Agho oidha kuleeta Aaroni ni batabane ku mulyango ogw'Eweema Entukuvu okole omukolo ogw'okubanaaza n'amaadhi.

¹³ Era ovaaze Aaroni ebivaalo ebitukuvu, omusiige omuzigo, omutukuze ampeereze nga kabona.

¹⁴ Oidha kuleeta ni batabane boona, obavaaze ebivaalo byaibwe,

¹⁵ obasiige omuzigo nga bw'onaaba okoze lata waibwe, baghange okumpeereza nga bakabona. Okusiiga omuzigo okwo kwidha kubangiza mu bugheereza obw'obwakabona, beene, n'abaana baibwe, n'abaidhukulu ense n'ense.”

¹⁶ Musa yaakola byonabyona, nga bwenebwene Musengwa Katonda bweyamulagira.

¹⁷ Kale ku lunaku olusooka olw'omwezi ogusooka ogw'omwaka ogwokubiri ogw'okuva kwaibwe mu Misiri, yaataagho Weema ey'Okwagaananirangamu ni Musengwa Katonda.

¹⁸ Musa yaasimba Weema eyo ng'atoolera n'okutaagho ebikolo, yaayemerezaaku ebikondo, yaataaku emiti egikiikamu, era yaasitusa empango dhaayo.

¹⁹ Agho yaayandhuluza ekighemba ku Weema Entukuvu, kabiri yaataaku n'ekindi eky'oku ngulu, nga Musengwa Katonda bweyalagira.

²⁰ Yaatoola ebibaadho eby'amabaale ebyaliku amateeka yaabita mu Sanduuku ey'Endagaano. Esanduuku eyo yaagitaaku emiti egy'okugibbeedesa n'ekisandikiza.

²¹ Olwo yaaleeta Esanduuku ey'Endagaano yaagita mu Weema entukuvu, era yaakola olutimbe yaalusiba ku mpango dhaalwo eina, agho yaaba ng'akingiriiza Esanduuku ey'Endagaano, nga Musengwa Katonda bweyamulagira.

²² Yaata emeeza mu Weema entukuvu, ku luuyi olw'omukono omugooda olw'e buvandhuba w'Eweema eyo, agho ku luya okw'olutimbe olwawula Ekifo Ekitukuvu Einho ku Kifo Ekitukuvu.

²³ Yaata emigaati egigheereibwayo ye Katonda ku meeza okwo nga Musengwa Katonda mwene bweyamulagira.

²⁴ Yaata ekikondo eky'entaala mu Weema Entukuvu, ku luuyi olw'omukono omusaadha olw'e buvandhuba w'Eweema Entukuvu eyo, agho okulingiriza emeeza.

²⁵ Era yaata entaala mu bifo byadho ku kikondo, dhaaba nga dhimulisa nga Musengwa Katonda bweyamulagira.

²⁶ Yaata alutaari eyakolebwa mu zaabu mu Weema Entukuvu emberi w'olutimbe olwawula Ekifo Ekitukuvu Einho ku Kifo Ekitukuvu.

²⁷ Era yaaniokezaaku obubbaani obuwunha akawoowo nga Musengwa Katonda bweyamulagira.

²⁸ Olwo yaasiba ekintu ekikinzaagho ku mpango edh'omu mulyango ogwingira mu Kifo Ekitukuvu Einho.

²⁹ Yaata alutaari eyokerwaku ebigheebwayo ebyokebwa emberi w'omulyango ogw'Eweema Entukuvu, era yaayokeraku ekigheebwayo eky'emere ey'empeke, nga Musengwa Katonda bweyamulagira.

³⁰ Yaata ekyogero ghagati w'Eweema eyo ni alutaari eyo, era yaakitaamu amaadhi ag'okunaaba.

³¹ Amaadhi ago, Musa ni Aaroni ni batabane, ge baanaabanga mu ngalo ni ku bigere,

³² memale ni bangira mu Weema Entukuvu, oba ni baseeta gh'alutaari nga Musengwa Katonda bweyamulagira.

³³ Agho yaataagho olugugiriro okwezunguluza Eweema Entukuvu n'alutaari, era yaasiba ekintu ekikinzaagho mu mulyango ogw'oku lugugiriro olwo. Agho Musa yaaba ng'amaze omulimo.

Ekire ekyabanga ku Weema ey'Okwagaananirangamu ni Musengwa Katonda

³⁴ Agho ekire kyaidha kyaghemba ku Weema ey'Okwagaananirangamu ni Musengwa Katonda, era ekitiisa kya Musengwa Katonda kyaidhula Eweema eyo.

³⁵ Olw'ensonga eyo, Musa yaaba nga taghanga kungira mu Weema eyo.

³⁶ Okuva n'olwo, ekire ekyo bwe kyavanga ku Weema eyo, nga n'Abaisiraeli boona batambula okuva ghe baalinga basimbye weema dhaibwe.

³⁷ Aye ekire bwe kyasigalanga nga kiri ku Weema eyo, nga baba ghalala agho okutuusa lwe kiritoolebwaku.

³⁸ Era mu kutambula kwaibwe kwonakwona, ng'ekire kya Musengwa Katonda ekyo kiba ku Weema Entukuvu omusana, ate obwire nga mu kire omwo mwakamu omuliro ng'Abaisiraeli boonaboona babona.