Okuvaayo 4 - Baibuli Ekibono kya Katonda 2014

Katonda agha Musa obukumu okukola ebyewuunhio

¹ Agho Musa yairamu Musengwa Katonda ati: “Aye bona eno, tibaja kundhikiriza waire okuwulirisa bye ndiba ndi kubakoba. Kuba balikoba bati, ‘Musengwa Katonda tiyakubonekera?’”

² Musengwa Katonda n'okumubuuza ati: “Kiki ekyo ekikuli mu ngalo?” Musa yaamwiramu ati: “Mwigo.”

³ Yaamukoba ati: “Gusuule ghansi.” Musa yaagusuula ghansi, gwafuukamu omusota yaagulumuka.

⁴ Aye Musengwa Katonda yaamukoba ati: “Kola omukono ogugeme omukira.” Yeena yaakola atyo yaagugema omukira era gwafuuka mwigo kabiri nga gumuli mu ngalo.

⁵ Musengwa Katonda yaamukoba ati: “Otyo bw'olikola, baakakasa nti nze Musengwa Katonda, Katonda wa badhaadha baibwe, Katonda wa Aburahamu, Katonda wa Isaaka, era Katonda wa Yakobo, nakubonekera.”

⁶ Kabiri Musengwa Katonda yaamukoba ati: “Ingiza omukono gwo mu kanzu yo.” Era Musa yaakola atyo. Yaja okugutoolamu nga gwidhieku ebigenge era nga gweruukiriire ng'oti mugozi.

⁷ Agho Musengwa Katonda yaakoba Musa ati: “Ingiza kabiri omukono gwo mu kanzu yo.” Musa yaingiza omukono gwe mu kanzu, mu kugutoolamu yaja okubona nga gwizeegho, nga guli ng'oti n'omubiri gwe ogundi gwonagwona.

⁸ Era yaamukoba ati: “Bwe batalikwikiriza oba okukuwulirisa olw'akamanhiso akasooka, balikwikiriza olw'ako akairaku.

⁹ Bwe batalikwikiriza oba okukuwulirisa waire ng'omaze okukola obumanhiso obwo bwombi, olisena amaadhi mu mwiga Kiyira waagafuka ghansi ku itaka eikalu. Amaadhi ago galifuuka musaayi ku itaka eryo eikalu.”

¹⁰ Aye Musa yaakoba Musengwa Katonda ati: “Wo Musengwa Katonda, tibangaku mwogezi mulungi okuva eira n'eira. Waire ni mperaano kasookanga otoolera okwogera ninze, nkaali kufuuka mwogezi mulungi. Ndhogera mpola ng'ebigambo ndowoolereza bulowoolereze.”

¹¹ Agho Musengwa Katonda yaamubuuza ati: “Naani eyata ku muntu omunwa? Era naani asobola okumufuula kasiru oba omusigha oba abona, oba omutulu? Ti ninze, nze Musengwa Katonda?

¹² Mperaano ni ja, nze mwene ndikozesa omunwa gwo, era ndikugha eby'okwogera.”

¹³ Aye Musa yairamu ati: “Wo Musengwa Katonda, nkweghembye tuma omuntu owundi.”

¹⁴ Agho Musengwa Katonda yaasungughalira Musa, yaamukoba ati: “Aaroni muganda wo Omulevi azirayo? Ndidhi nti oyo asobola okwogera obukalamu bwene. Era, bona eno, ali kwidha y'oli, era bw'anaakubona aidha kusangaala.

¹⁵ Oidha kwogera naye omukobere eby'okukoba, era nze mwene ndiba n'iwe naakugalagira eby'okukoba. Era yeena ndiba naye naamugalagira yeena eby'okukoba era ndibagalagira mwembi eky'okukola.

¹⁶ Oyo alikwogereragho eri abantu ng'ali ng'oti n'omunwa gwo. Ate iwe oliba ng'oti Katonda y'ali ng'omukobera eby'okukoba.

¹⁷ Era oidha kuja n'omwigo ogwo gw'oli nagwo mu ngalo, ni gw'olikozesa obumanhiso obwo.”

Musa airayo e Misiri

¹⁸ Agho Musa yairayo eka ye Yethuro mukoirume we eyamuzaaliranga mukazi we, yaamukoba ati: “Nkusaba ondeke ndhireyo e Misiri y'ab'eighanga lyange, mbone oba nga bakaali balamu.” Yethuro yaamwiramu ati: “Tuuka bukalamu.”

¹⁹ Musa bweyali ng'akaali mu Midia, Musengwa Katonda yaamukoba ati: “Irayo e Misiri, kuba abantu boonaboona abaayendanga okukwita baafa.”

²⁰ Musa yaata mukazi we ni batabane be ku ndogoyi, baaja e Misiri, nga mwene agemye omwigo Katonda gwe yamukoba okuja nagwo.

²¹ Era Musengwa Katonda yaakoba Musa ati: “Bw'otuuka e Misiri bona nti okolera mu maiso ga kyabazinga ebyewuunhio byonabyona nga bwendi kukugha obukumu okubikola, aye nja kukalangusa omwoyo gwe alobe kutya, era alobe kuleka bantu bange kuvaayo.

²² Era oidha kukoba kyabazinga oti, ‘Musengwa Katonda ati bw'akoba: Isiraeli n'omwana wange omuberi,

²³ era ndi kukukoba nti leka omwana wange oyo aje ampeereze. Aye bw'onaaloba okumuleka ndidha kwita mutabane wo omuberi.’ ”

²⁴ Bwe baali nga bali mu lugendo, baatuuka aghantu agh'okusula, baasula agho. Musengwa Katonda yaayagaana agho Musa yaayenda okumwita.

²⁵ Agho Zippori yaatoola akambe akoogi yaakeketa mutabane we, yaatoola akawutu k'akekeite ku mwana oyo, yaakabisa ku bigere bya Musa ng'akoba ati: “Bwenebwene ye ndi oli baze wa musaayi.”

²⁶ Agho Musengwa Katonda yaaleka Musa. Era olwo ni lwonka Zippori lwe yakoba ati: “Oli baze wa musaayi.” Era yakikoba olw'okukeketa kwe yakeketa omwana we.

²⁷ Musengwa Katonda yaakoba Aaroni ati: “Ja mu irungu osangaaze Musa.” Kale yaaja yaayagaana Musa ng'ali ku lusozi lwa Katonda. Era bweyamwagaana yaamugwa mu kifuba.

²⁸ Agho Musa yaakobera Aaroni ebibono byonabyona Musengwa Katonda bye yamutuma okumukobera, n'obumanhiso bwonabwona bwe yamulagira okukola.

²⁹ Bwe baamala Musa ni Aaroni baaja baayeta abakulu ab'ebikunsu mu Isiraeli beesoloza.

³⁰ Aaroni yaabakobera ebibono byonabyona Musengwa Katonda bye yayogera ni Musa, era yaabakolera obumanhiso boonaboona nga babona.

³¹ Agho abakulu ab'ebikunsu abo baikiriza, era bwe baawulira nga Musengwa Katonda bweyabalumirwa ng'aboine okudaazibwadaazibwa kwaibwe, baakuba amakiryaivu baamusinza.