Okuvaayo 39 - Baibuli Ekibono kya Katonda 2014

Ebivaalo bya bakabona

¹ Agho baakola ebivaalo bya bakabona mu langi ya bbululu, n'eya nakasooma, n'eya kasaayisaayi, eby'okugheererezangamu mu kifo ekitukuvu. Baakola ebivaalo bya Aaroni ebitukuvu nga Musengwa Katonda bweyalagira Musa.

² Baakola ekivaalo eky'obwakabona nga kya zaabu, mu ngoye edha langi ya bbululu, n'edh'eya nakasooma, n'edh'eya kasaayisaayi n'empegheevu.

³ Baagheesa n'amagezi mangi obubaati bwa zaabu, baabusala mu ngeri ya buwuuzi, baabutungira mu ngoye edha langi ya bbululu, n'edh'eya nakasooma, n'edh'eya kasaayisaayi, n'empegheevu.

⁴ Baakikoleraku ensibiro edhikisiba ku mabega, baadhiyunga ku ndhuyi dhaakyo ibiri.

⁵ Baakirukiraku olusibiro olw'omu nkende olwalukibwa obukalamu era nga lwatungibwa ku ekivaalo ekyo eky'obwakabona. Byombi ebyo byakolebwa mu ngoye ndala, dhino edha langi ya zaabu, n'edh'eya bbululu, n'edh'eya nakasooma, n'edh'eya kasaayisaayi, n'empegheevu. Atyo Musengwa Katonda bweyalagira Musa.

⁶ Baafunayo amabaale amabaadhe abiri ag'ekika eky'eibaale ery'omughendo eryetebwa onikisi, baagataaku emigo gya zaabu, baagasalaku amaina ag'abaana ba Yakobo, ng'oti n'omubaadhi ow'amabaale ag'omughendo bw'agasalaku obumanhiso.

⁷ Bwe baamala baagata ku nsibiro edhisiba ekivaalo eky'obwakabona ku mabega, gabe ag'okwidhusanga eri Abaisiraeli nga Musengwa Katonda bweyalagira Musa.

Ekivaalo eky'omu kifuba

⁸ Baakola ekivaalo eky'omu kifuba mu nsambo n'endala ng'oti n'ekivaalo eky'obwakabona nga bakozesa engoye edha langi ya zaabu, n'edh'eya bbululu, n'edh'eya nakasooma, n'edh'eya kasaayisaayi, n'empegheevu

⁹ Baakikola nga kiwumbe kyamu era ng'endhuyi dhaakyo eina dhaagayaga, sentimita amakumi abiri na ibiri obuleeyi, n'obugazi sentimita amakumi abiri na ibiri.

¹⁰ Baataanhaku obunhiriri buna obw'amabaale ag'omughendo. Akanhiriri akasooka kaaliku amabaale ageetebwa saradiu, ni topazi, ni karabunkule.

¹¹ Akanhiriri akokubiri kaabaaku ageetebwa emeraludo, ni saffiro, ni diamondi.

¹² Ate akanhiriri akokusatu kaabaaku ageetebwa yasintha, agate, ni amethisiti.

¹³ Olwo akokuna kaabaaku ageetebwa berulo, ni onikisi, ni yasipera. Bwe baamala baagataaku omugo gwa zaabu.

¹⁴ Nga bwe gaali amabaale eikumi n'abiri, buli irala lyakolebwa ng'oti kamanhiso nga lighandiikibwaku n'ekyuma ekisongovu eriina irala ku maina ag'abaana ba Yakobo, ku lw'ebika byaibwe eikumi n'ebibiri.

¹⁵ Ekivaalo kino eky'omu kifuba baakikoleraku endhegere edha zaabu omukenenule, nga dhirukiibwa ng'oti migugha.

¹⁶ Baakola emigo ebiri nga gya zaabu n'obukondo bubiri nga bwona bwa zaabu. Obukondo obwo baabuta ku nsonda dhaakyo eibiri edha ghaigulu.

¹⁷ Baasiba endhegere dhire edha zaabu mu bukondo obwo.

¹⁸ Ate endhuyi edhindi edh'endhegere edho, baadhisiba ku migo gire ebiri. Olwo ekivaalo kino eky'omu kifuba kyaba nga kiyimbiibwa emberi ku nsibiro edhisiba ekivaalo eky'obwakabona ku mabega.

¹⁹ Kabiri baakolayo obukondo bubiri obwa zaabu, baabuta ku nsonda eibiri edha ghansi edh'olukugiro olw'omunda olw'ekivaalo eky'omu kifuba okuliiraana n'ekivaalo eky'obwakabona.

²⁰ Era baakolayo obukondo obundi bubiri obw'obuuma bwa zaabu, baabuta ku lukugiro olwa ghansi olw'emberi ku nsibiro edhisiba ekivaalo eky'obwakabona ku mabega, okumpi n'olusibiro olw'omu nkende olwalukirwa obukalamu ku kivaalo eky'obwakabona ekyo.

²¹ Agho baasiba ghalala obukondo obw'oku kivaalo eky'omu kifuba n'obukondo obw'ekivaalo eky'obwakabona, nga bakozesa akagugha aka langi ya nakasooma. Era olwo ekivaalo eky'omu kifuba ekyo kyaba nga kiika bukalamu ku lusibiro olw'omu nkende olwalukirwa obukalamu ku kivaalo eky'obwakabona, era nga tikirekuka kuva ku kivaalo ekyo eky'obwakabona. Atyo Musengwa Katonda bweyalagira Musa.

Ekanzu

²² Era baakola ekanzu enaateebwangaku ekivaalo eky'obwakabona, nga yoonayoona yalukibwa mu langi ya nakasooma.

²³ Baagitaaku ekituli omubita omutwe, era ku nkoto baalukiraku olukugiro ng'oluba ku kanzu edhindi, erobe kukanuka.

²⁴ Okwezunguluza ekitundu eky'eifo eky'ekanzu, baatungiraku ebifaananie eby'ebibala eby'oku muti omukomamawanga mu lugoye olughegheevu olulukiibwa mu langi ya bbululu, n'eya nakasooma, n'eya kasaayisaayi.

²⁵ Era baatungiraku endege nga dha zaabu omukenenule, era nga dhiri ndalandala buli ghagati gh'ebifaananie by'emikomamawanga ebibiri.

²⁶ Kyaba nti ekifaananie eky'omukomamawanga bakiriiraania endege, kabiri bataagho ekifaananie eky'omukomamawanga; batyo batyo okutuusa bwe baamala okwezunguluza ekitundu eky'eifo eky'ekanzu eyo ey'okugheererezangamu. Atyo Musengwa Katonda bweyalagira Musa.

Ebivaalo ebindi

²⁷ Era baakolera Aaroni ni batabane be ebivaalo,

²⁸ n'ebitambaala eby'oku mutwe, n'enkuufiira, n'empale, nga bino bya ngoye mpegheevu.

²⁹ Era baabakolera enkoma edh'omu nkende mu ngoye empegheevu edha langi ya bbululu, n'edh'eya nakasooma, n'edh'eya kasaayisaayi. Era enkoma edho baadhidholiga n'empiso n'ewuuzi. Atyo Musengwa Katonda bweyalagira Musa.

³⁰ Agho baakola akabaati ak'engule entukuvu mu zaabu omukenenule, baakataaku ekighandiiko, ng'omubaadhi ow'amabaale ag'omughendo bw'agasalaku obumanhiso ng'akozesa ekyuma ekisongovu, ekighandiiko nga kikoba kiti: “Yayawulibwa nga wa Musengwa Katonda.”

³¹ Baakozesa akagugha ak'erangi ya nakasooma, baasiba akabaati ako ku kitambaala eky'oku mutwe ghaigulu. Atyo Musengwa Katonda bweyalagira Musa.

Okumaliriza omulimo

³² Agho omulimo ogw'okukola Eweema ey'Okwagaananirangamu ni Musengwa Katonda gwawa. Abaisiraeli baakola ebyo byonabyona nga Musengwa Katonda bweyalagira Musa.

³³ Agho baaleetera Musa ebintu eby'okukola Weema entukuvu bino: ensuubo, n'eby'okukozesebwa mu Weema eyo byonabyona, obuntu obugemagania, ebikondo, embaawo edhikiikamu, empango n'ebikolo byadho.

³⁴ Era baamuleetera ekighemba ku Weema ekyakolebwa mu mawu ag'entaama amakunhe amamyufu, n'ekindi ekyakolebwa mu mawu amakunhe ag'ensolo edhindi, n'olutimbe.

³⁵ Era baamuleetera Esanduuku ey'Endagaano, n'emiti egy'okugibbeedesa, n'ekisandikiza kyayo.

³⁶ Era baamuleetera emeeza n'ebikozesebwaku, n'emigaati egigheereibwayo ye Katonda.

³⁷ Era baamuleetera ekikondo eky'entaala ekyakolebwa mu zaabu omukenenule, n'entaala dhaaku, n'ebikozesebwaku ebindi byonabyona, n'amafuta ag'entaala.

³⁸ Era baamuleetera alutaari eyakolebwa mu zaabu, n'omuzigo ogusiigibwa, n'obubbaani obuwunha akawoowo, n'ekikinzaagho mu mulyango ogwingira mu Kifo Ekitukuvu Einho.

³⁹ Era baamuleetera alutaari eyakolebwa mu kyuma eky'ekikomo, n'ekiibo kyona ekyakolebwa mu kyuma eky'ekikomo, n'emiti egy'okugibbeedesa, n'ebikozesebwaku byonabyona, n'ekyogero aghalala n'ekityamo kyakyo.

⁴⁰ Era baamuleetera entimbe edh'oku lugugiriro olw'oku Weema Entukuvu, n'empango dhaayo, n'ebikolo byaku, n'ekikinzaagho mu mulyango ogw'olugugiriro, n'emigugha gyaku, n'enkondo dhaaku, n'ebikozesebwa byonabyona mu Weema.

⁴¹ Era baamuleetera ebivaalo ebirungi einho eby'okugheererezaamu nga kabona mu Kifo Ekitukuvu ebivaalo ebitukuvu ebya Aaroni kabona, n'ebivaalo bya batabane eby'okugheererezangamu nga bakabona.

⁴² Abaisiraeli baakola omulimo ogwo gwonagwona nga Musengwa Katonda bweyalagira Musa.

⁴³ Musa yaakebera byonabyona bye baakola, yaabona nga bwenebwene baabikola nga Musengwa Katonda bweyalagira. Musa yaabasabira enkabi.