Okuvaayo 38 - Baibuli Ekibono kya Katonda 2014

Alutaari ey'okwokeraku ebigheebwayo ebyokebwa

¹ Bezalelo yaakola alutaari ey'okwokerangaku ebigheebwayo ebyokebwa, mu mbaawo edh'omuti ogwetebwa akasia. Endhuyi dhaayo eina nga dhaagayaga, era nga dhigheza nga mita ibiri buli luuyi. Obugungumavu bwayo ng'egheza nga mita ndala.

² Yaagikoleraku ebintu ebiri ng'oti mayiga ga nsolo ku nsonda dhaayo eina, aye ebintu ebyo n'alutaari yeene yaabikola nga biri kintu kirala, nga tibyawukainemuuku naire. Alutaari yoonayoona yaagirimbyaku ekyuma eky'ekikomo.

³ Yaakola ebikozesebwa ku alutaari eyo byonabyona mu kyuma ky'ekikomo, era ni bino: obulobo obw'okusuulangamu eivu ery'amasavu, n'ebitiiyo, n'ebibya eby'okutaamu omusaayi ogw'okumansira, n'ebyuma eby'amaino ng'oti wuuma, n'ebintu eby'okutwalirangaku amanda agaliku omuliro.

⁴ Ku alutaari yaalukiraku ekiibo nga kya nsonda ina, nga kiri ng'oti kasengeedho era nga kyakolebwa mu kyuma eky'ekikomo. Ekiibo kino yaakita mu alutaari ghansi agh'omugo gwayo, kyaba nga kiika kyatuuka ghagati ghaayo.

⁵ Yaakola emikonda ena emyekulungirivu oti mpeta, yaagita ku nsonda eina edh'ekiibo ekyo, nga n'egy'okukibbeedesanga.

⁶ Yaabaadha emiti mu muti ogwetebwa akasia, baagirimbyaku ekyuma eky'ekikomo gyonagyona okugyezunguluza.

⁷ Era yaata emiti egyo mu mikonda gire egyali ku mbali ni ku mbali okw'alutaari, nga n'egy'okugibbeedesanga. Yaakola endhuyi dh'alutaari eyo eina mu mbaawo, aye ghagati ghaayo ghaasigala nga gheereere.

Ekyogero ekyakolebwa mu kyuma eky'ekikomo

⁸ Yaakola ekyogero n'ekityamo kyakyo mu kyuma eky'ekikomo. Ekikomo ekyo, kyava mu mbonerwamu edh'abakazi abaagheerezanga ku mulyango ogw'Eweema ey'Okwagaananirangamu ni Musengwa Katonda.

Olugugiriro olw'oku Weema ey'Okwagaananirangamu ni Musengwa Katonda

⁹ Agho yaakola olugugiriro olw'oku Weema ey'Okwagaananirangamu ni Musengwa Katonda. Ku luuyi olw'omukono omusaadha olw'e buvandhuba, yaatimbayo engoye empegheevu edhigheza mita amakumi ana na ina (44) mu buleeyi.

¹⁰ Engoye edho yaadhirengeedhia ku mpango amakumi abiri, dhe yayemereza ku bikolo amakumi abiri. Empango edho n'ebikolo byadho, yaabikola mu kyuma eky'ekikomo, ate obusumaali bwadho n'obuntu obudhigemagania, yaabikola mu feeza.

¹¹ Era ni ku luuyi olw'omukono omugooda olw'e buvandhuba yaakolayo ekintu n'ekirala nga kye yali akoze ku luuyi olw'omukono omusaadha ng'ataayo olugugiriro.

¹² Ku luuyi olw'e bugwandhuba yaatimbayo engoye nga dhigheza mita amakumi abiri na ibiri obuleeyi. Yaadhirengeedhia ku mpango ikumi dhe yayemereza ku bikolo eikumi, era ng'obusumaali bwadho n'obuntu obudhigemagania, byakolebwa mu feeza.

¹³ Ku luuyi olw'e buvandhuba eyali omulyango, yoona yaatimbayo engoye nga dhigheza mita amakumi abiri na ibiri obuleeyi.

^14-15 Engoye dhe yatimba ku buli luuyi olw'omulyango ogwo, nga dhigheza mita mukaaga n'ekitundu buli luuyi, nga dhiri ku mpango isatu isatu n'ebikolo byadho ebisatu ebisatu.

¹⁶ Engoye dhoonadhoona dhe yatimba okwezunguluza olugugiriro dhaali mpegheevu.

¹⁷ Ebikolo bye yaayemerezaaku empango edho yaabikola mu kyuma kya kikomo, ate obusumaali n'obuntu obudhigemagania byaba bya feeza. Emitwe egy'empango edho gyonagyona yaagirimbyaku feeza okugyezunguluza.

¹⁸ Ekintu ekikinzaagho mu mulyango ogw'olugugiriro yaakikola mu lugoye olwa langi ya bbululu, n'olw'eya nakasooma, n'olw'eya kasaayisaayi, ni mu lugoye olughegheevu era yaakitungiramu ebimuli ng'akozesa empiso n'ewuuzi. Ekikinzaagho ekyo nga kigheza mita mwenda obuleeyi ate obugungumavu mita ibiri, ng'oti n'engoye edhindi dhoonadhoona edh'oku lugugiriro.

¹⁹ Yaakitimba ku mpango eina dhe yaayemereza ku bikolo ebina ebyakolebwa mu kyuma eky'ekikomo. Obusumaali obw'oku mpango edho yaabukola mu feeza, ate emitwe egy'empango edho gyonagyona yaagirimbyaku feeza okugyezunguluza. Era empango edho yaadhitaaku obuntu obudhigemerera nga bwa feeza.

²⁰ Enkondo dhoonadhoona edhaakozesebwa mu Weema eyo, n'edhaakozesebwa mu lugugiriro, dhaakolebwa mu kyuma kya kikomo.

Ebyuma ebyakozesebwa ku Weema ey'Okwagaananirangamu ni Musengwa Katonda

²¹ Bino n'ebyuma ebyakozesebwa mu kukola Weema ey'Okwagaananirangamu ni Musengwa Katonda, eyalimu endagaano ya Musengwa Katonda. Musa n'eyalagira bibalibwe, era byabalibwa Abalevi nga bakulemberwa Ithamari mutabane wa Aaroni kabona.

²² Bezalelo mutabane wa Uri, era mwidhukulu wa Hura, era nga wa mu kika kya Yuda, yakola byonabyona Musengwa Katonda bye yalagira, nga Musa bweyamukoberanga.

²³ Yayambibwa ku Oholiabu mutabane wa Ahisamaka, ow'ekika kya Dani. Oholiabu oyo yali mubaadhi wa mabaale ag'omughendo, nga muyiiya, nga mulusi wa ngoye, era nga engoye dhoonadhoona: ka dhibe edha bbululu, oba edha nakasooma, oba edha kasaayisaayi, oba empegheevu, ng'adhidholiga n'empiso n'ewuuzi.

²⁴ Zaabu yeenayeena eyakozesebwa mu kuzimba Weema entukuvu, nga n'oyo eyaleetebwa abantu mu byagheebwayo eri Musengwa Katonda, yagheramu kilo ng'oti lukumi (1,000) ng'ojiira ku mbala entongole ey'eisinzizo.

²⁵ Ni feeza eyasolozebwa ku abo abaabalibwa, yagheramu kilo enkumi isatu na bina n'asatu, ng'ojiira ku mbala entongole ey'eisinzizo.

²⁶ Buli muntu eyali agheza emyaka amakumi abiri egy'obukulu oba okusingagho eyabalibwa, yali n'okughaayo omughendo ogumusabibwa ng'ajiira ku mbala entongole ey'eisinzizo. Era abantu abo baali abantu emitwalo nkaaga n'enkumi isatu na bitaanu n'ataanu.

²⁷ Ku feeza oyo eyasolozebwa, baakozesaaku obuzito bwa kilo nkumi isatu na bina olw'okukola ebikolo eby'Eweema entukuvu, n'ebyo eby'olutimbe olwawula Ekifo Ekitukuvu Einho ku Kifo Ekitukuvu. Omwo baakolamu ebikolo kikumi nga buli kikolo kimalagho feeza azitogha kilo asatu na ina.

²⁸ Kilo dha feeza amakumi asatu edhaasigalagho baadhikolamu obusumaali obw'oku mpango, n'okulimbya ku mitwe gyadho, n'okudhikoleraku obuntu obudhigemagania.

²⁹ Ekyuma eky'ekikomo ekyaleetebwa abantu ni kigheebwayo eri Musengwa Katonda kyagheza obuzito bwa kilo enkumi ibiri na bina n'abiri na itaanu.

³⁰ Era omwo baakolamu ebikolo eby'oku mulyango ogwingira mu Weema ey'Okwagaananirangamu ni Musengwa Katonda. Era baakolamu alutaari, n'ekiibo kye baalukiraku eky'ekyuma eky'ekikomo, n'eby'okukozesebwa ku alutaari eyo byonabyona.

³¹ Era baakolamu ebikolo eby'oku lugugiriro, n'eby'oku mulyango ogwingira mu lugugiriro olwo, era n'enkondo dhoonadhoona edh'omu Weema entukuvu n'edh'olugugiriro olwo.