Okuvaayo 37 - Baibuli Ekibono kya Katonda 2014

Esanduuku ey'Endagaano

¹ Bezalelo yaakola Esanduuku ey'Endagaano mu mbaawo edh'omuti ogwetebwa akasia, ng'obuleeyi bwayo egheza mita ndala ni sentimita ikumi, obugungumavu yaaba sentimita nkaaga na mukaaga.

² Yaamala yaalimbya ku sanduuku eyo zaabu omukenenule munda mwayo ni ku ngulu kwayo. Era baagikoleraku olukomo lwa zaabu omukenenule okugyezunguluza yoonayoona.

³ Agho yaakola mu zaabu emikonda emyekulungirivu ena nga giri ng'oti mpeta. Yaagita ku magulu ga sanduuku eyo ana, mu mbali ebiri, ni mu mbali ebiri.

⁴ Agho yaabaadhiraku emiti egy'okugibbeedesa mu muti ogwetebwa akasia, memale emiti egyo yaagirimbyaku zaabu gyonagyona okugyezunguluza.

⁵ Yaata emiti egyo mu mikonda gire emyekulungirivu egiri ku mbali ni ku mbali okw'esanduuku eyo olw'okugibbeederangaku.

⁶ Yaagikoleraku ekisandikiza mu zaabu omukenenule, ng'obuleeyi kigheza mita ndala ni sentimita ikumi, ate obugazi kyaba sentimita nkaaga na mukaaga.

⁷ Yaakola mu zaabu ebifaananie bibiri eby'ebitonde ebiri n'amaghagha ebyetebwa kerubi.

⁸ Yaabita ku ndhuyi dhombi edh'ekisandikiza eky'esanduuku eyo. Ebifaananie bino byombi yaabikolera ghalala, byegema ghalala, byaba kintu kirala nga tibyawukaine.

⁹ Ebifaananie ebyo yaabikola ng'abirinzagania, aye ng'amaiso galingiriire ku kisandikiza ekyo, era nga byandhulwiza amaghagha gaabyo gaaghemba ku kisandikiza ekyo.

Emeeza okuba emigaati egigheebwayo eri Katonda

¹⁰ Era yaakola emeeza mu muti ogwetebwa akasia ng'obuleeyi bwayo egheza sentimita kinaana na munaana, obugazi bwaba sentimita amakumi ana na ina (44), n'obugungumavu bwayo nga buli sentimita nkaaga na mukaaga (66).

¹¹ Omuti ogwo ogw'akasia yaagulimbyaku zaabu omukenenule, era emeeza yaagitaaku omugo gwa zaabu okugyezunguluza.

¹² Yaagikoleraku akabaawo akagyezungulula ng'obugazi kaagayaga n'ekyala eky'omuntu, era nga keezungulwirwa omugo gwa zaabu.

¹³ Yaakola emikonda ena mu zaabu emyekulungirivu ng'oti mpeta, yaagita mu nsonda eina edh'emeeza, kiisi ghali mugulu.

¹⁴ Kumpi agho n'akabaawo ako, yaataagho emikonda egyo, era nga n'egibitamu emiti egy'okubbeedesanga emeeza eyo.

¹⁵ Yaabaadha emiti egyo mu muti ogwetebwa akasia, memale yaagirimbyaku zaabu gyonagyona okugyezunguluza, gyaba egy'okubbeedesanga meeza eyo.

¹⁶ Yaakola ebikozesebwa ku meeza eyo byonabyona mu zaabu omukenenule, nga ni bino: ebibya, n'enkaayi. Era yaakola n'ebikopo n'ensugha olw'ebigheebwayo ebifukibwa.

Ekikondo eky'entaala

¹⁷ Era yaakola ekikondo eky'entaala mu zaabu omukenenule. Ekikolo ghalala n'ekitundu eky'eitale eky'ekikondo ekyo, yaabikola mu zaabu omukenenule oyo. Era obukopo obugemerera entaala, n'okudholiga okuli ng'oti bimuli, byona yaabikola nga byegemeire ghalala ni bire byonabyona mu zaabu omukenenule, nga ghazira kyawukaineku.

¹⁸ Ekikondo ekyo kyaliku ensaga mukaaga nga dhiva mu mbali ni mu mbali mwakyo ensaga eisatu nga dhiva ku luuyi lwakyo olundi, ate edhindi eisatu dhaava ku lundi.

¹⁹ Buli lusaga, nga bwe dhaali omukaaga, nga luliku obukopo busatu, nga buli kakopo kafaanana n'ekimuli eky'omuti ogwetebwa alumondi, nga kiramba n'obukaba bwaku.

²⁰ Ekitundu eky'eitale eky'ekikondo kyaliku obukopo buna, nga buli kakopo kafaanana n'ekimuli eky'omuti ogwetebwa alumondi nga kiramba n'obukaba bwaku.

²¹ Era nga kiisi ensaga eibiri ghe dhitandiikira okuva ku kitundu eky'eitale eky'ekikondo, nga ghaligho ekintu ekiri ng'oti kimuli era nga kikoleirwagho kyegemeragho irala aghazira kwawukanamu.

²² Ekintu ekyo ekiri ng'oti kimuli, n'ensaga, n'ekikondo kyene, byakolebwa nga byegemeire ghalala mu zaabu omukenenule, nga ghazira kyawukaineku.

²³ Agho yaakola entaala musanvu edh'okubanga ku kikondo ekyo, ni makansu edhisala ebisiriiza ku ntambi, n'esowaani edhiteebwaku ebisiriiza ebyo. Ebyo byonabyona yaabikola mu zaabu omukenenule.

²⁴ Ekikondo ekyo, n'ebindi byonabyona ebyakolerwaku byamalagho talanta namba edho nga ni kilo asatu n'eitaanu edha zaabu omukenenule.

Alutaari ey'okuniokezaaku obubbaani

²⁵ Era yaakola alutaari mu mbaawo edh'omuti ogwetebwa akasia ey'okuniokezangaku obubbaani. Ng'endhuyi dhaayo eina dhaagayaga obuleeyi sentimita amakumi ana na itaanu (45), n'obugazi sentimita amakumi ana na itaanu. Obugungumavu bwayo nga buli sentimita kyenda. Yaakoleraku ebintu ebiri ng'oti mayiga ga nsolo, byaba nga byegemye ni alutaari eyo ghalala nga tibyawukaine.

²⁶ Ku ngulu kwayo, n'okugyezunguluza endhuyi dhaayo, ni ku bintu ebyo ebiri ng'oti mayiga, yaalimbyaku zaabu omukenenule, era yaagikoleraku omugo mu zaabu omukenenule, okugyezunguluza yoonayoona.

²⁷ Ghansi w'omugo ogwo, ku ndhuyi dhaayo eibiri edhiringagaine, yaakoleragho emikonda egya zaabu emyekulungirivu oti mpeta. Egyo nga n'egibitamu emiti egy'okubbeedesanga alutaari eyo.

²⁸ Era yaabaadhiraku emiti mu muti ogwetebwa akasia. Emiti egyo yaagirimbyaku zaabu gyonagyona okugyezunguluza.

Omuzigo ogusiigibwa n'obubbaani obuwunha akawoowo

²⁹ Era yaakola omuzigo ogusiigibwa omutukuvu, n'obubbaani obuwunha akawoowo obusinga bulungi, bweyatabula ng'oti ni bwe batabula ebizigo eby'okwesiiga.