Okuvaayo 36 - Baibuli Ekibono kya Katonda 2014

¹ “Bezalelo, ni Oholiabu, na kiisi muntu yeenayeena aghanga okukola, Musengwa Katonda b'aghaire obusobozi n'okutegeera ebyetaagisa mu kukola Weema entukuvu, baidha kukola ebyo byonabyona nga Musengwa Katonda bweyalagira.”

Abantu baghaayo ebirabo kamaala

² Agho Musa yaayeta Bezalelo, ni Oholiabu, na kiisi muntu yeenayeena aghanga okukola, Musengwa Katonda ye yagha obusobozi, era eyawulira mu mwoyo gwe ng'alumirwa Weema ey'Okwagaananirangamu ni Musengwa Katonda.

³ Bano baidha ye Musa yaabagha ebintu Abaisiraeli bye baaghaayo beene nga benda, aghazira kukakibwa, bikozesebwe ku Weema eyo. Abantu beeyongeranga buli nkyo okuleetera Musa ebintu bye baaghangayo beene ekyeyendere.

⁴ Agho abantu boonaboona abaali nga bali kukola Weema eyo, baava ku mirimo gyaibwe.

⁵ Baaja baakoba Musa bati: “Abantu bali kuleeta ebintu kamaala inho okusinga ebyo ebyetaagibwa okukola omulimo Musengwa Katonda gwe yatulagira okukola.”

⁶ Kale Musa yaagha ekiragiro kyatuuka ku buli muntu nga kirobera abantu okwongera okuleeta ebirabo era abantu baalekera agho.

⁷ Kuba ebintu bye baali baleese byali bimala okukola omulimo gwonagwona byafiika nagho.

Eweema ey'Okwagaananirangamu ni Musengwa Katonda

⁸ Abantu abasinga kuba na bumanhi mu bakozi boonaboona, n'abaakola Weema ey'Okwagaananirangamu ni Musengwa Katonda. Baagikola mu nsuubo ikumi nga dhaakolebwa mu ngoye empegheevu edhaalukibwa obukalamu edha langi ya bbululu, n'edh'eya nakasooma, n'edh'eya kasaayisaayi. Era baatungiramu ebifaananie eby'ebitonde ebiri n'amaghagha ebyetebwa kerubi, nga bakozesa empiso n'ewuuzi.

⁹ Obuleeyi obw'olusuubo olulala nga buli mita ikumi na ibiri, obugazi bwalwo bwaba mita ibiri, era ng'ensuubo dhoonadhoona dhaagayaga.

¹⁰ Ensuubo eitaanu dhaatungibwa nga dhiyimbiibwa, nga buli lulala luyungiibwa ku lwinaalwo n'eitaanu edhindi dhoona dhaayimbibwa dhityo.

¹¹ Ku buli lusuubo olusembayo ku dhaayimbibwa eitaanu edhisooka, baataaku obukondo bwe baakola mu lugoye lwa langi ya bbululu, ni ku itaanu edhairirira baakola ekintu n'ekirala.

¹² Baata obukondo amakumi ataanu ku lusuubo olusembayo ku itaanu edhaasooka okuyimbwa, n'obundi amakumi ataanu ku itaanu dhire edhindi, olwo bwaba nga bugemagaine mu lunhiriri.

¹³ Agho baakola obuntu amakumi ataanu obugemagania obukondo obw'oluuyi olundi ku bw'oluuyi olundi nga bwa zaabu. Endhuyi dhombi bwe dhaayimbibwa, olwo Weema eyo yaaba ng'efuuse enambirira.

¹⁴ Era baakola ensuubo ikumi na lulala mu ngoye edhaakolebwa mu buviiri obw'embuzi, nga dha kughemba ku Weema eyo.

¹⁵ Buli lusuubo lwali nga lugheza mita ikumi na isatu obuleeyi, ate obugazi lwaba mita ibiri, era dhoonadhoona eikumi n'olulala dhaali nga dhaagayaga mu bipimo.

¹⁶ Ensuubo eitaanu dhaatungibwa dhaayimbibwa gha dhonka nga buli olulala luyungibwa ku lwinaalwo, ni dhire edhindi omukaaga dhoona dhaayimbibwa gha dhonka.

¹⁷ Ku mbali okw'olusuubo olusembayo ku itaanu edhaasooka okuyimbibwa, baakoleraku obukondo amakumi ataanu, ni ku mbali okw'olusuubo olusembayo ku mukaaga edhairirira okuyimbibwa, baakoleraku obukondo amakumi ataanu.

¹⁸ Era baakola obuntu obugemagania obukondo obw'oluuyi olundi ku bw'oluuyi olundi nga bwa kyuma kya kikomo, baabuta mu bukondo bule, bwayimba endhuyi dhombi dhaafuuka ekikingiriza ekiramba.

¹⁹ Era baakola ebintu ebighemba ku Weema ey'Okwagaananirangamu ni Musengwa Katonda ebindi bibiri, eky'omunda nga kyakolebwa mu mawu amakunhe ag'entaama enume, ate eky'oku ngulu nga kyakolebwa mu mawu amakunhe ag'ensolo edhindi.

Embaawo edhaakolebwamu Weema ey'Okwagaananirangamu ni Musengwa Katonda

²⁰ Era baakola ebikondo eby'Eweema mu muti ogwetebwa akasia.

²¹ Obuleeyi obwa buli kikondo bwali emita ina, ate obugazi bwaba ekitundu kya mita.

²² Buli kikondo kyaliku ebintu ebisongovu bibiri eby'okukiyungisa ku kiinaakyo, era ebikondo byonabyona eby'Eweema eyo batyo bwe baabikola.

²³ Baakola ebikondo amakumi abiri byaba ku luuyi olw'omukono omusaadha olw'e buvandhuba olw'Eweema.

²⁴ Era ebikondo ebyo baabikolera ebikolo amakumi ana ebya feeza nga kwe binaayemereranga. Nga buli kikondo kiri n'ebikolo bibiri ebirimu ebituli omwingira ebintu bire ebibiri ebisongovu eby'ekikondo ekyo.

²⁵ Baakola ebikondo amakumi abiri byaba ku luuyi olw'omukono omugooda olw'e buvandhuba olw'Eweema.

²⁶ Era baabikolera ebikolo amakumi ana ebya feeza. Nga buli kikondo kiri n'ebikolo bibiri ebirimu ebituli omwingira ebintu bire ebisongovu eby'ekikondo ekyo.

²⁷ Einhuma w'Eweema ku luuyi olw'e bugwandhuba, baakolerayo ebikondo mukaaga.

²⁸ Mu nsonda eibiri edh'einhuma y'Eweema baakolerayo ekikondo kirala kirala.

²⁹ Ebikondo ebyo byombi baabikola nga biyimbiibwa okuva ghansi okutuukira irala ghaigulu ku mutwe aghali omukonda. Ebikondo ebyo byombi ebikola ensonda, bityo bwe byakolebwa.

³⁰ Kale, baakola ebikondo munaana n'ebikolo byabyo ikumi na mukaaga ebya feeza, nga buli kikondo kyemereire ku bikolo bibiri.

³¹ Era baabaadha embaawo edhikiikamu mu muti ogwetebwa akasia, ng'eitaanu dha kugemagania ebikondo eby'oluuyi olundi olw'Eweema.

³² N'edhindi eitaanu nga dha kugemagania bikondo eby'oluuyi olundi olw'Eweema eyo, n'edhindi eitaanu nga dha kugemagania bikondo eby'oluuyi olw'einhuma olw'e bugwandhuba olw'Eweema eyo.

³³ Era baabaadhayo olubaawo olukiikamu olubita ghagati agha buli kikondo, lwaba lulambirira nga lumalaku oluuyi lwonalwona olw'Eweema.

³⁴ Ebikondo ebyo, baabirimbyaku zaabu byonabyona okubyezunguluza, era baabikoleraku n'emikonda egya zaabu egibitamu embaawo dhire edhikiikamu. Embaawo edho dhoona baadhirimbyaku zaabu dhoonadhoona okudheezunguluza.

Olutimbe olwawula Ekifo Ekitukuvu Einho ku Kifo Ekitukuvu

³⁵ Era baakolayo olutimbe, mu ngoye edha langi ya bbululu, n'edh'eya nakasooma, n'edh'eya kasaayisaayi, ni mu ngoye empegheevu. Era baalutungiramu ebifaananie eby'ebitonde ebiri n'amaghagha ebyetebwa kerubi nga bakozesa empiso n'ewuuzi.

³⁶ Olutimbe olwo baalukolera empango ina edh'omuti ogwetebwa akasia, era baadhirimbyaku zaabu dhoonadhoona okudheezunguluza. Baakola obusumaali bwa zaabu obw'okusibya olutimbe olwo ku mpango, era baakolera empango edho ebikolo bya feeza bina kwe dhaayemereranga.

³⁷ Mu mulyango ogwingira mu Kifo Ekitukuvu Einho, baakoleragho ekintu ekikinzaagho nga bakikola mu lugoye olwa langi ya bbululu, n'olw'eya nakasooma, n'olw'eya kasaayisaayi, ni mu lugoye olughegheevu era baakitungiramu ebimuli nga bakozesa empiso n'ewuuzi.

³⁸ Ekikinzaagho ekyo baakikolera empango itaanu n'obusumaali obw'okukisibisa. Ku mitwe egy'empango edho baalimbyaku zaabu. Era baakoleraku emige nga gya zaabu, aye ebikolo byadho baabikola nga bya kyuma kya kikomo.