Okuvaayo 35 - Baibuli Ekibono kya Katonda 2014

Amateeka agagema ku Sabbato

¹ Agho Musa yaayeta Abaisiraeli boonaboona beesololeza gh'ali. Yaabakoba ati: “Bino n'ebintu Musengwa Katonda by'abalagiire okukola:

² Emirimo giidha kukolebwanga mu nnaku mukaaga, aye olunaku olwomusanvu, ni Sabbato, lunaku lwa Musengwa Katonda lwa kuwuumula era lutukuvu. Omuntu yeenayeena anaakolanga omulimo gwonagwona ku Sabbato aidha kwitibwanga.

³ Waire okukuma obw'omuliro mu maka gaimwe ku Sabbato, mutakikolanga.”

Ebintu eby'okughaayo ye Musengwa Katonda

⁴ Musa yaakoba Abaisiraeli boonaboona ati: “Kino Musengwa Katonda ky'abalagiire.

⁵ Buli muntu atoole ekigheebwayo akighe Musengwa Katonda. Kiisi ali n'omwoyo omugabi aleetere Musengwa Katonda ekigheebwayo, nga ku bino: zaabu, feeza, n'ekyuma eky'ekikomo.

⁶ Oba aleete ku bino: engoye dha langi ya bbululu, n'edh'eya nakasooma, n'edh'eya kasaayisaayi, n'engoye empegheevu, n'edho edhaakolebwa mu buviiri obw'embuzi.

⁷ Oba aleete ku bino: amawu amakunhe ag'entaama enume, n'amawu amakunhe ag'ensolo edhindi, n'embaawo edhaasalibwa mu muti ogwetebwa akasia.

⁸ Oba aleete ku bino: amafuta ag'entaala, obuwoowo obutabulwa mu muzigo ogw'okusiiga, n'obuwoowo obw'okuniosa.

⁹ Oba aleete ku bino: amabaale ageetebwa onikisi, n'amabaale ag'omughendo agandi agateebwa ku kivaalo eky'obwakabona, ni ku kivaalo kabona ky'avaala mu kifuba.

Ebintu ebikozesebwa mu Weema ey'Okwagaananirangamu ni Musengwa Katonda

¹⁰ “Kiisi ali n'obumanhi obw'okukola, aidhe tukole ebyo Musengwa Katonda bye yalagira.

¹¹ Tukole Weema nga tukozesa bino: ekintu ekigighembaku, n'obuntu obugemagania ekigighembaku ekyo, n'ebikondo byaku, n'embaawo edhikiikamu, n'empango dhaayo, n'ebikolo kwe dheemerera.

¹² Era tukozese bino: Esanduuku ey'Endagaano, n'emiti gyayo egy'okugibbeedesanga, n'ekisandikiza, n'ekintu ekikinzaagho.

¹³ Era tukozese bino: emeeza n'emiti egy'okugibbeedesanga, n'ebikozesebwa byaku byonabyona, n'emigaati egigheebwayo ye Katonda,

¹⁴ n'ekikondo eky'entaala olw'okumuliikirira, n'ebikozesebwa bya ku, n'entaala dhaaku, n'amafuta gaadho.

¹⁵ Era tukozese bino: alutaari ey'okuniokezaaku obubbaani, n'emiti egy'okugibbeedesanga, n'omuzigo ogw'okusiiga, n'obubbaani obuwunha akawoowo, n'ekintu ekikinzaagho mu mulyango ogwingira mu Kifo Ekitukuvu Einho.

¹⁶ Era tukozese bino: alutaari ey'okwokeraku ebigheebwayo, n'ekiibo ekyagirukirwaku eky'ensonda eina, ekiri ng'oti kasengeedho nga kyakolebwa mu kyuma eky'ekikomo, n'emiti egy'okubbeedesanga alutaari eyo, n'ebikozesebwa byaku byonabyona ekyogero n'ekityamo kyakyo.

¹⁷ Era tukozese bino: olugugiriro olwezungulula Weema ey'Okwagaananirangamu ni Musengwa Katonda, n'empango kwe lutimbibwa, n'ebikolo empango edho kwe dheemerera, n'ekintu ekikinzaagho mu mulyango ogw'olugugiriro olwo.

¹⁸ Era tukozese bino: enkondo edhigemerera Weema ey'Okwagaananirangamu ni Musengwa Katonda ku itaka, ghalala n'enkondo edhigemerera olugugiriro ku itaka, n'emigugha gyaku.

¹⁹ Era tukozese bino: ebivaalo ebirungi einho, eby'okugheerezebwamu kabona mu Kifo Ekitukuvu, n'ebivaalo bya Aaroni kabona ebitukuvu, n'ebivaalo ebitukuvu ebya batabane eby'okugheererezangamu nga bakabona.”

Abantu baleeta ebigheebwayo byaibwe

²⁰ Agho abantu boonaboona baagolola, baava mu maiso ga Musa.

²¹ Buli muntu eyawulira mu mwoyo gwe ng'alumirwa Weema ey'Okwagaananirangamu ni Musengwa Katonda, yaidha ng'aleese ekigheebwayo ye Musengwa Katonda, kikozesebwe mu kukola Weema eyo, n'ebikozesebwa mu Weema omwo, era n'ebivaalo ebitukuvu.

²² Abasaadha n'abakazi baidha beene nga benda aghazira kukakibwa, baaleeta ebintu bya zaabu bye batunga ku ngoye, empeta edh'oku matu, ebinhere eby'omu nkoto, n'ebyamadholobera ebindi ebya zaabu. Buli muntu eyaghangayo, ng'aghaayo ekintu kya zaabu eri Musengwa Katonda.

²³ Buli muntu yaleeta kye yali nakyo: engoye edha langi ya bbululu, n'edh'eya nakasooma, n'edh'eya kasaayisaayi, n'empegheevu, n'edhaakolebwa mu buviiri obw'embuzi, n'amawu amakunhe ag'entaama, n'amawu amakunhe ag'ensolo edhindi.

²⁴ Buli muntu eyali aghanga okughaayo feeza oba ekyuma eky'ekikomo, yaakireeta ng'ekigheebwayo ye Musengwa Katonda. Era buli muntu eyali n'olubaawo okuva mu muti ogwetebwa akasia, yaaluleeta lukole omulimo gwonagwona ogubaagho.

²⁵ Abakazi boonaboona abaali baidhi okulanga ewuuzi n'engalo baalanga ewuuzi edha bbululu, n'edha nakasooma, n'edha kasaayisaayi, n'edh'engoye empegheevu, baadhireeta.

²⁶ Era abo abaali n'obumanhirivu, baaleeta wuuzi dhe baalanga mu buviiri obw'embuzi.

²⁷ Abakulu ab'ebikunsu mu Isiraeli baaleeta amabaale ag'omughendo ageetebwa onikisi ag'okuta ku kivaalo eky'obwakabona, n'ag'okutaanha ku kivaalo eky'omu kifuba.

²⁸ Era baaleeta n'amafuta ag'entaala, n'obuwoowo obuteebwa mu muzigo ogw'okusiiga, era n'obuteebwa mu bubbaani okubuwunhisa akawoowo.

²⁹ Abaisiraeli boonaboona, abasaadha n'abakazi, abaawulira mu myoyo gyaibwe nga balumirwa omulimo Musengwa Katonda gwe yalagira ng'abita mu Musa, baaleeta ebigheebwayo ebyo beene nga benda aghazira kukakibwa, baabighaayo ye Musengwa Katonda.

Abaakola ebintu eby'omu Weema ey'Okwagaananirangamu ni Musengwa Katonda

³⁰ Agho Musa yaakobera Abaisiraeli ati: “Musengwa Katonda yalonda Bezalelo mutabane wa Uri, era mwidhukulu wa Hura, era nga wa mu kika kya Yuda.

³¹ Katonda yaatoola ku maani ge ye mwene yaagamugha, era yaamugha obusobozi, n'amagezi, n'obumanhi, era yaamugha okutetenkania n'okuyiiya.

³² Katonda oyo yayenda Bezalelo ayiiye ng'akozesa amagezi amangi einho, akole ebintu ebitali bya nsambo ndala mu zaabu, mu feeza, ni mu byuma eby'ekikomo.

³³ Era abaadhe amabaale ag'omughendo ag'okutaanha, era asale obuntu obudholiga ku mbaawo, era atetenkanie nga bw'ayiiya mu nsambo kamaala.

³⁴ Era Katonda oyo yaagha Bezalelo oyo ghalala ni Oholiabu omwoyo ogwenda okugalagira abantu abandi okutetenkania n'okuyiiya kwaibwe okwo. Oholiabu oyo, ni mutabane wa Ahisamaka ow'ekika ekya Dani.

³⁵ Musengwa Katonda yaabaidhuza amagezi, nga basobola okukola kiisi mulimo gwonagwona: ka gube ogw'omubaadhi ow'amabaale ag'omughendo, oba ogw'omuyiiya, oba ogw'omulusi ow'engoye, oba ogw'adholiga engoye ng'akozesa n'empiso n'ewuuzi ka dhibe dha bbululu, oba dha nakasooma, oba dha ngoye mpegheevu. Era baasobola okukola kiisi mulimo ogwetaagisa okutetenkania.