Okuvaayo 33 - Baibuli Ekibono kya Katonda 2014

Musengwa Katonda alagira Abaisiraeli okuja mu nsi ye yabasuubiza

¹ Agho Musengwa Katonda yaakoba Musa ati: “Muve ghano, iwe n'abantu be watoola mu Misiri, muje mu nsi ye nalayira okugha Aburahamu, ni Isaaka, ni Yakobo, n'abaana baibwe, n'abaidhukulu.

² Ndidha kutuma malaika emberi waimwe, era ndidha kubinga mu nsi eyo Abakanaani, n'Abamori, n'Abahitti, n'Abaperizzi, n'Abahivi, n'Abayebusi.

³ Muje mu nsi engimu era erimu ebirungi kamaala. Aye nze tiidha kujiira ghalala n'imwe, kuba nsobola okubaita naabamaliragho mu ngira, olw'okuba muli ba mpwitu inho.”

Musengwa Katonda alobera ebyamadholobera

⁴ Abantu bwe baawulira amawulire ago amabi baatoolera okulira, era baaloba kuvaala byamadholobera byaibwe;

⁵ kuba Musengwa Katonda yali amaze okukoba Musa akobe abantu ati: “Muli ba mpwitu inho, era bwe njiira aghalala n'imwe, ni bwekaba akaseera akatono kati, mbaita naabamalagho. Buti ni mutoolemu ebyamadholobera byaimwe, nze mwene ndidha kumanha eky'okubakolera.”

⁶ Kale abantu baava agho ku lusozi Sinai, beeyongerayo nga batoiremu ebyamadholobera byaibwe, era tibairayo kubivaala.

Eweema ey'Okwagaananirangamu ni Musengwa Katonda

⁷ Mperaano buli Abaisiraeli ghe baasimbanga weema dhaibwe, nga Musa ataagho eweema nga yeeswireku akata okuva agho. Eweema eyo ng'agyeta Eweema ey'Okwagaananirangamu ni Musengwa Katonda. Era kiisi eyayendanga okwebuuza ku Musengwa Katonda ng'aja ye Weema eyo.

⁸ Era kiisi Musa lwe yajanga mu Weema eyo, ng'abantu boonaboona basituka, buli muntu yaayemerera ku mulyango ogw'eweema ye yaalingirira Musa okutuusa lwe yangiranga mu Weema eyo.

⁹ Musa bweyangiranga mu Weema eyo, ng'ekire ekiri ng'oti mpango kiika, nga kyesimba gha mulyango ogw'Eweema eyo, nga Musengwa Katonda ayogera ni Musa.

¹⁰ Era abantu bwe baabonanga ekire ekiri ng'oti mpango nga kyesimbye gha mulyango ogw'Eweema eyo, ng'abantu boonaboona basituka, nga basinza nga buli muntu ali gha mulyango ogw'eweema ye.

¹¹ Atyo Musengwa Katonda bweyayogeranga ni Musa maiso ku maiso, ng'oti n'omuntu bw'ayogera ni mukagwa we. Musa bweyamalanga, yairanga agho Abaisiraeli ghe baalinga nga basimbye weema dhaibwe, aye omugheereza we omwisuka ye baayetanga Yoshua, mutabane wa Nuni, tiyavanga mu Weema eyo.

Musengwa Katonda asuubiza okubanga n'abantu be

¹² Musa yaakoba ati: “Wo Musengwa Katonda, wankoba okukulembera abantu bano, aye tiwankobera muntu y'oja kuntuma naye. Era wankoba oti ondidhi bukalamu, era oti osiima bye nkola.

¹³ Buti ni kye nkusaba, nga bw'osiima bye nkola, ndholeka ensambo ye mbe neebiseemu, nsobole okukumanha obukalamu era nhongere okukusiimya. Wo Musengwa Katonda, idhukira ng'abantu bano niiwe mwene owabeerondera babe abantu bo.”

¹⁴ Musengwa Katonda yaamwiramu ati: “Kale nze ndidha kuja n'iwe era ndidha kukuganha okuwuumula”

¹⁵ Musa, era yaakoba Musengwa Katonda ati: “Bw'oba nga tooje ninze tuleke tusigale ghano,

¹⁶ kuba abantu balimanha batya ng'osiima nze ni beene bye tukola? Bw'oja n'ife, olwo oidha kwoleka nga ghaligho endhawulo ghagati gha ife n'abantu abandi boonaboona ab'oku nsi.”

¹⁷ Agho Musengwa Katonda yaakoba Musa ati: “Ekyo kyenekyene ky'okobye ndidha kukikola, kuba nkwidhi bukalamu inho era nsiima by'okola.”

¹⁸ Musa yaamukoba ati: “Nkusaba mbone ekitiisa kyo.”

¹⁹ Musengwa Katonda yaamwiramu ati: “Ndidha kubisa obulungi bwange bwonabwona mu maiso go, era ndhatule eriina lyange nze Musengwa Katonda ng'owulira. Ndidha kugemerwa ekivunika oyo ye nhenda okugemerwa ekivunika, era nsaasire oyo ye nhenda okusaasira.

²⁰ Aye toidha kumbona mu maiso, kuba omuntu tasobola kumbona mu maiso n'asigala nga mulamu.

²¹ Aye ghano kumpi ninze ghaligho ekifo gh'oghanga okwemerera, ku ibaale.

²² Kale, ekitiisa kyange bwe kinaaba kibitagho, ndidha kukuta mu lwatika olw'eibaale, era nkughembeku n'engalo dhange okutuusa nga mmaze okubitagho.

²³ Bwe nnaamala okubitagho ndidha kukughembulaku engalo dhange obone omugongo gwange, aye tombone mu maiso.”