Okuvaayo 32 - Baibuli Ekibono kya Katonda 2014

Abantu basinza ekifaananie eky'ente

¹ Abantu bwe baabona nga Musa alwire okuniinuka okuva ku lusozi, beesoloza baidha ye Aaroni, baamukoba bati: “Situkiramu otukolere bakatonda abanaatukulemberamu. Ono omusaadha Musa eyatutoola mu Misiri titwidhi kyamutuukaku.”

² Agho Aaroni n'okubakoba ati: “Kale mutoole ku matu ga bakazi baimwe, ni ku ga batabane baimwe, ni ku ga baghala baimwe, empeta edha zaabu mudhindeetere.”

³ Kale abantu boonaboona beetoolaku empeta dha zaabu dhe baali nadho ku matu gaibwe, baadhigheereza Aaroni.

⁴ Aaroni yaadhitoola, yaadhisaanuusa, era yaakozesa akatiba yaabakoleramu ekifaananie eky'ente ento enume. Agho baakoba bati: “Isiraeli, ono ni katonda wo eyakutoola mu Misiri!”

⁵ Aaroni bweyamala, yaakola alutaari agho gha mberi agh'ekifaananie ekyo, era yaakola ekirangiriro ati: “Enkyo twidha kuba ku kibinuko eky'okusinza Musengwa Katonda.”

⁶ Era olunaku olwairirira baawuuna baaghaayo ebigheebwayo ebyokebwa, baaleeta n'ebigheebwayo olw'okutabagana. Abantu baatyama baalya era baanhwa, era baatoolera n'okukola eby'ensoni.

Musengwa Katonda asungughala

⁷ Agho Musengwa Katonda yaakoba Musa ati: “Irayo ghansi gh'olusozi era tezaaku, kuba abantu bo be watoola mu Misiri boonooneike beekola ebiswaza.

⁸ Amangu gano baviire ku biragiro bye nabagha. Baasaanuusiiza zaabu, beekolera ekifaananie eky'ente ento enume era baakisinza, baakigha omusengo nga bakoba mbu, ‘Isiraeli, ono ni katonda wo eyakutoola mu Misiri!’

⁹ Nze Musengwa Katonda ndidhi nti abantu bano ba mpwitu inho.

¹⁰ Kale, iwe ndeka obusungu bwange bubaakireku ng'oti muliro mbamalegho. Aye iwe tiidha kukuzikiriza ndidha kukufuulamu eighanga ery'amaani.”

Musa awolereza Abaisiraeli

¹¹ Musa yeeghemba Musengwa Katonda we ati: “Wo Musengwa Katonda, lwaki obusungu bwo bwakira ku bantu bo obwaga agho ng'oti muliro? Mbo abantu bo be watoola mu Misiri n'amaani go agataloodheka era n'obukumu, waabasungughalira otyo?

¹² Abamisiri baidha kukoba bati watoola abantu bo mu Misiri, ng'oli n'ekigendererwa ekibi, era ng'ekigendererwa ekyo kya ku baitira mu biketezo bino eby'ensozi, n'okubazikiriza baweere irala ku nsi. Nkusaba okyuse obusungu bwo obukambwe, oleke kukola bantu bo ekyo ky'otegeike okubakola.

¹³ Idhukira abagheereza bo, Aburahamu, ni Isaaka, ni Yakobo, be weelayirira iwe mwene. Wabakoba oti oidha kubazaalagania babe n'abaidhukulu kamaala ng'oti ni muunienie edhiri ku igulu. Era waabasuubiza oti ensi ye wabagha eja kuba yaibwe n'abaana baibwe n'abaidhukulu, ebyanda n'ebyanda.”

¹⁴ Kale Musengwa Katonda yaakyusa ekidhuubo kye, yaaleka kubazikiriza nga bweyali abeesoomeire.

Musa amenha ebibaadho eby'amabaale

¹⁵ Agho Musa yaakyusa yaaserengeta ng'ava ku lusozi, yaika n'ebibaadho ebibiri eby'amabaale ng'abigemye mu ngalo dhe. Ebibaadho ebyo byali nga bighandiikiibwaku amateeka ku ndhuyi dhaabyo dhombi.

¹⁶ Katonda mwene n'eyabikola era n'eyabighandiikamu amateeka.

¹⁷ Yoshua yaawulira amamiro ag'abantu nga bali kwasiikana. Agho yaakoba Musa ati: “Ndi kuwulira amamiro ag'abantu abali kulwana nga gava mu Baisiraeli.”

¹⁸ Aye Musa yaamwiramu ati: “Busa, okwo ti kwasiikana lwa kughangula oba kulira kwa kughangulwa. Aye mamiro ga bantu bali kwemba nze ge ndi kuwulira.”

¹⁹ Agho Musa bweyaseeta okumpi n'Abaisiraeli ghe baasimba weema dhaibwe, yaabona ekifaananie eky'ente ento enume, n'abantu nga bali kukina. Agho obusungu obw'amaani bwamusituka, yaasuula ebibaadho eby'amabaale bye yali agemye mu ngalo, byamenheka nga yaakatuuka agho olusozi ghe luweeraku.

²⁰ Yaatoola ekifaananie ekyo eky'ente ento enume yaakisaanuusa, yaakisa kyafuuka nsaano. Ensaano eno yaagimansira ku maadhi, yaamala yaaganhwesa Abaisiraeli boonaboona.

Aaroni yeewozaaku

²¹ Musa yaabuuza Aaroni ati: “Bwenebwene abantu bano baakukola ki memale obaleeteku ekibi ekikologho ekyo?”

²² Aaroni yaamwiramu ati: “Musengwa Katonda wange, otansungughalira bujiiririire, kuba oidhi bukalamu ng'abantu bano bwe benda einho okwonoona.

²³ Kale beene n'abaakoba bati, ‘Tukolere bakatonda abanaatukulemberamu. Ono omusaadha Musa eyatutoola mu Misiri, titwidhi kyamutuukaku.’

²⁴ Zeena naabakoba nti, ‘Kale kiisi avaire zaabu amutooleku amuleete.’ Kale bampa zaabu waibwe, naamusuula mu muliro, era ekyavaamu n'ekifaananie ekyo eky'ente ento enume.”

Abalevi batirimbula abantu

²⁵ Musa yaabona ng'abantu bafuuse ng'oti n'ensolo edhikutwire, engeri Aaroni bweyabaleka ni beebisa eyo batyo mu nsambo ebaswaza mu maiso ag'abazigu baibwe.

²⁶ Agho yaayemerera gha mulyango ogwingira mu kifo ghe baasimba weema dhaibwe, yaalangirira ati: “Kiisi ali ku luuyi lwa Musengwa Katonda, aidhe ghano ghe ndi.” Era Abalevi boonaboona beesololeza ghalala agho ghe yali.

²⁷ Agho yaabakoba ati: “Musengwa Katonda wa Isiraeli akoba ati, ‘Buli muntu ageme empiima ye, era aje ng'abitabita mu weema dhoonadhoona okuva ku esooka okutuuka ku esembayo, aje ng'aita oba muganda we, oba mukagwa we, oba muliraanwa we.’ ”

²⁸ Abalevi baakola nga Musa bweyabalagira, era ku lunaku olwo baatirimbula abasaadha oti nkumi isatu.

²⁹ Era Musa yaabakoba ati: “Olwaleero mutukuziibwa okugheereza Musengwa Katonda nga bakabona, olwa buli muntu okwita mutabane ni muganda we. Kale Musengwa Katonda abaghaire enkabi olwaleero luno.”

Musa awolereza Abaisiraeli omukuzi ogwokubiri

³⁰ Enkyo lyaku Musa yaakoba abantu ati: “Mukoze ekibi ekikologho! Aye leka nniine ye Musengwa Katonda ku lusozi oba katyo nnaamwikirizisa okukibasonigha.”

³¹ Kale Musa yairayo ye Musengwa Katonda, yaamukoba ati: “Wo Musengwa Katonda, abantu bo bakoze ekibi ekikologho, beekolera bakatonda mu zaabu!

³² Aye ndi kukusaba obasonighe ekibi kyaibwe ekyo. Bw'oba nga toobasonighe, sasa eriina lyange mu kitabo kyo mw'oghandiika abantu bo.”

³³ Aye Musengwa Katonda yaamwiramu ati: “Eriina ly'oyo ansobiiza n'akola ekibi, lye ndidha okusasa mu kitabo kyange.

³⁴ Aye iwe ja okulembere abantu obatuuse mu kifo ekyo kye nakukoba. Era, bona eno, malaika wange aidha kukukulembera. Aye era ekiseera kiidha kutuuka mbabonereze olw'ekibi kyaibwe ekyo.”

³⁵ Era Musengwa Katonda yasindika ku bantu ekibamba kyabalumya einho, olw'okuba baakoba Aaroni okubakolera ekifaananie eky'ente ento enume.