Okuvaayo 30 - Baibuli Ekibono kya Katonda 2014

Alutaari ey'okuniokezaaku obubbaani

¹ Era Musengwa Katonda yaakoba Musa ati: “Oidha kukola alutaari mu mbaawo edh'omuti ogwetebwa akasia, nga ya kuniokezangaku bubbaani.

² Ng'endhuyi dhaayo eina dhaagayaga obuleeyi sentimita amakumi ana na itaanu n'obugazi sentimita amakumi ana na itaanu. Obugungumavu eidha kuba sentimita kyenda. Oidha kukoleraku ebintu ebiri ng'oti mayiga ga nsolo ku nsonda dhaayo eina. Ebintu ebyo ebiri ng'oti mayiga, ni alutaari, biri n'okuba nga byegemye ghalala nga tibyawukaine.

³ Bw'omala, ku ngulu kwayo kwonakwona, n'okwezunguluza endhuyi dhaayo, ni ku bintu ebyo ebiri ng'oti mayiga, oidha kulimbyaku zaabu omukenenule. Era ogikolereku omugo nga gwona gwa zaabu omukenenule okugyezunguluza yoonayoona.

⁴ Ghansi w'omugo ogwo ku ndhuyi dhaayo eibiri edhiringagaine, oidha kukoleragho emikonda ebiri egya zaabu emyekulungirivu oti mpeta. Gino n'egiidha okubitangamu emiti egy'okubbeedesanga alutaari eyo.

⁵ Agho obaadhireku emiti mu muti ogwetebwa akasia, ng'emiti egyo ogirimbiizaaku zaabu gyonagyona okugyezunguluza.

⁶ Alutaari eyo oidha kugita gha mberi agh'olutimbe oluli gha Sanduuku ey'Endagaano. Era agho gha mberi agh'ekisandikiza ekiri ku Sanduuku ey'Endagaano eyo, ghe nnaayagaanananga n'iwe.

⁷ Ku alutaari okwo Aaroni kw'aidha okuniokezanga obubbaani obw'akawoowo buli ku nkyo ng'ajiire okutegeka entaala.

⁸ Era bw'anaajanga okukunaania entaala olw'eigulo, anaaniosanga kabiri obubbaani obwo. Era bwidha kuniosebwanga mu maiso ga Musengwa Katonda ense n'ense.

⁹ Ku alutaari okwo otaniokezangaku bubbaani obutaikirizibwaku, oba okwokeraku ekigheebwayo ekyokebwa ekitaikirizibwa, oba okugigheeraku ekigheebwayo eky'emere ey'empeke ekitaikirizibwa, oba waire okugigheeraku ekigheebwayo eky'ebyokunhwa ekitaikirizibwa.

¹⁰ alutaari eyo eidha kutukuzibwanga omukuzi mulala buli mwaka, aghazira kulekera ense n'ense. Aaroni aidha kugitukuzanga ng'akozesa omusaayi oguva ku nsolo enaagheebwangayo olw'ebibi, yaaguta ku bintu ebiri ng'oti mayiga ga nsolo ebiri ku alutaari eyo. Alutaari eyo eidha kubanga ntukuvu inho era nga yange nze Musengwa Katonda.”

Okusasula olw'okwenunula

¹¹ Musengwa Katonda yaakoba Musa ati:

¹² “Bw'onaaba ng'oli kubala Abaisiraeli, buli muntu aidha kwesasulira olw'okwenunula eri nze Musengwa Katonda olw'obulamu bwe okubalibwa, alobe kugwibwaku kibamba.

¹³ Buli muntu abalibwa aidha kughaayo ebitundu bya feeza ng'ajiira ku mbalirira entongole ey'omu isinzizo. Buli muntu anaabanga n'okughaayo ekigheebwayo ekyo eri nze Musengwa Katonda.

¹⁴ Buli muntu anaabanga ng'abaliibwa era ng'agheza emyaka amakumi abiri oba okusingagho, aidha kughangayo ekigheebwayo ekyo.

¹⁵ Omukombe taidhanga kugha bitundu bya feeza bingi okusinga eby'embala entongole, n'omwavu taidhanga kugha bitundu bya feeza bitatuuka ku mbala ntongole eyo, nga bali kughaayo ekigheebwayo ekyo eri nze Musengwa Katonda olw'ebibi byaibwe.

¹⁶ Oidha kusoloza feeza oyo okuva ku Baisiraeli, ye baidhanga okughaayo olw'ebibi byaibwe, omukozese mu mirimo egy'omu Weema ey'Okwagaananirangamu ni Musengwa Katonda. Omutango ogwo gwidha kubanga ekiidhukizo mu maiso gange nze Musengwa Katonda eri Abaisiraeli olw'obulamu bwaimwe.”

Ekyogero ekyakolebwa mu kyuma eky'ekikomo

¹⁷ Musengwa Katonda yaakoba Musa ati:

¹⁸ “Kola ekyogero n'ekityamo kyakyo mu kyuma eky'ekikomo, nga kya kunaabirangamu okite ghagati gha Weema ey'Okwagaananirangamu ni Musengwa Katonda ni alutaari, era okiteemu n'amaadhi.

¹⁹ Aaroni ni batabane baidha kukozesanga amaadhi ago, okunaaba mu ngalo ni ku bigere.

²⁰ Bwe banaabanga nga baja mu Weema ey'Okwagaananirangamu ni Musengwa Katonda, oba okuja gha alutaari okukola egy'obwakabona, nga bookya ekigheebwayo eri nze Musengwa Katonda, baidha kunaabanga n'amaadhi balobe kufa.

²¹ Baidha kunaabanga mu ngalo ni ku bigere balobe kufa. Ekyo kiidha kuba kiragiro kye baidha okukuumanga beene, n'abaana, n'abaidhukulu ense n'ense.”

Omuzigo ogusiigibwa

²² Musengwa Katonda yaakoba Musa ati:

²³ “Funayo obuwoowo obusinga bulungi obw'ebika bino: mirra ow'amaadhi agheza obuzito bwa kilo mukaaga, ni sinnamoni awunha obulungi einho agheza obuzito bwa kilo isatu, ni keini awunha obulungi einho, yeena obuzito bwa kilo isatu,

²⁴ ni kassiya azitogha kilo omukaaga. Ebyo byonabyona bipime ng'ojiira ku mbala ey'eisinzizo entongole. Era oteereku elita ina edh'omuzigo ogw'ebibala eby'emiti emyoliva.

²⁵ Obuwoowo obwo oidha kubutabula nga bwe batabula ebizigo eby'okwesiiga ofunemu omuzigo omutukuvu ogusiigibwa.

²⁶ Era omuzigo ogwo ogukozese okutukuza ebintu bino: Eweema ey'Okwagaananirangamu Musengwa Katonda, Esanduuku ey'Endagaano,

²⁷ emeeza n'ebikozesebwa byaku byonabyona, ekikondo eky'entaala n'ebikozesebwa byaku byonabyona, alutaari ey'okuniokezaaku obubbaani,

²⁸ ni alutaari ey'okwokeraku ebigheebwayo ebyokebwa n'ebikozesebwa byaku byonabyona, n'ekyogero ghalala n'ekityamo kyakyo.

²⁹ Otyo bw'oidha okutukuza ebintu ebyo byonabyona bibe nga bitukuvu inho, era ng'ekintu kyonakyona ekibyekontaku kifuuka kitukuvu.

³⁰ Memale olwo osiige Aaroni ni batabane omuzigo obatukuze baghange okumpeereza nga bakabona.

³¹ Era okobere Abaisiraeli boonaboona oti, ‘Ogwo n'ogunaabanga omuzigo omutukuvu ogunaasiigibwanga, abaana n'abaidhukulu gwe banaakozesanga ense n'ense.

³² Mutagusiiganga bantu buntu babuliidho, era mutatabulangayo gundi gugufaanana, kuba muzigo mutukuvu era muli na kugutwalanga nga mutukuvu.

³³ Omuntu yeenayeena atabula omuzigo ogugufaananaku oba agukozesa ku muntu atali kabona, anaabanga takaabalirwa mu bantu bange.’ ”

Obubbaani obuwunha akawoowo

³⁴ Era Musengwa Katonda yaakoba Musa ati: “Funayo obuwoowo obuwooma okuwunhiza bwa bika bisatu, mu buzito obwagayaga. Ebika ebyo ni bino: amasando ag'omuti ogwetebwa sitakite, n'akawoowo akakolebwa mu masonko akeetebwa onika, n'amasando ag'omuti ogwetebwa galubano, ghalala obubbaani obusinga bulungi,

³⁵ Ebyo byonabyona oidha kubitabulira ghalala nga bwe batabula ebizigo eby'okwesiiga, ofunemu obubbaani obuwunha akawoowo. Omwo oidha kutaamu omuunhu era bube butukuvu.

³⁶ Era oidha kutoola ku obwo butonotono obusekule bukalamu, obumwage gha mberi w'Esanduuku ey'Endagaano mu Weema ey'Okwagaananirangamu ni Musengwa Katonda, ghe ndidha okukwagaana. Muli n'okutwala obubbaani obwo ng'ekintu ekitukuvu einho.

³⁷ Entabula eyo mutagikozesanga nga mutabula obubbaani obwaimwe, mugitwale nga ntabula ya bubbaani butukuvu obukozesebwa ku lwange nze Musengwa Katonda.

³⁸ Omuntu yeenayeena alikozesa entabula eyo ng'akola bizigo bya kwesiiga bwesiige, anaabanga takaabalirwa mu bantu bange.”