Okuvaayo 3 - Baibuli Ekibono kya Katonda 2014

Katonda ayeta Musa

¹ Agho Musa bweyali ng'ali kwaya ebyayo bya Yethuro mukoirume we eyamuzaaliranga mukazi we, era nga Yethuro oyo ni kabona w'e Midia, yabitambuza mu irungu e bugwandhuba yaabituusa ni ku lusozi lwa Katonda olwetebwa Horebu.

² Ghano malaika wa Musengwa Katonda yaamubonekera mu lulimi olw'omuliro nga luva mu kisaka ghagati. Musa yaalingirira ekisaka nga kigemye omuliro aye nga tikiri kusiriira.

³ Yaakoba mule ati: “Kino kyewuunhisa! Omuliro gwagema guti ekisaka, aye kyaloba kusiriira! Ka nseete mbone bukalamu.”

⁴ Musengwa Katonda bweyabona nga Musa ali kuseeta, yaamwetera ghagati mu kisaka ekyo ati: “Musa, Musa.” Musa yaavugira ati: “Ndi ghano.”

⁵ Katonda oyo yaamukoba ati: “Otayongera kuseeta. Toolamu engaito dho, kuba gh'oyemereire kifo kitukuvu.”

⁶ Era yeeyongera okumukoba ati: “Ninze Katonda wa lata wo, Katonda wa Aburahamu, Katonda wa Isaaka era Katonda wa Yakobo.” Musa yeeghemba mu maiso ng'ali kutya okulinga ku Katonda.

⁷ Agho Musengwa Katonda yaakoba ati: “Mboine okudaazibwadaazibwa okw'abantu bange abali mu Misiri, era naawulira okulira kwe bandirira nga benda okubawonia abo Abamisiri ababasalira amakatala. Ndidhi obughafu bwe balimu,

⁸ era n'okwika mbawonie Abamisiri, mbatoole mu nsi eyo, mbatwale mu nsi enene, engimu era erimu ebirungi kamaala ensi omuli buti Abakanaani, Abahitti, Abamori, Abaperizzi, Abahivi, n'Abayebusi.

⁹ Bwenebwene okulira okw'abantu bange Abaisiraeli kuntuuseeku, era naabona n'ensambo Abamisiri ye babatuntuzaamu.

¹⁰ Ka nkutume ye kyabazinga ow'e Misiri otoole abantu bange abo mu Misiri.”

¹¹ Aye Musa yaakoba Katonda ati: “Katyo nze ninze ani, aja ye kyabazinga ow'e Misiri nti mbu kutoola Baisiraeli mu Misiri?”

¹² Agho Katonda yaamusuubiza ati: “Ndidha kubanga n'iwe, era kano kalikubeera akamanhiso, okwoleka nga ninze nkutumye: bw'olimala okutoola abantu abo mu Misiri, mulinsinziza ku lusozi luno.”

¹³ Aye Musa yaakoba Katonda ati: “Bwe ndituuka ku Baisiraeli ni mbakoba nti, ‘Katonda wa badhaadha baimwe antumye ye muli,’ memale ni bambuuza bati, ‘Eriina lye naani?’ Ndibakoba ntya?”

¹⁴ Katonda yaamwiramu ati: “NDI OYO ALIGHO. Ekyo ky'obe oje okobe Abaisiraeli oti, ‘NDI antumye ye muli.’ ”

¹⁵ Era yaayongera okukoba Musa ati: “Ekyo ky'obe oje okobe Abaisiraeli oti, ‘Musengwa Katonda, Katonda wa badhaadha baimwe, Katonda wa Aburahamu, Katonda wa Isaaka era Katonda wa Yakobo, antumye ye muli’ eryo n'eriina lyange ebyanda n'ebyanda, era ntyo bwe ndidha okwetebwanga ense dhoonadhoona edhiriiragho.

¹⁶ Ja oyete abakulu ab'ebikunsu mu Isiraeli beesoloze ghalala obakobe oti, ‘Musengwa Katonda, Katonda wa badhaadha baimwe, Katonda wa Aburahamu, owa Isaaka era owa Yakobo yambonekera yankoba ati mbalingiriire, naabona bye babakola mu Misiri.

¹⁷ Era nsazeegho nti nja kubatoola mu kudaazibwadaazibwa kwe mulimu mu Misiri mbatwale mu nsi ey'Abakanaani, n'Abahitti, n'Abamori, n'Abaperizzi, n'Abahivi n'Abayebusi ensi engimu era erimu ebirungi kamaala.’

¹⁸ Baidha kwikiriza ky'onaabakoba. Ng'olwo iwe n'abakulu ab'ebikunsu abo muja ye kyabazinga w'e Misiri nga mumukoba muti, ‘Musengwa Katonda, Katonda w'Abaheburayi yatweyolekera era buti tuli kukusaba otuleke tuje mu irungu nga tutambula olugendo olumala enaku eisatu, tugheereyo eyo omusengo eri Musengwa Katonda waife oyo.’

¹⁹ Nkiidhi bukalamu nti kyabazinga ow'e Misiri taidha kubaleka buleke muveeyo, okutoolaku ng'akakiibwa bukakibwe n'amaani agataloodheka.

²⁰ Kale nja kukozesa amaani gange mbonereze Misiri nga ngisindikira ebintu ebitiisa era ebyewuunhisa. Oluvainhuma lw'ebyo kyabazinga alibaleka mwavaayo.

²¹ Era ndidha kuleetera Abamisiri okutya Abaisiraeli, Abaisiraeli abo balobe kuva mu Misiri na ngalo ndhereere.

²² Kiisi mukazi Muisiraeli alisaba muliraanwa we Omumisiri, na kiisi mukazi aliba ng'asula mu ndhu eyo, baamugha ebintu ebyakolebwa mu feeza, ni mu zaabu, era n'ebivaalo. Ebintu ebyo mulibitwika batabane baimwe ni baghala baimwe. Mu nsambo ng'oti n'eyo, mulitwala eby'obukombe eby'Abamisiri mu magezi.”