Okuvaayo 29 - Baibuli Ekibono kya Katonda 2014

Okwawula bakabona

¹ “Buti kino ky'oja okubakolaku mu kubaawula, olwo bampeereze nga bakabona. Funayo ente enume ento n'entaama enume ibiri, nga dhiziraku kikyamu kyonakyona

² Ofuneyo emigaati egitazimbulukusiibwa, nga gya bika bisatu bino: eminene egitabwirwamu omuzigo, n'egindi egiziramu muzigo, n'emitono egisiigiibwaku omuzigo. Era nga mugifumbye mu buwunga obuseereibwa obukalamu.

³ Oidha kugita mu kiibo kirala ogindeetere ghalala n'ente ere enume era n'entaama dhire enume eibiri.

⁴ Agho oleete Aaroni ni batabane gha mulyango ogw'Eweema ey'Okwagaananirangamu ni Musengwa Katonda, obanaaze n'amaadhi.

⁵ Era ovaaze Aaroni ebivaalo bino: ekivaalo ekidholige n'empiso n'ewuuzi, ekanzu enaateebwangaku ekivaalo eky'obwakabona, oizeeku ekivaalo eky'obwakabona kyene, n'ekivaalo eky'omu kifuba, era omusibe olusibiro olw'omu nkende olw'oku kivaalo eky'obwakabona olwalukibwa obukalamu.

⁶ Oidha kumusiba ekitambaala ku mutwe era ote engule entukuvu ku kitambaala ekyo.

⁷ Bw'omala oidha kuleeta omuzigo ogusiigibwa ogumufuke ku mutwe omutukuze.

⁸ “Ng'omaze oyo oidha kuleeta batabane obavaaze ebivaalo ebidholige n'empiso n'ewuuzi,

⁹ obasibe enkoma mu nkende era obavaaze n'enkuufiira ku mitwe. Otyo bw'oidha okwawula Aaroni ni batabane babe bakabona. Era obwakabona bwidha kubanga bwaibwe olw'ekiragiro ekitaja kuvaagho.

Okughaayo ente ng'omusengo

¹⁰ “Bw'omala oidha kuleeta ente ere enume emberi ow'Eweema ey'Okwagaananirangamu ni Musengwa Katonda, Aaroni ni batabane bate emikono gyaibwe ku mutwe gwayo.

¹¹ Memale ogiitire agho ku mulyango ogw'Eweema ey'Okwagaananirangamu Musengwa Katonda mu maiso ga Musengwa Katonda.

¹² Oidha kutoola ogundi ku musaayi ogw'ente eyo ogusiige ku bintu ebiri ng'oti mayiga ga nsolo ebiri ku alutaari, ng'okozesa olwala lwo. Omusaayi ogunaaba gusigairegho, oidha kugufuka ku ntobo y'alutaari.

¹³ Amasavu goonagoona agali ku byenda, n'ekitundu ekisinga obulungi ku ini, n'ensigo dhombi ghalala n'amasavu agadhiriku, oidha kubyokera ku alutaari ng'ekigheebwayo ye ndi.

¹⁴ Aye emamba ey'ente eyo n'oluwu lwaku era n'obusa, oidha kubyokya omuliro mu kifo aghazira weema dha bantu, ng'ekigheebwayo ekyokebwa olw'ebibi.

Okughaayo entaama enume esooka ng'omusengo

¹⁵ “Bw'omala ekyo, oidha kuleeta entaama enume esooka, Aaroni ni batabane bagiteeku emikono gyaibwe ku mutwe,

¹⁶ memale ogiite. Olwo otoole omusaayi gwayo ogumansire ku ndhuyi dhoonadhoona edh'alutaari.

¹⁷ Agho oidha kugitematemamu, onaaze ebyenda n'ebibbonge byayo, obite ghalala n'ebitundu byayo ebisigairegho, nga kw'otaire n'omutwe, obyokere ku alutaari.

¹⁸ Ekyo n'ekigheebwayo eri Musengwa Katonda ekyokebwa, ekiri n'akawoowo akamusangaaza.

Okughaayo entaama enume eyokubiri ng'omusengo

¹⁹ “Bw'omala ekyo oidha kuleeta entaama ere enume eyokubiri, Aaroni ni batabane bate emikono gyaibwe ku mutwe gwayo,

²⁰ memale ogiite. Olwo oidha kutoola ku musaayi gwayo ogundi ogusiige ku ntobo ya kutu ow'oku mukono omusaadha ow'Aaroni n'owa buli mutabane, ni ku byala byaibwe ebisaadha eby'oku mikono gyaibwe emisaadha, ni ku bigere byaibwe ebisaadha eby'oku migulu gyaibwe emisaadha. Olwo otoole omusaayi ogunaasigalagho ogumansire ku ndhuyi dhoonadhoona edh'alutaari.

²¹ Agho oidha kutoola ku musaayi ogunaaba ku alutaari, ni ku muzigo ogusiigibwa, byombi obimansire ku Aaroni ni ku bivaalo bye, ni ku batabane ni ku bivaalo byaibwe. Olwo onaaba otukwiza Aaroni n'ebivaalo bye, ni batabane n'ebivaalo byaibwe.

²² “Entaama eyo, n'ekozesebwa mukwawula n'okugemya Aaroni ni batabane be omulimo ogw'obwakabona. Kale oidha kusoloza amasavu gaayo goonagoona, nga n'omuli: amasavu ag'omukira, n'agali ku byenda, n'ekitundu ekisinga bulungi ku ini, n'ensigo dhombi ghalala n'amasavu agadhiriku, n'ekisambi eky'oku mukono omusaadha.

²³ Era oidha kutoola omugaati mulala mulala okuva ku migaati egitazimbulukusiibwa egy'ebika ebisatu bino egiri mu kiibo mu maiso ga Musengwa Katonda: eminene egitabwirwamu omuzigo, n'egindi egiziramu muzigo, n'emitono egisiigiibwaku omuzigo.

²⁴ Ebyo byonabyona, oidha kubita mu ngalo dha Aaroni n'edha batabane, babiwuube bibe ekigheebwayo eri nze Musengwa Katonda nga biwuubibwa.

²⁵ Agho obibatoole mu ngalo obyokere ku alutaari ng'oyongereza ku kigheebwayo ekyokebwa ekinaaba kiriku. Akawoowo akava ku kigheebwayo ekyo ekyokebwa kasangaaza nze Musengwa Katonda.

²⁶ “Bw'omala oidha kutoola akafumito ak'entaama eyo enume egheebwayo olw'okwawulibwa kwa Aaroni, ogiwuube ebe ekigheebwayo ye ndi nga kiwuubibwa. Ekitundu ekyo eky'ensolo n'ogunaabanga omugabo gwo.

Bakabona abaliiririra

²⁷ “Era ku ntaama enume eyo egheebwayo olw'okwawulibwa kw'Aaroni ni batabane, oidha kutukuzaaku akafumito kaayo, n'ekisambi kyayo, byombi bibe ekigheebwayo nga kiwuubibwa.

²⁸ Buli Baisiraeli lwe banaaleetanga akafumito n'ekisambi ng'ekigheebwayo olw'okutabagana, ebintu ebyo byombi binaateekwanga okuba ebya Aaroni ni batabane lubeerera. Ebintu ebyo n'ekigheebwayo abantu kye bampa nze Musengwa Katonda.

²⁹ “Ebivaalo bya Aaroni eby'obwakabona biidha kugheebwanga mutabane anaamusikiranga, era oyo by'anaavaalanga nga bamusiiga omuzigo olw'okumwawula.

³⁰ Mutabane oyo aidha kufuukanga kabona mu kifo kye, aidha kuvaalanga ebivaalo ebyo okumala entangama ya nnaku musanvu ng'aidhie mu Weema ey'Okwagaananirangamu ni Musengwa Katonda okukola emirimo egy'obwakabona mu Kifo Ekitukuvu.

Eby'okulya ebigheebwayo ng'omusengo

³¹ “Agho oidha kutoola emamba ey'entaama enume egheebwayo olw'okwawula Aaroni, ogitogokeze mu maadhi mu Kifo Ekitukuvu.

³² Bw'eya, oidha kugigha Aaroni ni batabane bagirye n'emigaati eginaaba gisigaire mu kiibo, era nga bagiriira gha mulyango ogw'Eweema ey'Okwagaananirangamu ni Musengwa Katonda.

³³ Baidha kulyanga ebintu ebyo ebinaaba bigheereibwayo ng'omusengo olw'ebibi byaibwe ku mukolo ogw'okubaawula. Era atali kabona atabiryangaku, kuba bitukuvu.

³⁴ Era bweghabaagho ku mamba eyo oba ku migaati egyo ebiba nga tibiriiriibwa ni bisigalagho okutuusa enkyo lyaku, tibiirangayo kuliibwa, mubyokyanga bwa muliro kuba bitukuvu.

Enaku omusanvu edh'emikolo

³⁵ “Oidha kukola omukolo ogw'okwawula Aaroni ni batabane, ogwidha okutwala enaku omusanvu, ng'ojiira ku ebyo byonabyona bye nkulagiire.

³⁶ Buli lunaku mu nnaku edho omusanvu, oidha kughangayo ente enume ng'ekigheebwayo olw'ebibi. Era ogheeyo ekigheebwayo olw'okutukuza alutaari, olwo ogisiige omuzigo olw'okugitukuza.

³⁷ Enaku omusanvu edho oidha kughangayo ekigheebwayo olw'ebibi okutukuza alutaari, olwo ebe ng'eidhwire obutukuvu ng'ekintu kyonakyona ekigyekontaku kifuuka kitukuvu.

Ebigheebwayo ebya buli lunaku

³⁸ “Buli lunaku oidha kugheerangayo ku alutaari okwo entaama ento ibiri, edh'omwaka omulala omulala.

³⁹ Entaama eyindi oidha kugighangayo enkyo, ate eyindi ogighengayo eigulo.

⁴⁰ Bw'oghaayo entaama esooka, oghaayo ni kilo ey'engaano eseereibwa obukalamu ng'etabwirwamu lita ey'omuzigo omukenenule ogukamwirwa mu bibala eby'emiti emyoliva ebisekwirwa, waateeraku ni lita ey'omwenge ogw'emizabbibu ng'ekigheebwayo eky'ebyokunhwa.

⁴¹ Ere entaama eyindi y'oli n'okughaayo olw'eigulo, oidha kugighaayo n'ebintu bire ebisatu by'onaaba ng'ogheereire ku ere ey'enkyo: engaano, omuzigo n'omwenge ogw'emizabbibu era mu bipimo nga bire eby'ey'enkyo. Ekyo n'ekigheebwayo eri nze Musengwa Katonda ekyokebwa ekiri n'akawoowo akansangaaza.

⁴² Buliidho mwidha kughangayo ekigheebwayo ekyo ekyokebwa n'omuliro ebyanda n'ebyanda. Mwidha kukigheerangayo ku mulyango ogw'Eweema ey'Okwagaananirangamu ni Musengwa Katonda, ghe naayagaanananga n'abantu bange era ni ndhogera n'iwe.

⁴³ Mu kifo ekyo mwe ndidha okwagaanananga n'Abaisiraeli boonaboona, era ekitiisa kyange kiidha kukifuulanga kitukuvu.

⁴⁴ Ndidha kutukuza alutaari n'Eweema ey'Okwagaananirangamu, era ntukuze ni Aaroni ni batabane be, bampeerezenga nga bakabona.

⁴⁵ Era nnaabanga mu bantu bange Abaisiraeli, era nnaabanga Katonda waibwe.

⁴⁶ Baidha kukitegeera nga ninze Musengwa Katonda waibwe eyabatoola mu Misiri, mbabengamu. Ninze Musengwa Katonda waibwe.”