Okuvaayo 28 - Baibuli Ekibono kya Katonda 2014

Ebivaalo eby'obwakabona

¹ Agho Musengwa Katonda yaalagira Musa ati: “Mu bantu boonaboona Abaisiraeli oidha kulondamu Aaroni muganda wo, ni batabane, Nadabu, ni Abihu, ni Eleazari, ni Ithamari, obaawule bampeereze nga bakabona.

² Era oidha kukolera muganda wo oyo Aaroni ebivaalo ebiidhwire obutukuvu ebimugheesa ekitiisa, era ni bimubonesa obulungi.

³ Oidha kwogera n'abantu abasobola okukola ekyo, abantu be nagha amagezi n'obumanhi, bamukolere ebivaalo ayawulibwe ankolere omulimo ogw'obwakabona.

⁴ Ebivaalo bye babe bakole ni bino: eky'omu kifuba, eky'obwakabona, ekanzu, ekivaalo ekidholige n'empiso n'ewuuzi, ekitambaala eky'oku mutwe, n'olukoma. Baidha kukolera muganda wo oyo Aaroni ni batabane ebivaalo ebitukuvu bampeereze nga bakabona.

⁵ Abaja okukola ebivaalo bali n'okukozesa engoye edha langi ya zaabu, n'edh'eya bbululu, n'edh'eya nakasooma, n'edh'eya kasaayisaayi, era n'engoye empegheevu.

Ekivaalo eky'obwakabona

⁶ “Ekivaalo eky'obwakabona baidha kukikola mu ngoye edha langi ya zaabu, n'edh'eya bbululu, n'edh'eya nakasooma, n'edh'eya kasaayisaayi, era n'engoye empegheevu, nga bakidholiga n'empiso n'ewuuzi.

⁷ Kiri n'okubaaku ensibiro edhikisiba ku mabega.

⁸ Era kiri n'okubaaku olusibiro lwaku olw'omu nkende, nga lwalukibwa bukalamu era nga lwatungibwa ku kivaalo ekyo eky'obwakabona, era nga lwakolebwa mu ngoye ndala edho edha langi ya zaabu, n'edh'eya bbululu, n'edh'eya nakasooma, n'edh'eya kasaayisaayi, era n'engoye empegheevu.

⁹ Oidha kufunayo ebibaadho bibiri eby'eibaale ery'omughendo eryetebwa onikisi, oghandiikeku amaina ag'abaana ba Yakobo ng'okozesa ekyuma ekisongovu.

¹⁰ Amaina ag'abaana omukaaga oidha kugaghandiika ku kibaadho ekindi, n'omukaaga ag'abandi ku kindi ng'ojiira ku bwe bairaganwaku mu kuzaalibwa.

¹¹ Oidha kughandiika amaina ag'abaana ba Yakobo ku bibaadho ebyo ebibiri eby'eibaale, ng'oti n'omubaadhi ow'amabaale ag'omughendo bw'asala obumanhiso. Bw'omala obiteeku emigo egya zaabu,

¹² era obite ku nsibiro edhisiba ekivaalo ekyo eky'obwakabona ku mabega, dhibe eky'okwidhusa eri Abaisiraeli. Mu nsambo eyo Aaroni aidha kubanga n'amaina gaibwe ku mabega ge mu maiso ga Musengwa Katonda ng'ekiidhukizo.

¹³ Era oidha kukolayo emigo egindi ebiri nga gya zaabu,

¹⁴ n'endhegere ibiri edha zaabu omukenenule, ng'odhiruse ng'oti migugha. Olwo oyunge endhegere edho ku migo gire.”

Ekivaalo eky'omu kifuba

¹⁵ Agho Musengwa Katonda yaalagira Musa ati: “Era oidha kukola ekivaalo eky'omu kifuba Omukulu wa Bakabona ky'anaakozesanga okumanha Katonda ky'ayenda. Oidha kukikola mu nsambo n'endala ng'oti n'ekivaalo eky'obwakabona, ng'okozesa engoye edha langi ya zaabu, n'edh'eya bbululu, n'edh'eya nakasooma, n'edh'eya kasaayisaayi, n'engoye empegheevu.

¹⁶ Kiri n'okuba nga kiwumbe kyamu, endhuyi dhaakyo eina dhaaba nga dhaagayaga, obuleeyi sentimita amakumi abiri na ibiri, n'obugazi sentimita amakumi abiri na ibiri.

¹⁷ Ku kivaalo ekyo oidha kutaanhaku obunhiriri buna obw'amabaale ag'omughendo. Akanhiriri akasooka kaidha kubaaku amabaale ageetebwa, saradiu, ni topazi, ni karabunkule.

¹⁸ Ate akanhiriri akokubiri kabeeku ageetebwa emeraludo, saffiro, ni diamondi.

¹⁹ Ate akanhiriri akokusatu kabeeku ageetebwa yasintha, agate, ni amethisiti.

²⁰ Olwo akokuna kabeeku ageetebwa berulo, onikisi, ni yasipera. Amabaale ago gali n'okubaaku omugo gwa zaabu,

²¹ era nga bwe gali amabaale eikumi n'abiri, buli irala liidha kukolebwa ng'oti n'empeta ekozesebwa ng'akamanhiso, nga lighandiikiibwaku n'ekyuma ekisongovu eriina irala ku maina ag'abaana ba Yakobo, ku lw'ebika byaibwe eikumi n'ebibiri.

²² Ekivaalo eky'omu kifuba kino kyona oidha kukikolera endhegere edha zaabu omukenenule, nga dhirukiibwa ng'oti migugha.

²³ Era oidha kukikoleraku obukondo bubiri nga bwa zaabu, obute ku nsonda dhaakyo eibiri edha ghaigulu.

²⁴ Mu bukondo omwo mw'onaasiba endhegere dhire edha zaabu.

²⁵ Ate endhuyi edhindi edh'endhegere edho odhisibe ku migo gire ebiri, olwo ekivaalo kino eky'omu kifuba kibe nga kiyimbibwa emberi ku nsibiro edhisiba ekivaalo eky'obwakabona ku mabega.

²⁶ Kabiri oidha kukolayo obukondo bubiri obwa zaabu obute ku nsonda eibiri edha ghansi, edh'olukugiro olw'omunda olw'ekivaalo eky'omu kifuba okuliiraana n'ekivaalo eky'obwakabona.

²⁷ Era okoleyo obukondo obundi bubiri obw'obuuma bwa zaabu, obute ku lukugiro olwa ghansi olw'emberi ku nsibiro edhisiba ekivaalo eky'obwakabona ku mabega okumpi n'olusibiro olw'omu nkende olwalukirwa obukalamu ku kivaalo eky'obwakabona.

²⁸ Agho oidha kusiba ghalala obukondo obw'oku kivaalo eky'omu kifuba n'obukondo obw'ekivaalo eky'obwakabona, ng'okozesa akagugha aka langi ya nakasooma. Era olwo ekivaalo eky'omu kifuba ekyo kibe nga kiika bukalamu ku lusibiro olw'omu nkende olwalukirwa obukalamu ku kivaalo eky'obwakabona, era kibe nga tikirekuka kuva ku kivaalo ekyo eky'obwakabona.

²⁹ “Mu nsambo eyo, Aaroni aidha kubanga n'amaina ag'abaana ba Yakobo ku kivaalo kye eky'omu kifuba, mwene ng'Omukulu wa Bakabona ky'anaakozesanga okumanha Katonda ky'ayenda buli lw'anaajanga mu Kifo Ekitukuvu mu maiso ga Katonda kibe eky'okwidhusa eri Abaisiraeli.

³⁰ Era mu kivaalo ekyo eky'omu kifuba, Omukulu wa Bakabona ky'anaakozesanga okumanha nze Musengwa Katonda kye nhenda, oidha kutaamu ebintu eby'okukozesebwanga kabona oyo okumanha kye nhenda ebyetebwa Urimu ni Thummimu, bibenga mu kifuba kye ng'ali kwidha mu maiso gange. Mu nsambo eyo Aaroni, aidha kubanga n'obusobozi mu kifuba kye obw'okumanhanga kye nhenda Abaisiraeli bakole.”

Ekanzu

³¹ Agho Musengwa Katonda yaalagira Musa ati: “Era oidha kukola ekanzu enaateebwangaku ekivaalo eky'obwakabona nga yoonayoona ya langi ya nakasooma.

³² Oidha kugitaaku ekituli omubita omutwe era ku nkoto olukireku olukugiro, ng'oluba ku kanzu edhindi, erobe kukanuka.

³³ Okwezunguluza ekitundu eky'eifo eky'ekanzu, oidha kutungiraku ebifaananie eby'ebibala eby'oku muti omukomamawanga mu langi ya bbululu, n'eya nakasooma, n'eya kasaayisaayi. Era otungireku endege nga dha zaabu, nga dhiri ndalandala buli ghagati gh'ebifaananie eby'emikomamawanga ebibiri.

³⁴ Kibe nti ekifaananie eky'omukomamawanga okiriiraania endege, kabiri waataagho ekifaananie eky'omukomamawanga, otyo otyo okutuusa bw'omala okwezunguluza ekitundu eky'eifo kyonakyona eky'ekanzu.

³⁵ Ekyo n'ekivaalo Aaroni ky'aidha okubangamu ng'akola egy'obwakabona, era okuvuga okw'endege kwidha kuwulirwanga ng'angira mu Kifo Ekitukuvu mu maiso gange, era ni bw'anaabanga ng'afuluma, memale alobe kufa.”

Ekitambaala eky'oku mutwe n'ekivaalo ekidholige n'empiso n'ewuuzi

³⁶ Agho Musengwa Katonda yaalagira Musa ati: “Era oidha kukola akabaati aka zaabu omukenenule okaghandiikeku ng'oti n'ole asala obumanhiso mu mabaale bw'akola oidha kughandiikaku oti, ‘Yayawulibwa nga wa Musengwa Katonda.’

³⁷ Akabaati ako oidha kukasiba emberi ku kitambaala eky'oku mutwe n'akagugha ak'erangi ya nakasooma.

³⁸ Era kaidha kubanga mu bweni bwa Aaroni okwoleka nti aikiriiza okwetwika ensobi dhoonadhoona edhisobola okukolebwa mu kughaayo ebigheebwayo ebitukuvu, Abaisiraeli bye bampa nze Musengwa Katonda, olwo mbe nga mbiikiriza.

³⁹ “Era oidha kuluka ekivaalo ekidholige n'empiso n'ewuuzi nga kya lugoye olughegheevu, era okole ekitambaala eky'oku mutwe nga kyona kya lugoye olughegheevu, era okole n'olukoma ng'olutungiiremu ebifaananie eby'ebimuli n'empiso n'ewuuzi.

Ebivaalo bya batabane ba Aaroni

⁴⁰ “Oidha kukolera batabane ba Aaroni ebivaalo ebidholige n'empiso n'ewuuzi, obakolere n'enkoma, n'enkuufiira, nga bibagheesa ekitiisa era byababonesa bulungi.

⁴¹ Bw'omala oidha kuvaaza muganda wo Aaroni ni batabane ebivaalo byaibwe ebyo, olwo obasiige omuzigo olw'okubatukuza obaawule, era obagemye omulimo ogw'okumpeereza nga bakabona.

⁴² Era bakolere n'empale edh'engoye empegheevu, balobenga kughemuka mubiri.

⁴³ Aaroni ni batabane baidha kuvaalanga ebivaalo ebyo buliidho memale bangire mu Weema ey'Okwagaananirangamu ni Musengwa Katonda, oba baseete ye Alutaari okugheereza nga bakabona mu Kifo Ekitukuvu. Bwe batakola batyo balyereetaku omusango era baafa. Kino kiragiro ekitaja kuvaagho eri Aaroni n'abaana be era n'abaidhukulu.