Okuvaayo 26 - Baibuli Ekibono kya Katonda 2014

Ensuubo edh'omu Weema ey'Okwagaananirangamu ni Musengwa Katonda

¹ Era Musengwa Katonda yaakoba ati: “Oidha kukola ensuubo ikumi odhite mu Weema, nga dhaakolebwa mu ngoye empegheevu edhaalukibwa obukalamu, edha langi ya bbululu, n'edh'eya nakasooma, n'edh'eya kasaayisaayi. Era mutungiremu ebifaananie eby'ebitonde ebiri n'amaghagha ebyetebwa kerubi, nga mukozesa empiso n'ewuuzi.

² Obuleeyi obw'olusuubo olulala bwidha kuba mita ikumi na ibiri, obugazi bwalwo bube mita ibiri ensuubo dhoonadhoona dhiidha kuba nga dhaagayaga.

³ Ensuubo eitaanu dhiidha kutungibwa dhiyimbibwe nga buli lulala luyungibwa ku lwinaalwo, n'ensuubo eitaanu edhindi dhoona dhiyimbibwe dhityo.

⁴ Ku buli lusuubo olusembayo ku edho edhinaaba dhiyimbiibwa eitaanu edhisooka, oidha kutaaku obukondo obukoleibwa mu lugoye lwa langi ya bbululu, era ni ku itaanu edhinairirira oidha kukola n'ekirala.

⁵ Obukondo obwo bwidha kuba amakumi ataanu ku lusuubo olusembayo ku itaanu edhinaasooka okuyimbwa, n'obundi amakumi ataanu bube ku itaanu dhire edhindi. Obukondo obwo bwidha kuba nga bugemagana mu lunhiriri.

⁶ Agho oidha kukola obuntu amakumi ataanu obugemagania obukondo obw'oluuyi olundi ku bw'oluuyi olundi nga bwa zaabu. Endhuyi dhombi bwe dhinaayimbibwa, olwo Weema enaaba efuuse enambirira.

⁷ “Era oidha kukola ensuubo ikumi na lulala mu ngoye edhaakolebwa mu buviiri obw'embuzi, dhighembe ku Weema eyo.

⁸ Buli lusuubo lube nga lugheza mita ikumi na isatu obuleeyi ate obugazi lube mita ibiri, era dhoonadhoona eikumi n'olulala dhiidha kuba nga dhaagayaga mu bipimo.

⁹ Ensuubo eitaanu oidha kudhitunga odhiyimbe gha dhonka nga buli lulala luyungibwa ku lwinaalwo. Ni dhire edhindi omukaaga dhoona odhiyimbe gha dhonka mu nsambo n'endala. Olusuubo olwomukaaga oidha kulufunhamu gha mulyango ogwingira mu Weema eyo.

¹⁰ Ku mbali okw'olusuubo olusembayo ku itaanu edhinaasooka okuyimbibwa, oidha kukoleraku obukondo amakumi ataanu. Ni ku mbali okw'olusuubo olusembayo ku mukaaga edhinairirira okuyimbibwa, kwona okolereku obukondo amakumi ataanu.

¹¹ Agho oidha kukola obuntu obugemagania obukondo obw'oluuyi olundi ku bw'oluuyi olundi nga bwa kyuma kya kikomo, era obute mu bukondo bule, buyimbe endhuyi dhombi dhikole ekikingiriza ekiramba.

¹² Ekitundu eky'olusuubo olw'Eweema eyo ekifiikagho, kiidha kulengeedheranga einhuma ow'Eweema.

¹³ Ebitundu ebindi eby'ensuubo edh'Eweema eyo ebifiikagho ku luuyi ni ku luuyi, nga bigheza kitundu kya mita mu bugazi bwabyo, biidha kulengeedheranga ku luuyi ni ku luuyi olw'Eweema nga bigighemba.

¹⁴ “Oidha kukola ebintu ebighemba ku Weema ey'Okwagaananirangamu ni Musengwa Katonda bibiri: eky'omunda nga kyakolebwa mu mawu amakunhe ag'entaama enume, ate eky'oku ngulu nga kyakolebwa mu mawu amakunhe ag'ensolo edhindi.

Embaawo omwakolebwa Weema ey'Okwagaananirangamu ni Musengwa Katonda

¹⁵ “Era oidha kukola ebikondo eby'Eweema mu muti ogwetebwa akasia.

¹⁶ Obuleeyi obwa buli kikondo bwidha kuba emita ina, ate obugazi bube ekitundu kya mita.

¹⁷ Buli kikondo kiidha kubaaku ebintu ebisongovu bibiri eby'okukiyungisa ku kiinaakyo. Era ebikondo byonabyona eby'Eweema biidha kuba bityo.

¹⁸ Oidha kukola ebikondo amakumi abiri nga n'eby'okuba ku luuyi olw'omukono omusaadha olw'e buvandhuba olw'Eweema.

¹⁹ Ebikondo ebyo oidha kubikolera ebikolo amakumi ana nga bya feeza kwe binaayemereranga. Nga buli kikondo kiri n'ebikolo bibiri ebirimu ebituli omwingira ebintu bire ebibiri ebisongovu eby'ekikondo ekyo.

²⁰ Oidha kukola ebikondo amakumi abiri nga n'eby'okuba ku luuyi olw'omukono omugooda olw'e buvandhuba olw'Eweema.

²¹ Ebikondo ebyo oidha kubikolera ebikolo amakumi ana nga bya feeza, era nga buli kikolo kiri n'ebikondo bibiri.

²² Einhuma w'Eweema ku luuyi olw'e bugwandhuba, oidha kukolerayo ebikondo mukaaga.

²³ Mu nsonda eibiri edh'einhuma y'Eweema oidha kukolerayo ekikondo kirala kirala.

²⁴ Ebikondo ebyo biidha kuba nga biyimbe okuva ghansi okutuukira irala ghaigulu ku mutwe aghali omukonda. Ebikondo ebyo byombi ebikola ensonda, bityo bwe biidha okukolebwa.

²⁵ Kale, ebikondo biidha kuba munaana n'ebikolo byabyo ikumi na mukaaga ebya feeza, nga buli kikondo kyemereire ku bikolo bibiri.

²⁶ “Era oidha kubaadha embaawo edhikiikamu mu muti ogwetebwa akasia, ng'eitaanu dha kugemagania ebikondo eby'oluuyi olundi olw'Eweema,

²⁷ n'edhindi eitaanu nga dha kugemagania bikondo eby'oluuyi olundi olw'Eweema eyo, n'edhindi eitaanu nga dha kugemagania bikondo eby'oluuyi olw'einhuma olw'e bugwandhuba w'Eweema.

²⁸ Olubaawo olukiikamu olubita ghagati agha buli kikondo, lwidha kuba lulambirira nga lumalaku oluuyi lwonalwona olw'Eweema.

²⁹ Ebikondo ebyo mwidha kubirimbyaku zaabu byonabyona okubyezunguluza, era mubikolereku n'emikonda egya zaabu egibitamu embaawo dhire edhikiikamu. Embaawo edho dhoona mwidha kudhirimbyaku zaabu dhoonadhoona okudheezunguluza.

³⁰ Oidha kukola eisinzizo ng'ojiira ku ntegeka eri kukwolekebwa ku lusozi luno.

Olutimbe olwawula Ekifo Ekitukuvu Einho ku Kifo Ekitukuvu

³¹ “Era mwidha kukolayo olutimbe mu ngoye edha langi ya bbululu, n'edh'eya nakasooma, n'edh'eya kasaayisaayi, era ni mu ngoye empegheevu. Era mutungiremu ebifaananie eby'ebitonde ebiri n'amaghagha ebyetebwa kerubi, nga mukozesa empiso n'ewuuzi.

³² Olutimbe olwo oidha kulusiba ku mpango ina edh'omuti ogwetebwa akasia, era nga dhirimbiibwaku zaabu dhoonadhoona okudheezunguluza. Olutimbe olwo oidha kulusibya obusumaali bwa zaabu ku mpango edho eina, nga dheemereire ku bikolo bina ebya feeza.

³³ Bw'omala okusiba olutimbe ku mpango eina n'obusumaali, oidha kuleeta esanduuku erimu ekiidhukizo ogite mu lutimbe omwo. Olutimbe olwo lube nga lwawula Ekifo Ekitukuvu Einho ku Kifo Ekitukuvu.

³⁴ Agho ote ekisandikiza ku ngulu okw'esanduuku eyo ng'eri mu Kifo Ekitukuvu Einho.

³⁵ Era oleete emeeza eteebwaku emigaati egigheereibwayo eri Katonda, ogite agho ku luya lwe Ekifo Ekitukuvu Einho, ku luuyi olw'omukono omugooda olw'e buvandhuba w'Eweema. Ate ekikondo eky'entaala okite ku luuyi olw'omukono omusaadha olw'e buvandhuba w'Eweema eyo, nga byolekaine n'emeeza ere.

³⁶ “Mu mulyango ogwingira mu Kifo Ekitukuvu Einho oidha kukoleragho ekintu ekikinzaagho nga kyakolebwa mu lugoye olwa langi ya bbululu, n'olw'eya nakasooma, n'olw'eya kasaayisaayi, ni mu lugoye olughegheevu era okitungiremu ebimuli ng'okozesa empiso n'ewuuzi.

³⁷ Ekikinzaagho ekyo, oidha kukikolera empango itaanu edh'omuti ogwetebwa akasia, era nga dhirimbiibwaku zaabu dhoonadhoona okudheezunguluza. Empango oidha kudhikoleraku obusumaali bwa zaabu obugemerera ekikinzaagho ekyo, era odhikolere ebikolo bitaanu eby'ekyuma eky'ekikomo kwe dhinaayemereranga.