Okuvaayo 25 - Baibuli Ekibono kya Katonda 2014

Ebigheebwayo mu Weema entukuvu

¹ Musengwa Katonda yaakoba Musa ati:

² “Koba abantu Abaisiraeli, buli muntu atoole ekigheebwayo ky'anaaba asazeegho akikughe okindeetere.

³ Bino n'ebintu bye babe bakughe ng'ebigheebwayo: zaabu, feeza, ekyuma eky'ekikomo,

⁴ engoye edha langi ya bbululu, n'edh'eya nakasooma, n'edh'eya kasaayisaayi, n'engoye empegheevu, n'edho edhaakolebwa mu buviiri obw'embuzi,

⁵ n'amawu amakunhe ag'entaama enume, n'amawu amakunhe ag'ensolo edhindi, n'embaawo edhaasalibwa mu muti ogwetebwa akasia,

⁶ n'amafuta ag'entaala, n'obuwoowo obutabulwa mu muzigo ogw'okusiiga, n'obuwoowo obw'okuniosa,

⁷ n'amabaale ageetebwa onikisi, era n'amabaale ag'omughendo agandi agateebwa ku kivaalo eky'obwakabona ni ku kivaalo kabona ky'avaala mu kifuba.

⁸ Era koba abantu bankolere eisinzizo memale olwo mbabengamu.

⁹ Eisinzizo lino n'ebintu byamu, biri n'okukolebwa nga bijiira ku ntegeka ye ndidha okukwoleka.”

Esanduuku ey'Endagaano

¹⁰ “Era koba abantu, bankolere esanduuku mu mbaawo edh'omuti ogwetebwa akasia, nga obuleeyi bwayo egheza mita ndala ni sentimita ikumi, ate obugazi ng'egheza sentimita nkaaga na mukaaga era n'obugungumavu ng'egheza sentimita nkaaga na mukaaga.

¹¹ Esanduuku eyo mugirimbyeku zaabu omukenenule munda mwayo ni ku ngulu kwayo. Era mugikolereku olukomo lwa zaabu omukenenule okugyezunguluza yoonayoona.

¹² Era mukole emikonda mu zaabu emyekulungirivu ng'oti mpeta, mugite ku magulu ga sanduuku ana, mu mbali ebiri ni mu mbali ebiri.

¹³ Agho mubaadhireku emiti egy'okubbeedesa mu muti ogwetebwa akasia, memale emiti egyo mugilimbyeku zaabu okugyezunguluza gyonagyona.

¹⁴ Mute emiti egyo mu mikonda gire emyekulungirivu egiri ku mbali ni ku mbali okw'esanduuku, gibe egy'okubbeedesanga sanduuku eyo.

¹⁵ Emiti egyo gya kusigalanga mu mikonda egy'esanduuku nga tigyakutoolebwangamu.

¹⁶ Mu sanduuku omwo oidha kutaamu ekiidhukizo kye ndidha okukugha.

¹⁷ Agho okolereku ekisandikiza nga kya zaabu omukenenule obuleeyi bwakyo nga kigheza mita ndala ni sentimita ikumi, ate obugazi kibe sentimita nkaaga na mukaaga.

¹⁸ Era mukole ebifaananie bibiri eby'ebitonde ebiri n'amaghagha ebyetebwa kerubi, nga mubikola mu zaabu, bibe ku ndhuyi dhombi edh'ekisandikiza eky'esanduuku eyo.

¹⁹ Ekifaananie ekindi mukite ku luuyi lule olundi olw'ekisandikiza, ate ekindi mukite ku luuyi luno olundi olw'ekisandikiza ekyo. Aye ng'ebifaananie byombi mubikolera ghalala, byegema ghalala ku kisandikiza, byaba kintu kirala nga tibyawukaine.

²⁰ Ebifaananie ebyo mubikole nga mubirinzagainia, aye nga amaiso gaabyo galingiriire ku kisandikiza, era nga byandhulwiza amaghagha gaabyo nga gaghemba ku kisandikiza ekyo.

²¹ Ekyo nga kiwoire oidha kuta mu sanduuku eyo ekiidhukizo kye ndidha okukugha, era ote ekisandikiza kire ku ngulu okw'esanduuku eyo.

²² Agho ghe ndidha okukwagaana, era agho ghaigulu agh'ekisandikiza eky'Esanduuku ey'Endagaano era ghagati agh'ebitonde ebiri n'amaghagha ebyetebwa kerubi, ghe ndidha okukugheera ebiragiro byange byonabyona by'oidha okukobera Abaisiraeli.”

Emeeza okuba emigaati egigheebwayo eri Katonda

²³ “Era oidha kukola emeeza mu muti ogwetebwa akasia, ng'obuleeyi bwayo egheza sentimita kinaana na munaana, obugazi bwayo nga bwa sentimita amakumi ana na ina, n'obugungumavu bwayo nga bwa sentimita nkaaga na mukaaga.

²⁴ Omuti gw'akasia ogwo mwidha kugulimbyaku zaabu omukenenule munda ni ku ngulu, era emeeza mugiteeku omugo gwa zaabu okugyezunguluza.

²⁵ Era ogikolereku akabaawo akagyezungulula, ng'obugazi kaagayaga n'ekyala eky'omuntu, era nga keezungulwirwa omugo gwa zaabu.

²⁶ Okole emikonda ena mu zaabu emyekulungirivu ng'oti mpeta, ogite mu nsonda eina edh'emeeza, kiisi ghali mugulu.

²⁷ Kumpi agho n'akabaawo kale, n'aghaidha okuba emikonda egyo, era nga n'egiidha okubitamu emiti egy'okubbeedesanga emeeza eyo.

²⁸ Emiti egyo mugibaadhe mu muti ogwetebwa akasia, memale mugirimbyeku zaabu gyonagyona okugyezunguluza, gibe egy'okubbeedesanga emeeza eyo.

²⁹ Emeeza eyo mugikolereku ebibya n'enkaayi, era mugikolereku n'ensugha, n'ebikopo, olw'ebigheebwayo ebifukibwa. Ebintu ebyo mubikole mu zaabu omukenenule.

³⁰ Era oidha kutanga Emigaati egigheereibwayo eri Katonda ku meeza eyo, mu maiso gange buliidho.”

Ekikondo eky'entaala

³¹ “Era oidha kukola ekikondo eky'entaala mu zaabu omukenenule. Ekikolo ghalala n'ekitundu eky'eitale eky'ekikondo ekyo, oidha kubikola mu zaabu omukenenule oyo. Era obukopo obugemerera entaala, n'okudholiga okuli ng'oti bimuli, byona oidha kubikola nga byegemeire ghalala ni bire byonabyona mu zaabu omukenenule, nga ghazira kyawukaineku.

³² Ekikondo ekyo kiidha kuba n'ensaga mukaaga nga dhiva mu mbali ni mu mbali mwakyo ensaga eisatu nga dhiva ku luuyi lwakyo olundi, ate ensaga eisatu edhindi dhaava ku lundi.

³³ Buli lusaga, nga bwe dhiri omukaaga, lwidha kubaaku obukopo busatu, nga buli kakopo kafaanana ng'oti n'ekimuli eky'omuti ogwetebwa alumondi, nga kiramba n'obukaba bwaku.

³⁴ Ekitundu eky'eitale eky'ekikondo kiidha kubaaku obukopo buna obufaanana ng'oti n'ekimuli eky'omuti ogwetebwa alumondi, nga kiramba n'obukaba bwaku.

³⁵ Kiisi ensaga eibiri ghe dhitandiikira okuva ku kitundu eky'eitale eky'ekikondo, ghaidha kubaagho ekiri ng'oti kimuli era nga kikoleirwagho kyegemeragho irala aghazira kwawukanamu.

³⁶ Ekintu ekyo ekiri ng'oti kimuli, n'ensaga, n'ekikondo kyene, oidha kubikola nga byegemeire ghalala mu zaabu omukenenule, nga ghazira kyawukaineku.

³⁷ Bw'omala oidha kukola entaala musanvu edh'okubanga ku kikondo ekyo, era odhiteeku dhibe nga dhimulisa mberi wa kikondo ekyo.

³⁸ Makansu edhisala ebisiriiza ku ntambi, ni sowaani edhiteebwaku ebisiriiza ebyo, oidha kudhikola mu zaabu omukenenule.

³⁹ Ekikondo ekyo n'ebinaakolerwaku ebindi, bya kumalagho talanta namba edho ni kilo asatu n'eina edha zaabu omukenenule.

⁴⁰ Era bona nti obikola mu nsambo ye ndi kukwoleka ghano ku lusozi.”