Okuvaayo 24 - Baibuli Ekibono kya Katonda 2014

Endagaano ekakasibwa n'akamanhiso

¹ Agho Musengwa Katonda yaakoba Musa ati: “Iwe, ni Aaroni, ni Nadabu, ni Abihu, aghalala n'abakulu ab'ebikunsu mu Isiraeli nsanvu, muniine olusozi nga mwidha ye ndi nze. Aye bwe munaaba nga mukaali ghalaku, musooke mukube amakiryaivu munsinze.

² Iwe Musa niiwe wenka oidha okuseeta ye ndi, aye abantu abandi boonaboona, bataseeta. Era abantu ababuliidho bataniina ku lusozi n'iwe naire.”

³ Agho Musa yaaja yaakobera abantu ebyo byonabyona Musengwa Katonda bye yamukoba era n'ebiragiro. Era abantu boonaboona bairamu n'omwoyo mulala bati: “Ebyo byonabyona Musengwa Katonda by'atukobye twidha kubikola.”

⁴ Musa yaaghandiika ebibono bya Musengwa Katonda ebyo byonabyona. Era yaazuuka ku nkyo yaazimba alutaari ghansi agh'olusozi. Yaazimba n'empango edh'amabaale ikumi na ibiri ng'ebika eby'Abaisiraeli bwe biri.

⁵ Yaatuma abaisuka Abaisiraeli baaja baaghaayo ye Musengwa Katonda ebigheebwayo ebyokebwa n'emisengo egy'okutabagana, nga baghaayo ente.

⁶ Musa yaatoola ogundi ku musaayi yaaguta mu bibya, ate ogwasigalagho yaagumansira ku alutaari.

⁷ Agho yaatoola ekitabo eky'endagaano yaakisoma ng'abantu boonaboona bawulira, era baakoba bati: “Ebyo byonabyona Musengwa Katonda by'atukobye okukola twidha kubikola, era twidha kumugonderanga.”

⁸ Agho Musa yaatoola omusaayi yaagumansira ku bantu nga bw'akoba ati: “Omusaayi n'akamanhiso akakakasa endagaano Musengwa Katonda y'akoze n'imwe ng'ebibono bino byonabyona bwe bikoba.”

⁹ Agho Musa, ni Aaroni, ni Nadabu, ni Abihu, ghalala n'abakulu ab'ebikunsu mu Isiraeli nsanvu, baaniina olusozi

¹⁰ baabona Katonda wa Isiraeli. Ghansi gh'ebigere bye nga ghali ng'oti ni ghe baayaliira amabaale ag'omughendo ageetebwa saffiro, aga langi ya bbululu omutangaavu obukalamu ng'eigulu.

¹¹ Katonda tiyagalula mukono kukola kabi bakulu ba bikunsu mu Isiraeli abo. Beerolera Katonda, bwe baamala baalya era baanhwa ku kibigiya.

Musa ng'ali ku Lusozi Sinai

¹² Musengwa Katonda yaakoba Musa ati: “Niina olusozi oidhe ye ndi. Bw'otuuka nteegerera, ndidha kukugha ebibaadho eby'amabaale agaliku amateeka n'ebiragiro bye naghandiikira abantu olw'okubagalagira.”

¹³ Kale Musa yaasituka ni Yoshua eyamuyambangaku, era Musa yaaniina ku lusozi lwa Katonda.

¹⁴ Musa oyo yaakoba abakulu ab'ebikunsu mu Isiraeli ati: “Mututeegere ghano okutuusa lwe tunaira,” era ati: “Muli ghano ni Aaroni ni Hura, bweghabangagho ali n'ensonga yeenayeena ajanga ye bali baagigondhoola.”

¹⁵ Agho Musa yaaniina ku lusozi era ekire kyalughembaku.

¹⁶ Olusozi Sinai lwaidhula ekitiisa kya Musengwa Katonda era ekire kyalughembaku okumala enaku mukaaga. Ku lunaku olwomusanvu Musengwa Katonda ng'ali mu kire, yaayeta Musa.

¹⁷ Abaisiraeli baabona ekitiisa kya Musengwa Katonda nga kiri ng'oti muliro oguli kubbeibbera ku lusozi ghaigulu.

¹⁸ Musa yaaniina ku lusozi ghaigulu, yangira mu kire era yaaba okwo okumala enaku amakumi ana omusana n'obwire.