Okuvaayo 23 - Baibuli Ekibono kya Katonda 2014

Okukola ekituufu era n'okugemerwa ekivunika

¹ “Otasansaanianga ngambo, era oteeyimbanga na mukozi wa bibi ng'ogha obudhulizi obutali butuufu.

² “Otajiiranga ku kintu abantu abasinga bungi kye bakoba nga kikyamu, oba okubajiiraku nga bali kugha obudhulizi obubuzaabuza ekituufu.

³ Era oteekubiranga ku luuyi lwa mwavu n'omuleetera kusinga musango, mbu olw'okuba mwavu.

⁴ “Bw'obonanga ente oba endogoyi ey'omuzigu wo ng'eri kumubulaku, ogigemanga waagimwiriza.

⁵ Era bw'oyagaananga endogoyi ey'omuntu atakwenda ng'egwire olw'obuzito bwe bagitwise, otamubitangaku bubite omubeerangaku okugibbeeda, mwagiiza ku magulu gaayo.

⁶ “Otabuzaabuzanga nsonga dha muntu mwavu ng'ali kuwozesebwa.

⁷ “Weesambirenga irala okughaayiriza omuntu yeenayeena. Omuntu aziraku musango era omutuufu, otamusaliranga gwa kufa. Kuba tiriroba kuvunaana kiisi mukozi wa kibi.

⁸ “Otalyanga nguzi, kuba enguzi eziba abantu amaiso era yaafuulaniafuulania ensonga dh'oyo omutuufu.

⁹ “Otabisanga bubi muntu wa ighanga lindi ali mu imwe mwidhi bwe kiruma okuba ow'eighanga erindi, kuba mwena bwe mwali e Misiri.

Omwaka ogwomusanvu n'olunaku olwomusanvu

¹⁰ “Onaamalanga emyaka omukaaga ng'osimba emere yo, era ng'ogikungula.

¹¹ Aye mu mwaka ogwomusanvu olekanga eitaka lyo lyawuumulaku, era emere yoonayoona ebala mu misiri erekebwangayo, abaavu baagirya. Ate eyo abaavu ye baba nga tibaliire bagirekeranga ensolo edh'omu nsiko dhaalya. Mu nsambo n'endala eyo, otyo bw'onaakolanga amasamba go ag'emizabbibu n'ag'emiti emyoliva.

¹² “Oli n'enaku mukaaga dh'oghanga okukoleramu emirimo gyo, aye olwomusanvu oidhanga kuwuumula. Olwo ente dho n'endogoyi dho dhighange okuwuumula, era abairu bo, n'abamaghanga agandi abakukolera bawuumule bairemu amaani.

¹³ “Mukuume ebiragiro ebyo byonabyona mulobe kubisobya. Mwerabirire irala emisambwa gyonagyona, era mutaganhanga maina gaagyo na kubabita mu kanwa.

Ebibinuko ebisatu ebikologho

¹⁴ “Buli mwaka mwidha kwidhanga munkolere ebibinuko bya mikuzi esatu olw'okumpa ekitiisa.

¹⁵ Ekibinuko ekisooka n'eky'omu mwezi gwa Abibu, omwezi gwe mwaviiramu mu Misiri. Nga bwe nabalagira, bwe mukolanga ekibinuko kino mulyanga migaati gitazimbulukusiibwa gyonka okumala entangama ya nnaku musanvu. Era ghatabangagho aidhanga kunsinza ng'azira kigheebwayo.

¹⁶ “Ekibinuko eky'Amakungula n'ekyokubiri, ekibaagho nga muli kukungula bye mwasiga mu misiri gyaimwe ebisooka. “Ku nkomerero ey'omwaka munaakolanga ekibinuko ekyokusatu eky'okusololeza ebirime mu byagi, ekyetebwa Ekibinuko eky'Entindi.

¹⁷ Kiisi musaadha anaabanga n'okwidha okunsinza nze Musengwa Katonda waimwe mu bibinuko ebyo eby'emikuzi esatu buli mwaka.

¹⁸ “Bw'oghangayo ensolo eitiibwa ng'omusengo, otaleeterangaku migaati gizimbulukusiibwa. Era amasavu ag'ensolo edhigheebwayo ng'omusengo mu bibinuko ebyo, gatasulangagho kutuusa nkyo.

¹⁹ “Emere ye musookanga okukungula mu misiri gyaimwe mugireetanga mu ndhu yange nze Musengwa Katonda waimwe, mwagighaayo. “Mutafumbiranga mamba ya mbuzi nto oba ya ntaama nto, mu mata ga inhaayo.”

Musengwa Katonda asuubiza era yaagalagira abantu be

²⁰ “Bona eno, ndidha kubatumira malaika okubakulemberamu ng'abakuuma, era abatuuse mu kifo kye mbategekeire.

²¹ Imwe mumuwulire, mugondere kiisi ky'abakoba. Mutamudheemera, taidha kubasonigha kwonoona kwaimwe, kuba ali kwidha mu liina lyange.

²² “Aye bwe mwisaayo einho omwoyo okugondera by'akoba era ni mukola byonabyona bye mbalagira, ndidha kubanga muzigu wa bazigu baimwe era ndidha kulumbanga abo ababalumba.

²³ Malaika wange aidha kubakulembera, abatwale mu biketezo bino: eky'Abamori n'eky'Abahitti, n'eky'Abaperizzi, n'eky'Abakanaani, n'eky'Abahivi, n'eky'Abayebusi, ate abantu ab'omu biketezo ebyo abazikirize.

²⁴ Otakubiranga misambwa gyaibwe makiryaivu, oba okugisinza, oba okukola ebyo beene bye bagikolera. Aye ogizikirizanga, era waamenhamenhanga empango dhaagyo edh'amabaale.

²⁵ Nze Musengwa Katonda wo, ninze y'obenga osinze, era nze ndidha kukughanga enkabi mu mere ni mu maadhi, era ntoolegho obulwaire obubadaaza.

²⁶ Ezira mukazi aja kuvaamu nda, oba kuba mugumba mu nsi yaimwe era ezira ye nja kusala ku myaka.

²⁷ “Ndidha kuleeteranga abazigu abanaabanga emberi ye muja okutya einho, era ndeetengagho okutabukatabuka mu bantu abagezaaku okubalwanisa. Abazigu baimwe boonaboona baidha kukyukanga babalumuke.

²⁸ Ndidha kusindikanga ebiziinhuusi emberi ye muja bibingengamu Abahivi, n'Abakanaani, n'Abahitti, babasegulire.

²⁹ Aye okubabingagho emberi ye muja tija kukikola mu mwaka mulala gwonka, kuba olwo ensi eba esigala nga ndhereere, ensolo edh'omu nsiko dhaazaalagana ekibitiriire era dhaabafuukira ekizibu.

³⁰ Kale ndidha kubabinganga ye muja katonokatono, okutuusa lwe mulizaalagana ni mughera ni mwidhuza ensi.

³¹ Nja kutaagho ensalosalo yaimwe eve ku Nhandha Emyufu okutuuka ku nhandha ey'ab'e Filisitia era eve ku irungu etuuke ku mwiga Eufurate. Abantu abo ababa mu biketezo ebyo nja kubata mu ngalo dhaimwe, era mwidha kujanga nga mubabingagho nga bwe munaajanga nga museetayo.

³² Otakolanga na bantu abo ndagaano, oba okugikola n'emisambwa gyaibwe.

³³ Otalekanga bantu abo ni baba mu nsi yaimwe, kuba baghanga okubaleetera okwonoona ye ndi. Kuba bw'onaasinzanga emisambwa gyaibwe, onaabanga ng'okagwireku.”