Okuvaayo 22 - Baibuli Ekibono kya Katonda 2014

Amateeka agagema kukusasula

¹ “Omuntu bw'anaibanga ente oba entaama, n'agiita oba n'agitunda, aidha kusasulanga ente itaanu olw'ente endala ye yaiba, oba entaama ina olw'entaama endala ye yaiba.

^2-4 Omuntu oyo anaabanga n'okusasula ekyo kye yaiba. Era bw'anaabanga ng'azira kya kusasulisa, banaamutundanga ng'omwiru olw'okusasula kye yaiba. Ensolo ye yaiba, k'ebe nte, oba ndogoyi, oba ntaama, bw'enaayagaanibwanga nga nnamu eri mu dhidhe, aidha kugisasulangamu ensolo ibiri. “Omwibi bw'anaayagaanibwanga obwire ng'ali kumenha endhu okwingira memale n'aitibwa, oyo amwise taabengaku musango gwa butemo. Aye bw'anaayagaanibwanga omusana memale n'aitibwa, oyo amwise anaavunaanibwanga omusango ogw'obutemo.

⁵ “Omuntu bw'anaalekuliranga ensolo dhe okuliira mu musiri gwe oba mu isamba lye ery'emizabbibu, memale ni dhija ni dhirya emere mu musiri ogw'omuntu owundi, aidha kusasulanga emere ye dhiriire ng'atoola ku bisinga obulungi ebiri mu musiri gwe oba isamba lye ery'emizabbibu.

⁶ “Bw'anaateeranga oluyiira mu kibandha kye, memale ni lukunkuna mu isubi ni lutuuka mu kibandha eky'omuntu owundi ni lwokya emere ye, ye yakungula naabunga mu musiri oba eyo y'akaali kukungula, oba ni lwokya omusiri gwonagwona, oyo eyateera oluyiira aidhanga kusasula mwene mere byonabyona by'anaabanga ng'afiiriirwa.

⁷ “Omuntu bw'anaaghanga mwine empiiya oba ebintu bye eby'omughendo okubimukuumira, memale ni babiibira mu ndhu y'oyo ye babighaire okubikuuma, omwibi bw'anaagemwanga anaasasulanga ebintu ebyo emikuzi ebiri.

⁸ Aye omwibi bw'anaabanga nga tagemeibwa, mwene ndhu ebintu mwe byaibirwa anaaleetebwanga mu isinzizo yaalayira mu maiso ga Katonda oba nga bwenebwene tiyaiba bintu bya mwine.

⁹ “Bwe ghanaabangagho abantu abakaayanira ekintu kyonakyona, k'ebe nte, oba ndogoyi, oba ntaama, oba mbuzi, oba kivaalo, oba ekintu kyonakyona ekyabula, nga buli muntu akoba ati, ‘Kyange’, ensonga dha bombi dhinaatwalibwanga mu isinzizo. Oyo Katonda y'anaasalangagho nga n'omukyamu, anaasasulanga ole mwine ekintu ekyo emikuzi ebiri.

¹⁰ “Omuntu bw'anaaghanga mwine endogoyi ye, oba ente ye, oba entaama ye, oba embuzi ye, oba ensolo ye, eyindi yoonayoona okugimukuumira, memale n'efa, oba n'erumizibwa obubi, oba n'eibibwa nga ghazira ali kubona,

¹¹ banaajanga mu isinzizo. Ole ye baagha okukuuma anaalayiranga mu maiso ga Katonda oba nga bwenebwene tiyatuusa ku nsolo ya mwine ekyo ekyagituukaku, era mwene nsolo aidha kwikirizanga okulayira okwo, era taidhanga kumusasuza.

¹² Aye bw'enaabanga nga yaibibwa okuva ku ye baagikuumisa, oyo ye baagikuumisa aidhanga kugisasula mwene yo.

¹³ Ensolo eyo bw'enaabanga nga yaitibwa nsolo dha mu nsiko era nga ye baagikuumisa asobola okwoleka ku bitundu byayo ebyasigalagho, t'agisasulenga.

¹⁴ “Omuntu bw'aneeyazikwanga ensolo ya mwine, memale n'erumizibwa obubi oba n'efa nga mwene yo ti n'ali nayo, aidha kugisasulanga.

¹⁵ Aye mwene yo bw'anaabanga nga n'eyali nayo, ole taidha kugisasulanga. Bw'enaabanga empangise, ole aidha kusasulanga mpiiya dha kugipangisa dhonka.”

Amateeka agagema ku buntubulamu

¹⁶ “Omusaadha bw'anaasendasendanga omughala omuto omwegha akaali okwandhula n'aba naye, anaaghangayo omwandu yaamubayiza.

¹⁷ Aye ise ow'omughala bw'anaaloberanga omusaadha oyo okubayiza mughala we, era omusaadha oyo anaabanga n'okutoola omwandu ogusasulirwa omughala omwegha, yaagugha ise w'omughala oyo.

¹⁸ “Otaganhanga mukazi mulogo kubaagho nga mulamu.

¹⁹ “Omusaadha yeenayeena anaabanga n'ensolo mu nsambo abasaadha ye baba n'abakazi mu buliri, anaitibwanga.

²⁰ “Omuntu yeenayeena bw'anaaghangayo omusengo eri omusambwa mu kifo eky'okugugha nze Musengwa Katonda, anaazikirizibwanga.

²¹ “Omuntu ow'eighanga erindi otamubisanga bubi oba okumutuntuza, kuba mwena mwali ba ighanga lindi nga muli e Misiri.

²² “Otabisanga bubi namwandu oba mulekwa.

²³ Bw'olibabisa obubi, baja kundirira era zeena mpulire okulira kwaibwe,

²⁴ nsungughale era nkusindike ofiire mu lutalo. Olwo weena bakazi bo babe banamwandu, n'abaana bo babe bamulekwa.

²⁵ “Bw'owolanga empiiya omuntu yeenayeena ku bantu bange abaavu b'olimu, otakolanga ng'abaghozi abandi, n'omutoolaku magoba.

²⁶ “Bw'ogemanga ku mwino ekivaalo kye ng'omusingo, okimwirizanga ng'endhuba ekaali kugwa,

²⁷ kuba ekyo kye yeebwika era n'ekikunta kye ekimusuuya. Kale aghanga atya okutenduka nga tiyeebwise? Era bw'anandiriranga ndidha kumuwuliranga, kuba nze ndi wa kivunika.

²⁸ “Otavumanga Katonda oba okukolimira omufuzi ow'abantu bo.

²⁹ “Oidha kundeeteranga ebigheebwayo ku birime by'osooka okukungula, ni ku muzigo ogw'emiti emyoliva gy'okamula, ni ku mwenge gw'emizabbibu gw'okunha. Era oidha kumpanga omwana omulenzi anaasookanga okuzaalibwa.

³⁰ Era otyo bw'onaakolanga n'ente, n'entaama, n'embuzi enume enaazaalibwanga mu luzaalo olusooka enaabangaku ni dhiinaadho okumala enaku musanvu, olwomunaana waagimpa ng'ekigheebwayo.

³¹ “Mwidha kubanga bantu bange abatukuvu. Olw'ekyo mutalyanga mamba ya nsolo eitiibwa nsolo dha mu nsiko, mugisuuliranga mbwa.