Okuvaayo 21 - Baibuli Ekibono kya Katonda 2014

Ensambo abairu ye bagwaine okubisibwamu

¹ “Abantu boonaboona Abaisiraeli baghe amateeka gano:

² Bw'ogulanga omwiru Omuheburayi omusaadha, aidha kukukoleranga obwiru okumala entangama ya myaka mukaaga. Ogwomusanvu bwe gutuuka omulekanga yaaja nga wa idembe, era ghazira ky'ateekwa kukusasula.

³ Bw'omugulanga ng'azira mukazi, atajanga na mukazi. Aye bw'omugulanga ng'ali n'omukazi, ajanga ni mukazi we.

⁴ Musengwa Katonda we bw'anaabanga nga n'eyamugha omukazi n'amuzaalira abaana abalenzi oba abaghala, omukazi n'abaana banaasigalanga nga ba musengwa we era omusaadha oyo atajanga nabo.

⁵ Aye omwiru bw'asalangagho n'akoba ati agonza musengwa we, ni mukazi we, n'abaana be, era nga tayenda kumuleka aje nga wa idembe,

⁶ musengwa we amutwalanga mu isinzizo yaamwemereza gha lwigi oba gha mwango, yaamufuwula kutu owundi ng'akozesa olugera olusongovu. Olwo omwiru oyo anaabanga mwiru we okutuusa okufa.

⁷ “Omusaadha bw'anaatundanga mughala we ng'omwiru omukazi, omwiru oyo taalekebwenga kuja nga wa idembe ng'oti n'abairu abasaadha bwe balekebwa.

⁸ Bw'anaabanga nga tasanhusa musengwa we eyamwegulira ng'omukazi, musengwa we oyo anaamwizangayo ye yamugula baamununula bye yamugula era musengwa we oyo taamuguzenga ba ndha, kuba yamukola bubi okumwekyusaaku.

⁹ Omusaadha bw'anaaguliranga mutabane we omwiru ng'omukazi, agho anaabanga n'okumubisa nga mughala we.

¹⁰ Omusaadha bw'afunanga omukazi owundi, atakendeezanga ku by'abaire akolera ole abairengagho ng'okumufunira emere, n'ebivaalo, n'okumulabirira mu by'obufumbo.

¹¹ Bw'anaabanga nga tamukoleire bintu ebyo ebisatu, omukazi oyo anaabanga wa idembe okuvaagho nga ghazira mpiiya yoonayoona esaswirwa musaadha oyo.”

Amateeka agagema ku bikolwa eby'obukambwe

¹² “Omuntu yeenayeena anaakubanga omuntu n'amwita, yeena anaabanga n'okwitibwa.

¹³ Aye bw'anaabanga nga tiyamweteega mu bugenderevu, aye nga nze Katonda ninze nasalagho afe mu nsambo eyo, agho ndidha kutangagho ekifo mw'anaalumukiranga, n'awona omusango ogwo.

¹⁴ Aye omuntu anaalumbanga mwine mu bugenderevu, n'asala amagezi n'amwita, oyo ni bw'anaabanga ng'alumukiire ku alutaari yange okwewonia, anaatoolebwangayo yaitibwa.

¹⁵ “Omuntu yeenayeena anaakubanga ise oba inhina, wa kwitibwanga.

¹⁶ “Omuntu yeenayeena anaawuuyanga omuntu n'amutunda, oba n'ayagaanibwa ng'ali naye, wa kwitibwanga.

¹⁷ “Omuntu yeenayeena anaakolimiranga ise oba inhina, wa kwitibwanga.

¹⁸ “Abantu bwe banaasoolanga memale owundi n'akuba mwine eibaale, oba n'amufunta ekifunsi, ole ye bakubye n'atafa aye n'agwa ku ndiri,

¹⁹ bw'anaawonangamu n'aba ng'asobola okukoomera ku mwigo okujaaku ku luya, eyamukuba taabengaku musango. Aye aidha kusasuliranga ye yakuba olw'ebiseera bye by'anaabanga ng'afiiriirwa, era amwidhandhabenga okutuusa lw'anaawoneranga irala.

²⁰ “Omuntu bw'anaatoolanga omwigo n'akuba omwiru we omusaadha oba omwiru we omukazi n'amwitiragho, omuntu oyo aidhanga kubonerezebwa.

²¹ Aye omwiru oyo bw'ataafiirengagho aye n'amalaghooku olunaku oba eibiri ng'akaali mulamu, omuntu oyo taidha kubonerezebwanga. Kuba anaabanga amaze okufiirwa omwiru we ye yagula n'empiiya dhe.

²² “Bwebanaabanga nga bali kulwana, memale owundi ku abo n'alumya omukazi ali enda, enda n'evaamu aye omukazi n'ataba bubi, oyo amulumiiza aidha kumuliyiranga omughendo iba w'omukazi oyo ye balumiiza gw'anaasalanga ni gwikirizibwa abalamuzi.

²³ Aye omukazi bw'anaabanga obubi, amulumiiza aidha kumuliyiranga bulamu olw'obulamu,

²⁴ oba eriiso olw'eriiso, oba eriino olw'eriino, oba omukono olw'omukono, oba ekigere olw'ekigere,

²⁵ oba okwokebwa olw'okwokya, oba okuteebwaku ekibwa olw'ekibwa, oba okunuubulwa olw'okunuubula.

²⁶ “Omuntu bw'anaakubanga eriiso ery'omwiru we omusaadha oba omwiru we omukazi n'alyonoona, aidha kulekanga omwiru oyo aje nga wa idembe olw'okusasulira eriiso lye.

²⁷ “Bw'anaakubanga eriino ery'omwiru we omusaadha oba omwiru we omukazi n'alitoolamu, aidha kulekanga omwiru oyo aje nga wa idembe olw'okusasulira eriino lye.”

Amateeka agafuga mwene nsolo

²⁸ “Ente bw'enaafulanga omuntu n'emwita, ente eyo enaakubwanga amabaale yaafa, era emamba yaayo teeriibwenga. Aye mwene yo taabonerezebwenga.

²⁹ Aye ente eyo bw'eba ng'ebairenga erumbagana abantu, era nga mwene yo yalabulwa aye yaaba nga tagisiba, memale n'efula omuntu n'emwita, ente eyo enaakubwanga amabaale yaafa, ni mwene yo anaitibwanga yeena.

³⁰ Aye bwe banaamuganhanga okuligha olw'okuwonia obulamu bwe, anaabanga n'okusasula mu bwidhuvu kye banaamusaliranga.

³¹ Ente bw'enaafulanga omwana ow'omuntu, omulenzi oba omughala, eiteeka lyene eryo n'erinaakozesebwanga.

³² Ente bw'enaafulanga omwiru n'emwita, mwene nte aidha kughanga mwene mwiru ebitundu bya feeza amakumi asatu olw'okumuliyira, era ente eidha kukubwanga amabaale efe.

³³ “Omuntu bw'anaalekanga ekiina nga takisandiikeeku, oba omuntu bw'anaasimanga ekiina n'atakighembaku, memale ente oba endogoyi n'ekigwamu,

³⁴ mwene kiina anaabanga n'okuligha ensolo eyo. Aidha kughanga mwene nsolo empiiya, era olwo ensolo enfu enaabanga yiye.

³⁵ “Ente ey'omuntu bw'enaalumyanga ente ey'omuntu owundi, ere erumiziibwa n'efa, banaatundanga ente enamu baagabana empiiya era baagabana n'emamba ey'ere enfu.

³⁶ Aye bwekinaabanga nti ente eyo erumiiza yiinaayo ebairenga emanhiibwa okuva einhuma ere nga nfulagani, aye mwene yo n'aloba okugisiba, mwene yo oyo aidha kutoolanga ente enamu aliyire mwene ere enfu, olwo ensolo eyo enfu enaafuukanga yiye.”