Okuvaayo 20 - Baibuli Ekibono kya Katonda 2014

Ebiragiro eikumi

¹ Agho Katonda yaayogera ebibono bino

² ati: “Ninze Musengwa Katonda waimwe, eyabatoola mu Misiri ye mwali nga mukola obwiru.

³ “Mutasinzanga katonda wundi okutoolaku nze.

⁴ “Muteekoleranga kibaadhe oba kiwumbe ekifaanana ekintu kyonakyona ekiri ghaigulu ku igulu, oba ghansi ku nsi, oba waire ekiri mu maadhi agali ghansi agh'ensi.

⁵ Ebintu ebyo mutabisinzanga, kuba nze Musengwa Katonda waimwe ndi wa nkikidi ku bantu bange. Abo abankyagha mbabonereza, era naabonereza n'abaana baibwe, n'abaidhukulu, okutuukira irala ku luse olwokusatu n'olwokuna.

⁶ Aye abantu enkumi n'enkumi abangonza, ni bagondera ebiragiro byange, mbooleka okugonza okutakoma.

⁷ “Mutakozesanga liina lyange nze Musengwa Katonda waimwe mu bya matamatama, kuba tija kuloba kubonereza oyo yeenayeena akozesa eriina lyange obubi.

⁸ “Muteerabiranga kukuza lunaku lwa Sabbato nga lutukuvu.

⁹ Muli n'enaku mukaaga edh'okukolerangaku emirimo gyaimwe gyonagyona.

¹⁰ Aye olunaku olwomusanvu, lwa Sabbato yange nze Musengwa Katonda waimwe. Olwo mutalukolerangaku mulimo gwonagwona waire imwe beene, waire batabane baimwe, waire baghala baimwe, waire abairu baimwe abasaadha oba abakazi, waire ensolo dhaimwe, era waire abasenze be musuza;

¹¹ kuba mu nnaku omukaaga nze Musengwa Katonda nakola eigulu, n'ensi, n'enhandha n'ebirimu byonabyona, naawuumula ku lunaku olwomusanvu. Kye nava ni ndugha enkabi era ni ndutukuza.

¹² “Balata baimwe ni bainhaimwe mubaghenga ekitiibwa, olwo mughangaale enaku kamaala mu nsi nze Musengwa Katonda waimwe ye ndi kubagha.

¹³ “Mutatemulanga.

¹⁴ “Mutayendanga.

¹⁵ “Mutaibanga.

¹⁶ “Mutaghanga ku muntu budhulizi bwa bulimba.

¹⁷ “Muteegwanizanga ndhu dha bantu bandi. Muteegwanizanga baka beene, waire okwegwaniza abairu baibwe abasaadha oba abakazi, waire ente dhaibwe, oba endogoyi dhaibwe, oba ebintu byaibwe ebindi byonabyona.”

Abantu batya inho

¹⁸ Abantu boonaboona bwe baawulira okutyabuka okw'olukuba n'okuvuga okw'endeka, ni babona n'okumyansa okw'olukuba, n'olusozi nga luli kunioka omwosi, baatya inho baadhugumira era baayemerera ere ghalaku.

¹⁹ Baakoba Musa bati: “Iwe yogera n'ife twidha kuwulira, aye Katonda atayogera n'ife, kuba tusobola okufa.”

²⁰ Musa yaakoba abantu ati: “Mutatya, kuba Katonda aidhie kubaleba, n'okubongeramu okumutya, mulobe kwonoona.”

²¹ Era abantu baasigala nga bakaayemereire ghala, aye Musa ng'ali kuseeta y'ekire ekigemu Katonda mwe yali.

Amateeka agagema ku kuzimba alutaari

²² Agho Musengwa Katonda yaalagira Musa okukoba abantu Abaisiraeli ati: “Muboine nze Musengwa Katonda bwe ndhogeire n'imwe nga ndi mu igulu.

²³ Mutakolanga bakatonda mu feeza ni mubasinziza ghalala ninze, waire okwekolera bakatonda mu zaabu.

²⁴ Nzimbira alutaari ey'eitaka era ogheereyo ku alutaari okwo entaama, oba embuzi, oba ente, ng'ekigheebwayo ekyokebwa, era n'ekigheebwayo olw'okutabagana. Mu kifo kyonakyona kye nnaasalangagho okunsinzizaamu, ndidha kwidhanga nkughe enkabi.

²⁵ Bw'onzimbira alutaari ey'amabaale, otakozesanga mabaale mabaadhe bw'ogabaadhaku ogafuula agatagwaniire kuzimba alutaari ya kunsinzizangaku.

²⁶ Otakolanga alutaari yeetaaga kuniinaku na madaala, kuba osobola okughemukiraku omubiri.”