Okuvaayo 2 - Baibuli Ekibono kya Katonda 2014

Okuzaalibwa kwa Musa

¹ Mu kiseera ekyo ghaabaagho omusaadha ow'ekika ekya Levi, yaafuna omukazi we nga wa mu kika kyene ekyo.

² Omukazi oyo yaatoola enda yaazaala omwana mulenzi. Bwe yabona nga omwana oyo mulungi inho mu mboneka, yaamugisa okumala emyezi esatu.

³ Agho yaabona nga takaasobola kumugisa. N'okufunayo ekiibo ekyalukibwa mu bitoogo yaakimaalaku obulimbo okukirobera okudimira, yaamuta omwo. Bwe yamala, yaakita mu bitoogo ebyakulira ku mbali okw'omwiga.

⁴ Mwanhina w'omwana oyo yaafuna aghantu nga gheeswireku akata okuva aghali omwana, yaaba agho, aghange okubona ekinaatuuka ku mwanhina oyo.

⁵ Mperaano, mughala wa kyabazinga yaidha okunaaba mu mwiga. Abairu be abakazi baasigala nga batambulatambula ku mbali okw'omwiga. Yaja okubona, ng'abona ekiibo mu bitoogo ebyakulira ku mbali okw'omwiga yaatuma omwiru we omukazi yaakinona.

⁶ Omumbeedha bweyakisandukula ati, yaabonamu omwana omulenzi. Omwana yali ali kulira. Omumbeedha oyo yaamugemerwa ekivunika era yaakoba ati: “Ono ateekwa okuba nga mwana wa Baheburayi.”

⁷ Mwanhina w'omwana yaakoba omumbeedha ati: “Nje nkwetere omukazi Omuheburayi ayonse omwana oyo?”

⁸ Omumbeedha yaamwiramu ati: “Kale ja.” Omughala yaaja yaayeta inhina w'omwana mwenemwene.

⁹ Bwe yatuuka omumbeedha yaamukoba ati: “Twala omwana ono omuunhonkeze, ndikugha empeera yo.” Kale omukazi yaatwala omwana yaatoolera okumwonsa,

¹⁰ era bweyakula yaamwiriza omumbeedha mughala wa kyabazinga, oyo yaamufuula mwana we era yaamutuuma eriina Musa ati, “Kuba namutoola mu maadhi.”

Musa alumukira e Midia

¹¹ Lwali lulala nga Musa amaze okukulira irala, yaafuluma mu kisaagaati yaaja okubona ku bantu be Abaheburayi. Bwe yatuuka yaalingirira yaabona engeri ye baabakakanga okukola emirimo emikalangufu. Era yaabona Omumisiri ng'ali kukuba owundi ku bantu be abo, ate nga Musa yeena yali Muheburayi.

¹² Agho yaalingalinga eno n'ere nga ghazira ali kumubona, yaita Omumisiri oyo, omulambo gwe yaagugisa mu musenho.

¹³ Bwe yafuluma kabiri olunaku olwairirira, yaja okubona ng'ayagaana Abaheburayi babiri bali kulwana. Kyeyava n'abuuza ole eyali ali kufufunkiriza mwine ati: “Kale lwaki okuba Omuheburayi mwino?”

¹⁴ Ole yaamwiramu ati: “Koodhi naani eyakufuula omufuzi era omulamuzi waife? Oli kwenda kundhita ng'oti ni bwewaise Omumisiri idho?” Agho Musa yaatya inho ng'akoba mule ati: “Bwenebwene kye nakoze idho kyamanhiibwa.”

¹⁵ Kyabazinga bweyakiwulira yaayenda aite Musa. Aye Musa yaamulumukaku, yaaja yaasenga mu nsi ey'e Midia. Yaatuukira ku nsulo yaatyama.

¹⁶ Mperaano, kabona ow'e Midia yali ni baghala be musanvu, era boona baidha ku nsulo okwo okusena amaadhi baidhuze ebintu byaibwe ensolo mwe dhinhwera, baghange okunhwesa ebyayo bya lata waibwe.

¹⁷ Ghaidhagho abaayi baafufunkiriza abaghala abo nga babalobera amaadhi. Aye Musa yaasituka yaababeera, yaagha ebyayo byaibwe amaadhi.

¹⁸ Bwe bairayo ye lata waibwe Yethuro, yaababuuza ati: “Musoboire mutya okwira amangu mutyo olwaleero?”

¹⁹ Baamwiramu bati: “Ebaireyo omusaadha Omumisiri atuwoniiza abaayi ababaire bali kutulobera amaadhi, era yaatusenera n'amaadhi yaatugheera ebyayo byaife.”

²⁰ Lata waibwe yaababuuza ati: “Memale ali gha? Lwaki mumuleseeyo? Muje mumwete alye ku mere.”

²¹ Agho Musa yaabona ng'amaka ag'omusaadha oyo malungi ga kubaamu. Era omusaadha oyo yaamugha mughala we Zippori.

²² Zippori yaazaalira Musa omwana omulenzi, Musa yaamutuuma Gereshomu, ng'akoba ati, “Kuba mmuzaire nga ndi musenze ghano mu nsi etali yange.”

²³ Bwe ghaabitagho ekiseera ekireeyi, kyabazinga ow'e Misiri yaafa. Era mu kiseera ekyo ng'Abaisiraeli bali mu nnaku olw'okubakozesa ng'abairu. Era mu bulumi obwo nga balira n'enaku olw'okubula ow'okubayamba. Okulira kwaibwe okwo kwatuuka ku Katonda.

²⁴ Katonda yaawulira okulira kwaibwe, era yaidhukira endagaano ye ni Aburahamu, ni Isaaka era ni Yakobo.

²⁵ Katonda yaalingirira Abaisiraeli, yaamanha nga bali bubi, era yaabalumirwa.