Okuvaayo 18 - Baibuli Ekibono kya Katonda 2014

Yethuro akyalira Musa

¹ Yethuro omusaadha eyazaalanga muka Musa era nga kabona ow'e Midia, yaawulira byonabyona Katonda bye yakolera Musa, Abaisiraeli boonaboona, n'abantu be, bweyali ng'ali kubatoola mu Misiri.

² Mperaano, Musa yali yagheereza mukazi we Zippori ye Yethuro mukoirume we, era nga Yethuro yamutwala yaamukuuma

³ ghalala ni batabane bombi, Musa be yatuuma amaina gano: Gereshomu, ng'akoba ati, “Kuba mmuzaire nga ndi musenze ghano mu nsi etali yange”,

⁴ ni Eliezeri, ng'akoba ati: “Kuba Katonda wa badhaadha bange yaanhamba yamponia okwitibwa kyabazinga ow'e Misiri.”

⁵ Kale Yethuro oyo yaidha ni muka Musa, ni batabane ba Musa, mu irungu Musa n'Abaisiraeli ye baali nga basimbye weema dhaibwe ku lusozi lwa Katonda.

⁶ Yaamugheereza obukwenda ati: “Nze mukoirume wo Yethuro, ndi kwidha y'oli ni mukazi wo, ni batabane bo bombi.”

⁷ Musa yaaja yaakuba amakiryaivu yaamusangaaza, yaamala yaasituka, yaamunhwegera baalamusagania, olwo baingira mu weema ya Musa.

⁸ Musa yaaghayiraku mukoirume we ebyo byonabyona Musengwa Katonda bye yakola kyabazinga ow'e Misiri, ni bye yakola Abamisiri olw'okununula Abaisiraeli. Era yaamughayira ku bizibu bye baayagaana mu ngira, n'ensambo Musengwa Katonda ye yabawoniamu.

⁹ Yethuro yaasagamba olw'ebirungi byonabyona Musengwa Katonda bye yakolera Abaisiraeli okubatoola mu ngalo edh'Abamisiri.

¹⁰ Era yaakoba ati: “Musengwa Katonda oyo asaakibwe, eyabatoola mu ngalo dha kyabazinga ow'e Misiri, ni mu ngalo edh'Abamisiri.

¹¹ Buti ntegeire nga Musengwa Katonda wa maani okusinga bakatonda boonaboona, kuba yatoola abantu be mu ngalo edh'Abamisiri abaabeeyagalirangaku nga tibababonamu ka buntu.”

¹² Agho Yethuro yaataagho ekigheebwayo ekyokebwa kyonakyona okuwaagho, n'emisengo egindi egy'okughaayo eri Katonda. Aaroni n'abakulu ab'ebikunsu mu Isiraeli boonaboona baidha balya ni mukoirume wa Musa mu maiso ga Katonda.

Okulonda abakulembeze

¹³ Olunaku olwairirira Musa yaatyama okusalira abantu emisango, era abantu kamaala baaba agho ghe yali okuva ku nkyo, baazibya obwire.

¹⁴ Yethuro bweyabona ebyo byonabyona mukoirume we bye yali ng'ali kukolera abantu, yaamukoba ati: “Biki bino by'oli kukola. Lwaki obaagho wenka okusalira abantu emisango, abantu boonaboona ni bakwemereraku agho okuva ku nkyo ni bazibya obwire?”

¹⁵ Musa yaamwiramu ati: “Ndi n'okukola ntyo, kuba abantu baidha ye ndi okubuuza Katonda by'akoba ku nsonga edh'endhawulo.

¹⁶ Bwe ghabaagho abali n'obutaisania baidha ye ndi naabakobera ku bombi omutuufu n'omukyamu, nga mbakobera amateeka ga Katonda n'ebiragiro bye.”

¹⁷ Yethuro yaamukoba ati: “Ky'oli kukola ti kikalamu.

¹⁸ Oli kwerumya inho era waalumya n'abantu abo, kuba omulimo muzito inho okugukola wenka.

¹⁹ Mpulirisa nkughe ku magezi, era Katonda abe n'iwe! Iwe sigala ng'oli ghagati gha Katonda n'abantu, era ng'ensonga dhaibwe odhimutwalira okudhigondhoola.

²⁰ Beegese amateeka ga Katonda n'ebiragiro bye, era obaleetere okumanha engeri ye bateekwa okwebisaamu, ni bye bateekwa okukola.

²¹ Era linga mu bantu boonaboona obone abantu abali n'obusobozi, abatya Katonda, abeesigwa era abatenda kulya nguzi. Olondemu abasobola okukulembera abantu olukumi olukumi, n'abantu ekikumi ekikumi, n'abantu ataanu ataanu, n'abantu eikumi eikumi.

²² Leka abo n'ababe basalirenga abantu emisango gyaibwe buliidho. Bwe ghabaagho ensonga enkulu bagireetenga y'oli, aye ensonga entonotono dhoonadhoona badhimalenga. Kale iwe kiidha kukwanguyira kuba banaaba bakukendeziizaaku obuzito.

²³ Bw'onaakola otyo, era nga Katonda bw'ali kukulagira, oidha kuwona okwerumya, n'abantu boonaboona bairengayo ewaibwe ng'ensonga dhaibwe dhikoleibwaku.”

²⁴ Musa yaakozesa amagezi ago mukoirume we ge yamugha,

²⁵ yaalinga mu Baisiraeli boonaboona, yaalondamu abantu abali n'obusobozi, yaabafuula abakulembeze b'abantu olukumi olukumi, n'abantu ekikumi ekikumi, n'abantu ataanu ataanu, n'abantu eikumi eikumi.

²⁶ Abo baasaliranga abantu emisango buliidho. Emisango egyalinga emikalangufu nga bagitwalira Musa, aye emitonotono gyonagyona nga bagimala beene.

²⁷ Agho Musa yaasiibula mukoirume we, yaagolola ewuwe mu nsi ye.