Okuvaayo 17 - Baibuli Ekibono kya Katonda 2014

Musengwa Katonda agha abantu amaadhi okuva mu lubaale

¹ Abaisiraeli boonaboona baasimbuka okuva mu irungu eryetebwa Sina, baajanga nga basula mu bifo eby'endhawulo nga Musengwa Katonda bweyabalagiranga. Oluvainhuma baasimba weema dhaibwe e Refidimu, aye ate yaabulayo amaadhi ge basobola okunhwa.

² Kale beemuluguunhiza Musa nga bamukanda bati: “Ife tufunire amaadhi ag'okunhwa.” Musa yaabairamu ati: “Lwaki muneemuluguunhiza? Lwaki muleba Musengwa Katonda.”

³ Aye abantu olw'okuba baali ndiwo, nga bazira maadhi ga kunhwa, baaja mu maiso n'okwemuluguunhiza Musa nga baamukoba bati: “Lwaki watutoola e Misiri okutwisa endiwo, ife n'abaana baife, n'ensolo dhaife?”

⁴ Kale Musa yaalirira Musengwa Katonda ati: “Wo Musengwa Katonda, nkole ntya abantu bano? Babulaku katono okunkuba amabaale nfe.”

⁵ Musengwa Katonda yaamwiramu ati: “Toola abandi ku bakulu ab'ebikunsu mu Isiraeli, muje mwesookenga abantu emberi. Era ja n'omwigo gwo gwe wakuba ku mwiga Kiyira.

⁶ Nze ndidha kuba nga ndi eyo ku lusozi Horebu emberi waimwe. Oidha kukuba olubaale era amaadhi gaidha kuvaamu, abantu ge baghanga okunhwa.” Musa yaakola atyo ng'abakulu ab'ebikunsu mu Isiraeli babona.

⁷ Abantu abo Abaisiraeli beemuluguunhiza Musengwa Katonda era baamuleba nga bakoba bati: “Aye bwene Musengwa Katonda ali mu ife oba bbe?” Kale Musa kyeyava n'atuuma ekifo ekyo amaina gano: Massa, eritegeeza “okuleba”, ni Meriba, eritegeeza “Okwemuluguunhia”.

Olutalo n'Abamaleki

⁸ Agho Abamaleki baidha okulwana n'Abaisiraeli e Refidimu.

⁹ Musa yaakoba Yoshua ati: “Londayo abasaadha muje enkyo mulwane n'Abamaleki. Nze ndidha kuba ku mutwe ogw'olusozi nga ngemye omwigo Katonda gwe yankoba okuja nagwo.”

¹⁰ Yoshua yaakola nga Musa bweyamukoba, yaalwana n'Abamaleki Musa, ni Aaroni, ni Hura, baaja baaniina ku mutwe ogw'olusozi.

¹¹ Kiisi Musa lwe yaghanikanga omukono ng'Abaisiraeli banhigiriza Abamaleki, ate kiisi lwe yagwisanga ng'Abamaleki n'abanhigiriza Abaisiraeli.

¹² Aye Musa yaaluyirira emikono, kale Aaroni ni Hura baaleeta eibaale yaatyamaku, beene baamwemerera ku mbali ni ku mbali, baamugemerera emikono nga bagighaniike kale gyaba nga giri ghaigulu okutuusa endhuba okugwa.

¹³ Mu nsambo eyo yaaghangula Abamaleki.

¹⁴ Musengwa Katonda yaakoba Musa ati: “Obughanguzi obwo bughandiike mu kitabo bulobe kwerabirwa. Era okobere Yoshua oti ndidha kuzikiriza Abamaleki mbamaliregho irala.”

¹⁵ Musa yaazimba alutaari yaagituuma eriina “Musengwa Katonda ni bendera yange.”

¹⁶ Era yaakoba ati: “Mughanike ebendera ya Musengwa Katonda ghaigulu inho. Musengwa Katonda aidha kulwananga n'Abamaleki buli luse olunairangagho.”