Okuvaayo 16 - Baibuli Ekibono kya Katonda 2014

Mannu n'obunhonhi obuli ng'oti bukologo

¹ Abaisiraeli boonaboona baasimbuka okuva e Elimu, baaja baatuuka mu irungu eryetebwa Sina, eriri ghagati gha Elimu ni Sinai. Abaisiraeli abo baatuuka mu irungu lino ku lunaku olweikumi n'eitaanu olw'omwezi ogwokubiri, okuva ku lunaku lwe baaviiraku e Misiri.

² Abaisiraeli abo beemuluguunhiza mu irungu nga bakoba Musa ni Aaroni bati:

³ “Nguli Musengwa Katonda yatwitira mu Misiri ye twatyamanga ku nsaka edh'emamba ni ku biiwulo eby'emere, ni tulya ni twiguta, ekyo n'ekyandisinzeeku imwe okutuleeta mu irungu lino twenatwena tulambukire muno endhala.”

⁴ Agho Musengwa Katonda yaakoba Musa ati: “Bona eno, nja kumagalisa emere okuva mu igulu ku lwaimwe. Era abantu baidha kujanga buli lunaku basoloze enaabamalanga olunaku olwo. Mu nsambo oti n'eyo ndidha kubaleba mbone oba nga banaajiira ku biragiro byange.

⁵ Ku lunaku olwomukaaga, obungi obw'emere ye banaasolozanga bwidha kubanga bwa mikuzi ebiri okusinga bwe banaasolozanga ku nnaku edhindi.”

⁶ Kale Musa ni Aaroni baakobera Abaisiraeli boonaboona bati: “Eigulo lino mwidha kukakasa nga Musengwa Katonda n'eyabatoola mu Misiri.

⁷ Enkyo ku nkyo mwidha kubona ekitiisa kya Musengwa Katonda, kuba awuliire bye mumwemuluguunhiaku buliidho. Okwemuluguunhia okwo tikusobola kwidha ku ife, kuba katyo ife niife baani?”

⁸ Era Musa yaabakoba ati: “Ogw'eigulo Musengwa Katonda aidha kubagha emamba ey'okulya, era enkyo abaghe emere mulye mwigute, kuba Musengwa Katonda oyo awuliire bye mumwemuluguunhiamu. Bwe mwemuluguunhia muba timuli kukoba ife, aye muba muli kukoba Musengwa Katonda, kuba katyo ife niife baani?”

⁹ Agho Musa yaakoba Aaroni ati: “Koba abantu Abaisiraeli boonaboona oti, ‘Museete eno ye Musengwa Katonda, kuba awuliire okwemuluguunhia kwaimwe.’ ”

¹⁰ Aaroni bweyali ali kwogera eri Abaisiraeli, baaja okulinga bati mu irungu, nga babona ekitiisa kya Musengwa Katonda nga kibonekera mu kire.

¹¹ Era Musengwa Katonda yaakoba Musa ati:

¹² “Mpuliire okwemuluguunhia okw'abantu Abaisiraeli. Bakobe oti, ‘Eigulo mwidha kulya mamba, era enkyo mulye emere mwigute, olwo mutegeere nga ninze Musengwa Katonda waimwe.’ ”

¹³ Eigulo eryo, obunhonhi obuli ng'oti bukologo bwaidha bwagwa ghe baasimba weema dhaibwe bwaidhula buli ghantu, era mu nkyo omusulo gwagwa gwabunia buli ghantu okwezungulula weema dhaibwe.

¹⁴ Omusulo bwe gwakala, gwalekagho agho ku musenho ogw'omu irungu olubwibwi olugheghere oluli ng'oti n'engaano enhukiibwa.

¹⁵ Abaisiraeli bwe baalubona beebuuzagania beene na beene bati: “Kino ki?” Musa yaabairamu ati: “Eyo n'emere Musengwa Katonda y'abaghaire okulya.

¹⁶ Musengwa Katonda alagiire ati buli muntu aidha kusoloza ku mere eyo obungi bw'asobola okulya. Era asoloze akaibo kalala kalala babiri babiri olwa buli muntu ali mu weema ye.”

¹⁷ Abaisiraeli baakola batyo abandi baasoloza kamaala, abandi baasoloza ntono.

¹⁸ Aye bwe baagipima mu bwibo, beeyagaana ng'eyasoloza enhingi yafuna obungi obumumala, n'eyasoloza entono nga yeena yafuna obungi obumumala buli muntu yasoloza obungi bw'aghanga okulya.

¹⁹ Era Musa yaabakoba ati: “Ezira muntu kuterekaku ku mere eyo okutuusa enkyo.”

²⁰ Aye abandi baaloba kuwulira bye yabakoba, baaterekaku emere eyindi aye okutuuka enkyo ng'eidhiemu enhengere era ng'ewunha bubi. Musa yaabanakughalira.

²¹ Buli ku nkyo nga basoloza buli muntu obungi bw'asobola okulya, aye akasana bwe kaayakanga einho ng'emere eyo esaanuuka.

²² Olunaku olwomukaaga, baasoloza obungi bwa mannu bwa mikuzi ebiri okusinga ye baasolozanga ku nnaku edhindi obwibo bubiri bubiri ku lwa buli muntu. Abakulu ab'ebikunsu mu Isiraeli bwe baakobera Musa ekintu ekyo,

²³ Musa yaabakoba ati: “Musengwa Katonda yalagira olwenkyo lube olunaku olw'okuwuumulira irala eyo ni Sabbato ya Musengwa Katonda entukuvu. Kale mannu yoonayoona mugifumbe lwaleero, nga mugigoya oba nga mugitogosa. Etaaliibwe lwaleero mugitereke, mugirye olwaidho.”

²⁴ Kale baaterekaku eyindi okutuuka enkyo nga Musa bweyabakoba, era tiyawunha, waire okwidwamu enhengere.

²⁵ Musa yaabakoba ati: “Eyo ni mannu ye mube mulye olwaleero, kuba olwaleero Sabbato ya Musengwa Katonda, timwidha kufuna mere yindi yoonayoona ku luya.

²⁶ Mwidha kugisolozanga okumala enaku mukaaga, aye ku lwomusanvu, olwa Sabbato, teidha kubangayo.”

²⁷ Agho ku lunaku olwomusanvu ghaabaagho abaagezaaku okuja okusoloza emere eyo, aye tibaayagaanayo kintu kyonakyona.

²⁸ Musengwa Katonda yaakoba Musa ati: “Mulirekera li okudheemera amateeka gange n'ebiragiro?

²⁹ Bona eno, nze Musengwa Katonda nabagha Sabbato, era kyenva ni mbagha emere emala enaku eibiri ku lunaku olwomukaaga. Kale ku lunaku olwomusanvu buli muntu asigale ghaka aghazira kuja kukola mulimo gwonagwona.”

³⁰ Kale ku lunaku olwomusanvu baaloba kukola mulimo gwonagwona.

³¹ Abaisiraeli baayeta emere eyo mannu, ng'eri ng'oti kamuuma akatono ate nga keeru, era ng'ewooma ng'oti n'emigaati emitono gye bafumbiramu omudheenene.

³² Musa yaakoba ati: “Musengwa Katonda yatulagira tulekeghooku akaibo aka mannu, tukaterekere abaana n'abaidhukulu abaliiragho, babone ku mere Musengwa Katonda ye yatughanga nga tuli mu irungu, lwe yatutoola mu Misiri.”

³³ Agho Musa yaakoba Aaroni ati: “Funayo ekidoome, ofukemu akaibo ka mannu, memale okite mu maiso ga Musengwa Katonda olw'okuterekera abaana n'abaidhukulu abaliiragho.”

³⁴ Kale nga Musengwa Katonda bweyalagira Musa, Aaroni bweyakola, yaatoola ekidoome yaakita aghali Sanduuku ey'Endagaano, kiterekebwe.

³⁵ Abaisiraeli baalya mannu okumala emyaka amakumi ana, okutuusa lwe baatuuka mu nsi ey'e Kanaani ghe baafuula obutaka bwaibwe.

³⁶ (Okusinziira ku bipimo ebitongole ebyaligho mu biseera ebyo, ng'akaibo akalala kajaamu kilo ng'oti ndala ey'obuse.)