Okuvaayo 15 - Baibuli Ekibono kya Katonda 2014

Olwembo olw'okusiima n'okusaaka Musengwa Katonda

¹ Musa n'Abaisiraeli abandi baayembera Musengwa Katonda olwembo luno, olukoba luti: “Ka nhembere Musengwa Katonda, kuba aghangwire n'ekitiisa; aswire embalaasi n'abavuzi baadho mu nhandha.

² Bwemba ni Musengwa Katonda nfuna amaani n'okwemba naayemba; Musengwa Katonda oyo amponia abazigu. Oyo ni Katonda wange era ndidha kumusaakanga. Oyo ni Katonda wa lata wange era mmugulumiza.

³ Musengwa Katonda mulwani wa ntalo, eriina lye ni Musengwa Katonda.

⁴ Yasuula abalwani ba Misiri n'ebigaali byaibwe eby'omu lutalo mu nhandha; abaduumizi ba Misiri abaasinganga okwesigibwa, baasaanagho mu maadhi.

⁵ Amaadhi gaabamira; baika ku ntobo ey'enhandha ng'oti mabaale.

⁶ Wo Musengwa Katonda, omukono gwo omusaadha gukola eby'amaani ebitaloodheka; gutentena omuzigu gwamukutulakutula.

⁷ Ng'oli mu kitiisa kyo eky'obwakyabazinga oghangula abazigu bo; obasindikira ekiruyi kyo kyabamamula ng'oti n'omuliro bwe gumamula eisubi eikalu.

⁸ Wafuuwa omuuka okuva mu nhindo yo amaadhi geebunga emungo, amaadhi amangi gaayemerera ng'oti kimante; amaadhi ag'oku ntobo ey'enhandha geegema, gaakalanguka ng'oti ibaale.

⁹ Omuzigu yaakoba mule ati, ‘Ka mbabinge ndidha kubaagaana, ndidha kubatoolaku omunhago nga bwe naaba nhenze; ndidha kutoolayo empiima yange mbazikirize.’

¹⁰ Wafuuwa amaadhi gairagho gaabasaaniagho; baadimira mu maadhi amangi ng'oti byuma bizito.

¹¹ Wo Musengwa Katonda, mu bakatonda boonaboona, naani ali ng'oti niiwe? Naani ali n'obutukuvu obutiisa ng'oti niiwe? Naani aghanga okukola ebintu ebyewuunhisa era ebyoleka amaani ng'oti niiwe?

¹² Waghanika omukono gwo omusaadha, ensi yaamira Abamisiri abazigu bo.

¹³ Waatambuza abantu bo be wanunula ng'obooleka okugonza okutakoma. Wabagema ku mukono n'omukono gwo ogw'amaani waabatuusa gh'oba aghatukuvu.

¹⁴ Amaghanga gaabiwulira gaadhugumira olw'okutya. Abantu ab'omu Filisitia baalumwa emyoyo olw'okweraliikirira.

¹⁵ Ab'obuyinza ab'omu Edomu baatya inho; abafuzi ab'omu Moabu baatengera; abantu ab'omu Kanaani baazirika.

¹⁶ Baatya baawaamu, olw'ebyo omukono gwo bye gwakola eby'amaani. Baaba agho nga basiriike ng'oti mabaale, okutuusa abantu bo, Iwe Musengwa Katonda, bwe baabitagho; abantu bo be watoola mu bwiru.

¹⁷ Obaleeta waabata ku lusozi lwo, ekifo Iwe Musengwa Katonda kye weerondera nga mw'onaabanga, eisinzizo iwe mwene lye wataagho.

¹⁸ Musengwa Katonda ni kyabazinga aidha okufuganga ebyanda n'ebyanda.”

Olwembo lwa Miriamu

¹⁹ Abaisiraeli baabita mu nhandha ghagati nga batambulira ku itaka ikalu. Aye ebigaali eby'Abamisiri eby'omu lutalo, n'embalaasi dhaaku, n'abavuzi baadho bwe bangira mu nhandha, Musengwa Katonda yaiza amaadhi g'enhandha mu kifo kyago era gaabasaaniagho.

²⁰ Agho Miriamu omulanzi omukazi era mwanhina Aaroni, yaatoola akagoma yaakagema mu ngalo, n'abakazi abandi boonaboona baagema obugoma, baamunonereza nga babukuba bwe bakina.

²¹ Miriamu yaabakulemberamu ati: “Leka nhembere Musengwa Katonda, kuba aghangwire n'ekitiisa, aswire embalaasi n'abavuzi baadho mu nhandha.”

Amaadhi agakaagha

²² Agho Musa yaalagira Abaisiraeli batambule bave agho ku Nhandha Emyufu beeyongereyo mu irungu eryetebwa Shura. Baatambulira enaku isatu mu irungu nga tibatuukaku ghali maadhi.

²³ Bwe baatuuka e Mara, baayagaana amaadhi ge bataaghanga kunhwa olw'okuba gaali maka eyo n'ensonga eyayetesa ekifo ekyo Mara.

²⁴ Abantu beemuluguunhia nga babuuza Musa bati: “Olwo mperaano ife tunaanhwa ki?”

²⁵ Musa yaalirira Musengwa Katonda, era Musengwa Katonda yaamwoleka omuti. Musa yaasuula omuti ogwo mu maadhi, amaadhi gaawooma. Mu kifo ekyo era Musengwa Katonda yaabagheeragho amateeka n'ebiragiro, era yaabaleba.

²⁶ Musengwa Katonda yaabakoba ati: “Bwe muliba abawulize obulungi bwene, nga mukola ebyo ebituufu ye ndi, era nga mugondera amateeka gange n'ebiragiro, tija kubabonereza na bulwaire ku obwo bwe nasindikira Abamisiri. Kuba ninze Musengwa Katonda abawonia endwaire.”

²⁷ Agho baaja baatuuka mu Elimu eyali ensulo eikumi n'ebiri, n'emiti eminaazi ensanvu, baasimba weema dhaibwe agho aghaali amaadhi.