Okuvaayo 14 - Baibuli Ekibono kya Katonda 2014

Okusomoka Enhandha Emyufu

¹ Agho Musengwa Katonda yaakoba Musa ati:

² “Koba Abaisiraeli bakyuke baje basimbe weema dhaibwe emberi wa Pihahirothi ghagati gha Migidoli n'enhandha, era emberi w'ekibuga Baaluzefoni nga bali kumpi nakyo.

³ Nhenda kyabazinga alowooze ati, ‘Buti Abaisiraeli amagezi gabeesibye bazira ghe baja, eirungu tiriri kubaganha kuja mberi.’

⁴ Mu kiseera n'ekirala ndidha kumukalangusa omwoyo alobe kutya, atoolere okubabinga ng'ayenda okubagema, aye kye nja okukola kyabazinga n'abalwani be kija kumpeesa ekitiisa, era Abamisiri balimanha nga ninze Musengwa Katonda.” Abaisiraeli baakola nga Musengwa Katonda bweyabakoba.

⁵ Abantu bwe baakobera kyabazinga ow'e Misiri bati Abaisiraeli beibyegho, kyabazinga oyo n'abakungu be baakyusa emyoyo gyaibwe, baawulira nga babaire bakeetaaga Abaisiraeli, n'okukoba bati: “Tukoze ki kino? Tulese Abaisiraeli baatweibaku, baalekera okuba abairu baife?”

⁶ Kale kyabazinga yeetegeka n'ekigaali kye eky'omu lutalo n'abalwani be boonaboona.

⁷ Yaalonda ebigaali eby'omu lutalo lukaaga bye yasinganga okwesiga, era n'ebigaali ebindi byonabyona eby'omu lutalo ebya Misiri nga byonabyona biriku abaduumizi.

⁸ Musengwa Katonda yaakalangusa omwoyo gwa kyabazinga ow'e Misiri yaaloba kutya, yaatoolera okubinga ng'ayenda okugema Abaisiraeli abaali bali kutambula nga ghazira kye batya.

⁹ Abalwani ba Misiri boonaboona, n'embalaasi dhaibwe dhoonadhoona, n'ebigaali byaibwe eby'omu lutalo, n'abavuzi boonaboona, baabingirira Abaisiraeli baabaagaana nga basimbye weema dhaibwe ku mbali kw'enhandha, kumpi n'ekibuga Pihahirothi emberi wa Baaluzefoni.

¹⁰ Abaisiraeli baaja okulinga bati, baalengera kyabazinga wa Misiri n'abalwani be boonaboona nga bali kubaidhira. Agho baatya ebitoogerekeka era baalirira Musengwa Katonda abayambe.

¹¹ Beemuluguunhiza Musa nga bakoba bati: “Lwa kuba mu Misiri yali ezira magombe ganditumaze kutuziikamu, kye wava n'otutoolayo twidhe tufiire eno mu irungu? Watukola ki kino okututoola mu Misiri?

¹² Ebyo ti bye twakukoba nga tukaali mu Misiri? Ife twali tukukobye otuleke tusigale nga tukaali bairu ba Bamisiri. Okusigala nga tukolera Abamisiri, kyandisinzeeku okwidha okufiira eno mu irungu.”

¹³ Aye Musa yaabairamu ati: “Mutatya, imwe mube bube bagumu, mwidha kubona Musengwa Katonda ky'anaakola okubawonia Abamisiri abo olwaleero luno. Kuba Abamisiri abo be muli kubona olwaleero timuja kwirayo kubabona kabiri.

¹⁴ Musengwa Katonda aja kubalwanirira, kale imwe musirike busirike.”

¹⁵ Musengwa Katonda yaakoba Musa ati: “Lwaki oli kundirira okubayamba? Koba abantu beeyongereyo mu lugendo lwaibwe.

¹⁶ Iwe toola omwigo gwo, ogusonke ku nhandha, amaadhi gaidha kwegabaniamu ghabiri, Abaisiraeli baghange okubita mu nhandha nga batambulira ku itaka ikalu.

¹⁷ Ndidha kukalangusa emyoyo egy'Abamisiri balobe kutya, boona bangire mu nhandha nga bababingirira, aye kye nja okukola kyabazinga n'abalwani be boonaboona, n'ebigaali bye eby'omu lutalo, n'abavuzi be ab'embalaasi, kija kumpeesa ekitiisa.

¹⁸ Era bwe nnaamala okufuna ekitiisa ekyo olw'ekyo kye nja okubakola, Abamisiri baidha kumanha nga ninze Musengwa Katonda.”

¹⁹ Malaika wa Katonda eyakulemberangamu Abaisiraeli yaakyuka yaabaira einhuma, n'ekire ekiri ng'oti mpango kyona kyava emberi waibwe kyabaira einhuma

²⁰ agho kyaba nga kiri ghagati gh'Abaisiraeli n'Abamisiri. Ekire ekyo kyakolera Abamisiri enzikiiza, aye kyagha Abaisiraeli obutangaavu. Obwire obwo bwabita nga ebikunsu byombi tibituukagaineeku.

²¹ Agho Musa yaagolola omukono ng'agusonse ku nhandha. Musengwa Katonda yaasindika empewo ey'amaani eva e buvandhuba, yaayeyaagho amaadhi ag'enhandha obwire bwonabwona. Amaadhi geeyawulamu, aghabaire enhandha ghaafuuka itaka ikalu.

²² Abaisiraeli baingira mu nhandha nga batambulira ku itaka ikalu, ng'amaadhi geebunze ku mbali ni ku mbali ng'oti bimante.

²³ Abamisiri boona baingira mu nhandha nga bali kubabinga n'embalaasi dha kyabazinga dhoonadhoona, n'ebigaali bye eby'omu lutalo, n'abavuzi be.

²⁴ Aye agho obwire nga buli kumpi okukya, Musengwa Katonda ng'ali mu muliro n'ekire, ebiri ng'oti mpango, yaalinga ghansi ku Bamisiri yaabaleetera okutya n'okusoberwa.

²⁵ Yaaleetera enkede edh'ebigaali byaibwe eby'omu lutalo okwesiba, byaloba kutambula bukalamu. Abamisiri baakoba bati: “Musengwa Katonda ali kulwaniragho Abaisiraeli. Mukole tuve ghano tubalumuke.”

²⁶ Agho Musengwa Katonda yaakoba Musa ati: “Ghanika omukono ng'ogusonse ku nhandha, amaadhi gaire ku Bamisiri, ni ku bigaali byaibwe eby'omu lutalo, ni ku bavuzi baibwe.”

²⁷ Kale Musa yaaghanika omukono ng'agusonse ku nhandha, amaadhi gaatoolera okwira era bwaja okukya nga gali mu kifo kyago ekyabuliidho. Abamisiri baagezaaku okulumuka okuva mu maadhi, aye Musengwa Katonda yaabadimiza mu nhandha ghagati.

²⁸ Amaadhi gairagho gaasaaniagho ebigaali eby'omu lutalo, n'abavuzi ab'embalaasi, n'abalwani ba kyabazinga boonaboona abaanonereza Abaisiraeli mu nhandha ghazira naire mulala ati eyasigalagho.

²⁹ Aye nga Abaisiraeli baabita mu nhandha nga batambulira ku itaka ikalu, ng'amaadhi geebunze ku mbali ni ku mbali ng'oti bimante.

³⁰ Atyo Musengwa Katonda bweyawonia Abaisiraeli ng'abatoola mu buyinza bw'Abamisiri, era Abaisiraeli baabona emirambo gy'Abamisiri nga giri agho ku mbali okw'enhandha.

³¹ Abaisiraeli bwe baabona amaani agataloodheka Musengwa Katonda ge yakozesa okughangula Abamisiri, baamutya inho baamwikiriza era baikiriza n'omugheereza we Musa.