Okuvaayo 13 - Baibuli Ekibono kya Katonda 2014

Okughaayo abaana ababeri babe aba Musengwa Katonda

¹ Musengwa Katonda yaakoba Musa ati:

² “Mugheeyo abaana ababeri boonaboona babe bange, kuba kiisi ekinaazaalibwanga mu luzaalo olusooka mu Baisiraeli, k'abe omuntu oba ensolo, kinaabanga kyange.”

Ekibinuko eky'Emigaati Egitazimbulukusiibwa

³ Musa yaakoba abantu ati: “Mwidhukirenga olunaku luno lwe mwaviiraku mu Misiri, ye mwabanga nga muli bairu. Luno n'olunaku Musengwa Katonda lwe yabatoolera mu nsi eyo, ng'akozesa amaani ge agataloodheka. Mutaluliirangaku migaati gizimbulukusiibwa.

⁴ Olunaku luno lwe muli kuviiraku mu Misiri, luli mu mwezi ogusooka ogwetebwa Abibu.

⁵ Era Musengwa Katonda bw'alibatuusa mu nsi ey'Abakanaani, n'Abahitti, n'Abamori, n'Abahivi, n'Abayebusi, ensi ye yalayirira badhaadha baimwe ng'aja kugigha imwe, mukuzanga olunaku luno mu mwezi guno. Ensi eyo ngimu era erimu ebirungi kamaala.

⁶ Mwidha kumalanga enaku musanvu nga mulya migaati egitazimbulukusiibwa gyonka, era ku lunaku olwomusanvu mwidha kukuzanga ekibinuko eky'okusiima Musengwa Katonda.

⁷ Emigaati egitazimbulukusiibwa ni gyonka eginaalibwanga okumala enaku omusanvu; ezira muntu ku imwe anaikirizibwanga kuba na mugaati oguzimbulukusiibwa era ezira kizimbulukusa kinaikirizibwanga kubonebwa na muntu yeenayeena ow'omu kiketezo kyaimwe.

⁸ Ku lunaku olwo olw'ekibinuko, mwidha kwinhonholanga abaana baimwe muti, ‘Tulukuza olw'ebyo Musengwa Katonda bye yatukolera lwe twava mu Misiri.’

⁹ Era lwidha kubabeereranga kamanhiso ng'oti n'omuntu k'ata ku mukono, era lubabeerenga ekiidhukizo ng'oti n'omuntu ky'asiba mu bweni, olwo amateeka ga Musengwa Katonda galobenga kubava ku minwa; kuba Musengwa Katonda yabatoola mu Misiri ng'akozesa amaani ge agataloodheka.

¹⁰ Kale mwidha kukuzanga olunaku olwo mu biseera bya lwo buli mwaka.

Ebigema ku mwana omuberi

¹¹ “Musengwa Katonda bw'alibatuusa mu nsi ey'Abakanaani nga bweyalayirira imwe ni badhaadha baimwe, n'agibagha,

¹² mughangayo abaana abalenzi ababeri boonaboona baaba ba Musengwa Katonda. Era n'ensolo enume edhaazaalibwa mu luzaalo olusooka dhoona dha Musengwa Katonda.

¹³ Endogoyi enume ezaalibwa mu luzaalo olusooka, muginunulanga nga mughaayo entaama ento. Aye bwe mubanga nga timuginunwire muginiolanga enkoto, yaafa. Era n'omwana omulenzi omuberi munaamununulanga mu nsambo n'endala.

¹⁴ Era mu biseera eby'omu maiso eyo, abaana baimwe bwe balibabuuzanga bati, ‘Kino kitegeeza ki?’ Mubainhonholanga muti, ‘Musengwa Katonda yatutoola mu Misiri mu bwiru ng'akozesa amaani ge agataloodheka,

¹⁵ kuba kyabazinga ow'e Misiri bweyakalanguka omwoyo n'aloba okutuleka tuve mu Misiri, Musengwa Katonda yaita abaana abalenzi ababeri boonaboona ab'Abamisiri era yaita n'ensolo dhaibwe enume dhoonadhoona edhaazaalibwa mu luzaalo olusooka. Kale kye tuva ni tughaayo eri Musengwa Katonda omusengo ogw'ensolo enume dhoonadhoona edhizaalibwa mu luzaalo olusooka aye abaana baife ababeri boonaboona tubanunula.’

¹⁶ Ako n'akaidha okubanga akamanhiso akanaabanga ku mikono oba mu bweni okutwidhukiza nga Musengwa Katonda bweyatutoola mu Misiri ng'akozesa amaani ge agataloodheka.”

Ekire n'omuliro ebiri ng'oti mpango

¹⁷ Kyabazinga ow'e Misiri bweyaleka Abaisiraeli ni baja, Katonda tiyababisa mu ngira ebita mu nsi ey'Abafilisiti waire nga n'eyali ey'okumpi, kuba Katonda yamanha ng'Abaisiraeli basobola okukyuka bairayo e Misiri, bwe babona ng'okuja emberi baba bali n'okulwana olutalo.

¹⁸ Kale yaababisa mu ngira ey'okwekooloobya mu irungu nga boolekeire Enhandha Emyufu. Abaisiraeli okuva mu Misiri baali beetegefu okulwana olutalo.

¹⁹ Bwe baali bava mu Misiri Musa yaaja n'amagumba ga Yosefu, kuba Yosefu oyo ng'akaali kufa yabalayiza ati: “Katonda bw'alibatoola mu Misiri muno, mujanga n'amagumba gange.”

²⁰ Agho Abaisiraeli baava e Sukkothi baatambula baatuuka mu Ethamu ku mbali okw'eirungu, baasimba agho weema dhaibwe.

²¹ Musengwa Katonda yaabayambanga basobole okutambula omusana n'obwire: omusana yabakulemberangamu ng'ali mu kire ekiri ng'oti mpango okubooleka engira ye babe babitemu, ate obwire yaabanga mu muliro oguli ng'oti mpango okubamuliikirira.

²² Omusana, ng'ekire ekiri ng'oti mpango tikibulagho okubakulemberamu, ate buli bwire ng'omuliro oguli ng'oti mpango gwona tigubulagho okubakulemberamu.