Okuvaayo 12 - Baibuli Ekibono kya Katonda 2014

Ekibinuko eky'Okwidhukiriraku Okubitizibwa

¹ Musengwa Katonda yaakoba Musa ni Aaroni nga bali mu Misiri ati:

² “Mwidha kutwalanga omwezi guno nga n'ogwinhama omwaka.

³ Era kobera Abaisiraeli boonaboona nga beesoloiza, oti omwezi guno ng'enaku ikumi, kiisi musaadha wa maka aidha kutoola entaama ento oba embuzi ento olwa ab'omu maka ge.

⁴ Ab'omu maka ge bwe baba nga batono nga tibamalaagho ntaama eyo oba mbuzi eyo, aidha kweyimba ku muliraanwa we, bagabane ensolo ndala nga buli maka gatwala emamba emala abantu abagalimu.

⁵ Entaama oba embuzi ye muba musazeegho okwita, eteekwa kuba nga nume ey'omwaka omulala era ng'eziraku kikyamu kyonakyona.

⁶ Ensolo eyo mugikuume okutuusa ku lunaku olweikumi n'eina olw'omwezi guno. Olwo eigulo ery'olunaku olwo Abaisiraeli boonaboona baite ensolo dhoonadhoona dhe baakuuma olw'olunaku olwo.

⁷ Agho batoole ku musaayi gwadho bagusiige ku myango egy'emiryango egy'endhu eriirwamu ensolo edho ku gy'omu mbali gyombi, ni ku gwa ghaigulu.

⁸ Obwire obwo emamba eri n'okwokebwa ku muliro, eriibwe n'emigaati egitazimbulukusiibwa era n'eiva erikaagha.

⁹ Mutagiryangaku mbisi oba ntogose mu maadhi, eri na kuba ndhokye yoonayoona: omutwe, amagulu era n'ebyenda.

¹⁰ Era ghatabangagho mamba ye mulekagho kutuusa nkyo. Emamba yoonayoona esigalagho okutuusa enkyo eri na kwokebwa n'omuliro.

¹¹ Mugiryanga mu bwangu era nga mumaze n'okuvaalira irala ng'abaja mu lugendo, nga muvaire engaito mu bigere, mugemye n'omwigo mu ngalo. Ekyo n'Ekibinuko eky'Okubitizibwa eky'okwebaza nze Musengwa Katonda olw'okubabitiza,

¹² kuba obwire obwo ndidha kubita mu Misiri nje nga ndhita abaana abalenzi ababeri boonaboona Abamisiri. Era ndhite n'ensolo dhaibwe enume dhoonadhoona edhaazaalibwa mu nzaalo edhisooka. Era ndidha kubonereza emisambwa egy'omu Misiri gyonagyona. Ninze Musengwa Katonda.

¹³ Aye imwe, omusaayi gwe munaasiiga ku myango, n'akanaaba akamanhiso akooleka endhu dhe mulimu. Bwe nnaabonanga omusaayi, ndidha kubabitizanga. Era ezira kibamba kiribagwaku kubazikiriza lwe ndikuba Misiri.

¹⁴ “Olunaku olwo, mwidha kulwidhukiranga era mulukuzenga nga mukola ekibinuko ekyoleka okusiima kwaimwe eri nze Musengwa Katonda. Ense n'ense edhiriiragho dhiri n'okulukuzanga, era kino kiragiro ekiri n'okugonderwa ebyanda n'ebyanda.”

Ekibinuko eky'Emigaati Egitazimbulukusiibwa

¹⁵ “Mwidha kumalanga enaku musanvu nga mulya migaati egitazimbulukusiibwa gyonka. Ku lunaku olusooka mu edho omusanvu, muli n'okutoola mu ndhu dhaimwe kiisi kizimbulukusa kyonakyona. Omuntu yeenayeena anaalyanga omugaati oguzimbulukusiibwa mu nnaku edho omusanvu, anaabanga nga takaabalirwa mu Baisiraeli.

¹⁶ Ku lunaku olusooka ni ku lwomusanvu mu nnaku edho, muneesolozanga olw'okunsinza nze Musengwa Katonda. Era mu nnaku edho mutakolerangamu mulimo gwonagwona okutoolaku okutegeka emere yaimwe ey'okulya.

¹⁷ Mwidha kukuzanga Ekibinuko eky'Emigaati Egitazimbulukusiibwa, kuba ku lunaku lwene olwo ni kwe natooleraku olukunkumuli lwaimwe Abaisiraeli mu Misiri. Kale muli n'okulukuzanga imwe n'ense dhoonadhoona edhiriiragho. Kino kiragiro ekiri n'okugonderwa ebyanda n'ebyanda.

¹⁸ Okuva eigulo ery'olunaku olweikumi n'eina olw'omwezi ogusooka, okutuusa eigulo ery'olunaku olwabiri n'olulala olw'omwezi gwene ogwo, mwidha kulyanga emigaati egitazimbulukusiibwa.

¹⁹ Mwidha kumalanga enaku musanvu nga timuba na kizimbulukusa mu ndhu dhaimwe. Era omuntu yeenayeena anaalyanga omugaati oguzimbulukusiibwa mu nnaku edho, anaabanga nga takaabalibwa nga Muisiraeli, k'abe musenze oba Muisiraeli.

²⁰ Mutalyanga mugaati gwonagwona mu ndhu dhaimwe oguzimbulukusiibwa. Mulyenga migaati gitazimbulukusiibwa gyonka.”

Musa alagirira abantu eky'okukola

²¹ Agho Musa yaayetesa abakulu ab'ebikunsu mu Isiraeli yaabakoba ati: “Buli muntu atoole mu byayo bye entaama oba embuzi ento ndala, eja mu bantu ab'omu maka ge, agiite ng'ekigheebwayo olw'okwidhukiriraku Okubitizibwa.

²² Bw'amala atoole akasaga ak'akati akeetebwa hissopu akainhike mu musaayi ogw'ensolo eyo nga guli mu kibya, agusiige ku myango egy'omulyango ogw'endhu ye ku gy'omu mbali gyombi ni ku gwa ghaigulu. Era ghatabaagho afuluma kuva mu ndhu ye okutuusa nga bukyeire,

²³ kuba Musengwa Katonda aja kubita mu Misiri ng'aita abaana abalenzi ababeri ab'Abamisiri. Kale bw'anaabonanga omusaayi ku myango, aidha kubitizanga omulyango ogwo alobe kuganha lumbe kwingira mu ndhu dhaimwe kubaitaku baana baimwe.

²⁴ Mwidha kukolanga omukolo ogwo ng'ekiragiro ekiri n'okugonderwanga imwe, n'abaana, n'abaidhukulu, ebyanda n'ebyanda.

²⁵ Era bwe mutuukanga mu nsi Musengwa Katonda ye yasuubiza okubagha, mutalobanga kukuza mukolo ogwo.

²⁶ Abaana baimwe bwe bababuuzanga bati, ‘Guno omukolo gutegeeza ki?’

²⁷ Mubairangamu muti, ‘Ogwo n'omusengo ogugheebwayo olw'okwebaza Musengwa Katonda olw'Okutubitiza, kuba yabitiza endhu edh'Abaisiraeli nga tuli mu Misiri, lwe yaita abaana abalenzi ababeri ab'Abamisiri n'atulekera abaife nga balamu.’ ” Agho Abaisiraeli baakuba amakiryaivu baasinza Musengwa Katonda.

²⁸ Baaja baakola nga Musengwa Katonda bweyalagira Musa ni Aaroni.

Musengwa Katonda aita abaana abalenzi ababeri ab'Abamisiri

²⁹ Mu bwire ghagati Musengwa Katonda yaita abaana abalenzi ababeri boonaboona ab'Abamisiri, okuviira irala ku muberi wa kyabazinga, ali ku kityamo kye eky'obwakyabazinga, okutuukira irala ku muberi ow'omusibe ali mu ikomera. Era yaita n'ensolo dhoonadhoona enume edhaazaalibwa mu nzaalo edhaasooka.

³⁰ Obwire obwo, kyabazinga, n'abakungu be, n'Abamisiri boonaboona, baasituka, ghaabaagho okulira okw'amaani mu Misiri mwonamwona, kuba tighaabaagho ndhu ya Mumisiri etaalimu mufu.

³¹ Era obwire bwene obwo kyabazinga yaayetesa Musa ni Aaroni yaabakoba ati: “Musituke muje, muve mu bantu bange. Mwenamwena Abaisiraeli muje musinze Musengwa Katonda nga bwe mwakoba.

³² Mutwale entaama dhaimwe, n'embuzi, n'ente, mugolole. Mbasaba zeena munsabire enkabi.”

Abaisiraeli batwala ebintu eby'Abamisiri mu magezi

³³ Agho Abamisiri baagwidhubania Abaisiraeli bave mu Misiri mu bwangu nga bakoba bati: “Bwe mutaja tuja kufa tuweegho.”

³⁴ Kale Abaisiraeli baatoola engaano yaibwe ye baali bamaze okukanda aye nga bakaali kutaamu kizimbulukusa, baagita mu ntamu dhe bakandiramu, baagizinga mu bivaalo baagitwalira ku mabega.

³⁵ Abaisiraeli baali bamaze okukola nga Musa bweyabakoba, kuba baali bamaze okusaba Abamisiri ebintu ebyakolebwa mu feeza ni mu zaabu era n'ebivaalo.

³⁶ Era, nga ni Musengwa Katonda amaze okuleetera Abamisiri okutya Abaisiraeli, kale kiisi kye baasabanga nga bakibagha. Mu nsambo ng'oti n'eyo, Abaisiraeli baatwala eby'obukombe eby'Abamisiri mu magezi.

Abaisiraeli bava mu Misiri

³⁷ Abaisiraeli baatoolera olugendo lwaibwe ku bigere, era baatambula okuva e Ramesesi baatuuka e Sukkothi. Baali abasaadha ng'oti mitwalo nkaaga (600,000), nga tobaze bakazi na baana.

³⁸ Olukunkumuli olw'abantu abandi abatali Baisiraeli lwabeeyimbaku baaja nabo. Baaja n'entaama n'embuzi n'ente, n'endogoyi, nga byonabyona biri mu bungi.

³⁹ Baafumba emigaati egitazimbulukusiibwa mu ngaano ere enkande ye baava nayo mu Misiri, kuba Abamisiri baabagwidhubania nga bava mu Misiri, baabula ekiseera eky'okwesibirira entanda, waire okufunira ekizimbulukusa mu ngaano ye baavaayo nayo.

⁴⁰ Abaisiraeli baaba nga babaire mu Misiri okumala emyaka ebikumi bina n'asatu.

⁴¹ Era olunaku emyaka ebikumi ebina n'asatu (430) lwe gyawaayo giti, olukunkumuli olw'abantu ba Musengwa Katonda lwe baava mu Misiri.

⁴² Obwire obwo, Musengwa Katonda bweyakuumiramu abantu be abo ng'ali kubatoola mu Misiri. Kale, Abaisiraeli boonaboona ense n'ense bakuuma obwire bwene obwo nga bwa kwebalizaaku Musengwa Katonda.

Amateeka agagema ku Kibinuko eky'Okubitizibwa

⁴³ Musengwa Katonda yaakoba Musa ni Aaroni ati: “Gano n'amateeka ge munaajiirangaku nga mulya Ekibinuko eky'Okwidhukiriraku Okubitizibwa: Omuntu ow'endha atali Muisiraeli atakiryangaku.

⁴⁴ Aye omwiru ye mwagula n'empiiya aghanga okukiryaku, bwe muba nga mwamala okumukeketa.

⁴⁵ Omusenze n'omupakasi batakiryangaku.

⁴⁶ Ekibinuko ekyo kiteekwa okuliirwa mu ndhu omwo mwonka mwe kitegekeibwa, aghazira kufulumyaku kintu ku luya. Era ensolo ekozeseibwa mu kibinuko ekyo teteekwa kumenhebwa igumba lyayo waire eirala liti.

⁴⁷ Abaisiraeli boonaboona bateekwa okukola Ekibinuko ekyo.

⁴⁸ Omuntu ow'endha bw'abasengangamu memale n'ayenda okulya ku Kibinuko eky'Okwidhukiriraku Okubitizibwa olw'okusinza Musengwa Katonda, musooka kukeketanga bantu be abasaadha n'abalenzi memale mwamuganha era oyo mumutwalanga ng'Omuisiraeli mwene. Aye omuntu yeenayeena atali mukekete atalyanga ku Kibinuko ekyo.

⁴⁹ Amateeka gano gaidha kugemanga ku muntu ow'endha aba ng'abasenzeemu, ni ku Baisiraeli baamu.”

⁵⁰ Abaisiraeli baakola batyo nga Musengwa Katonda bweyalagira Musa ni Aaroni.

⁵¹ Ku lunaku lwene olwo Musengwa Katonda yaatoola Abaisiraeli boonaboona mu Misiri.