Okuvaayo 11 - Baibuli Ekibono kya Katonda 2014

Musa alabula ku kufa okw'abaana abalenzi ababeri

¹ Agho Musengwa Katonda yaakoba Musa ati: “Ekaasigaireyo ekibamba kirala kye nja okusindikira kyabazinga n'Abamisiri boonaboona era ng'ekyo kiwoire aja kubaleka muve muno. Ate mu butuufu aja bwa kubabingira irala okuva mu Misiri.

² Mpegaano ni, koba Abaisiraeli boonaboona oti, ‘Kiisi musaadha Omuisiraeli aje asabe omusaadha muliraanwa we Omumisiri, era kiisi mukazi Omuisiraeli asabe omukazi muliraanwa we Omumisiri ebintu ebyakolebwa mu feeza ni mu zaabu.’ ”

³ Agho Musengwa Katonda yaaleetera Abamisiri okutya Abaisiraeli. Ate ekindi, Abamisiri abo ng'otwaliizaamu n'abakungu ba kyabazinga beene, baatwalanga Musa okuba omuntu omukologho.

⁴ Musa yaakoba kyabazinga ati: “Musengwa Katonda akoba ati, ‘Agho nga mu bwire ghagati aidha kubita mu Misiri,

⁵ abaana abalenzi ababeri boonaboona ab'omu Misiri bafe: okuva ku muberi wo iwe kyabazinga oli ku kityamo eky'obwakyabazinga, okutuuka ku muberi ow'omwiru omukazi asa ku lubengo. Era n'ensolo dhaimwe dhoonadhoona enume edhaazaalibwa mu nzaalo edhaasooka, dhoona dhija kufa.

⁶ Era ghaidha kubaagho okulira okw'amaani mu Misiri mwonamwona, okutabangaghooku era okutaja kubaagho kabiri lundi.

⁷ Aye Abaisiraeli ghe baba teidha kubaayo kafufuma naire, waire embwa okuboigolera omuntu yeenayeena oba ensolo yoonayoona ey'Omuisiraeli. Olwo mulimanha nga Musengwa Katonda aboola Abamisiri ku Baisiraeli.’ ”

⁸ Musa yaamaliriza ng'akoba ati: “Era bano abakungu bo boonaboona baidha kwidha ye ndi bankubire amakiryaivu nga bakoba bati, ‘Tukweghembye va muno n'abantu bo boonaboona.’ Era olwo ndidha kuva muno.” Agho Musa, nga yeenayeena aidhwire obusungu, yaava aghaali kyabazinga.

⁹ Agho Musengwa Katonda yaakoba Musa ati: “Kyabazinga taja kubawulira, era olwo ndikola ebyewuunhio mu Misiri emikuzi kamaala.”

¹⁰ Musa ni Aaroni baakola ebyewuunhio bino byonabyona nga kyabazinga abona. Aye Musengwa Katonda yaaleetera kyabazinga oyo okukalanguka omwoyo, yaaloba kutya era yaaloba kuleka Baisiraeli kuva mu nsi ye.