Okuvaayo 1 - Baibuli Ekibono kya Katonda 2014

Abaisiraeli banhigirizibwa mu Misiri

¹ Gano n'amaina aga batabane ba Yakobo be yaja nabo mu Misiri, nga buli muntu aja n'ab'omu maka ge:

² Reubeni, Simeoni, Levi, Yuda,

³ Issakari, Zebuluni, Benjamini,

⁴ Dani, Nafutali, Gadi ni Ashera.

⁵ Yosefu baamwagaanayo mu Misiri, kale abantu boonaboona abaali basimuka mu Yakobo baaba nsanvu.

⁶ Agho ekiseera kyatuuka Yosefu, ni baganda be, n'abantu abandi ab'oluse olwo lwonalwona, baaba nga bafiire.

⁷ Aye Abaisiraeli abo, abaana be baaleka baazaalagana inho era baaba ba maani agataloodheka, kumpi baidhuza Misiri yoonayoona.

⁸ Agho omuntu ataamanha bya Yosefu yaafuuka kyabazinga wa Misiri.

⁹ Yaakoba abantu be ati: “Bona eno, abantu bano Abaisiraeli bali kamaala inho ekibitiriire, era batusingira ghala amaani.

¹⁰ Tuteekwa okubasalira amagezi aganaabasobola balobe kweyongera mu bungi, kuba bwe ghaidhagho olutalo basobola okweyimba ku bazigu baife, baatulwanisa era baalumuka mu Misiri.”

¹¹ Kale baabataaku Abamisiri abaabasaliranga amakatala, baabakozesanga emirimo emikalangufu. Batyo Abaisiraeli baazimbira Kyabazinga wa Misiri ebyagi ebikologho eby'okuterekangamu emere mu bibuga Pithomu ni Raamusesi.

¹² Aye Abamisiri ye baakomya okutuntuza Abaisiraeli, n'Abaisiraeli boona ye baakomya okweyongera okuzaalagana n'okusansaanira mu biketezo ebindi ebya Misiri ye baali bakaali kutuuka. Abamisiri baakyagha Abaisiraeli era nga n'okubatya babatya.

¹³ Kale baabakozesanga emirimo mu bukaluubirivu

¹⁴ n'obulamu bwabakaayira. Baabakozesanga mu kuzimba, ni mu mirimo egindi gyonagyona egy'omu nimiro. Era nga tibabasaasiraku naire.

¹⁵ Agho kyabazinga ow'e Misiri yaalagira Shifura era ni Pua abaali abazaalisa ab'abakazi Abaheburayi.

¹⁶ Yaabakoba ati: “Bwe muzaalisanga omukazi Omuheburayi ni mubona ng'omwana y'azaire mulenzi mumwitanga, bw'abanga omughala oyo mumulekanga nga mulamu.”

¹⁷ Aye abazaalisa abo baatya Katonda, baaloba kukola ekyo kyabazinga ow'e Misiri kye yabalagira baalekanga abaana abalenzi boona nga tibabaise.

¹⁸ Kyabazinga n'okubeeta n'ababuuza ati: “Lwaki mukoze ekyo ni muleka abaana abalenzi boona nga balamu?”

¹⁹ Abazaalisa baamwiramu bati: “Abakazi Abaheburayi tibali ng'oti bakazi Bamisiri. Kuba bazira buzibu mu kuzaala, era bazaala ng'omuzaalisa akaali na kubatuukaku.”

²⁰ Kale Katonda yaaba mulungi eri abazaalisa abo. Abaisiraeli baazaalagana, beeyongera okuba kamaala era n'okuba n'amaani.

²¹ Era olw'okuba abazaalisa abo baali batya Katonda, Katonda yaabagha buli muntu okuba n'ab'omu maka ababe ku bubwe.

²² Agho kyabazinga yaalagira abantu be boonaboona ati: “Musuulenga buli mwana mulenzi azaalibwa Abaheburayi mu mwiga Kiyira aye abaghala mubalekenga nga balamu.”