Okulira 5 - Baibuli Ekibono kya Katonda 2014

Okusaba okusaasirwa

¹ Wo Musengwa Katonda, idhukira ebyo abazigu baife bye baatutuusaaku. Bwenebwene lingirira obone bwe twaswala!

² Ebintu ebyaife bye twagheebwa, kabiri byamala byagheebwa bantu bandi be tutaidhi; abantu abamaghanga agandi buti n'abali mu ndhu dhaife.

³ Abazigu abo baatwitaku balata baife, twafuuka bamulekwa; ate bakaire baife baafuuka banamwandu.

⁴ Buti tuli n'okusasulira amaadhi ge tunhwa era n'enku dhe tufumbisa.

⁵ Batusindiikiriza bya ntaka ng'ate tuli n'ebikoligo mu nkoto; ni bwetukoogha tutya tibatuganha kuwolaku.

⁶ Twakakibwa okusabiriza emere okuva e Misiri ni mu Assiria, tulobe kulambuka ndhala.

⁷ Badhaadha baife baayonoona era baamala baafa, buti niife tudaazibwadaazibwa olw'okwonoona kwaibwe okwo.

⁸ Tufugibwa abairu obwiru era twabulaku abatuwonia.

⁹ Okuja okwagala emere tweghaayo bweghe, olw'abatemo ababa eyo mu irungu.

¹⁰ Emibiri gitusuuyiriire ng'oti n'abali gha ziiko, olw'endhala etuleetera okwokererwa.

¹¹ Abazigu abo baagema abakazi baife n'abaghala abaguna baabakaka, mu Sioni era ni mu bibuga ebindi eby'omu Buyudaaya.

¹² Baasiba abakungu baife ku migugha, baabaghanika baabalengeedhia ku miti okutuusa lwe bafa, era ghazira kitiisa kye bata mu bakaire.

¹³ Bakaka abaisuka baife okusa ku mmengo, abalenzi abato baayuuga n'ebinhwa by'enku ebizito.

¹⁴ Abakaire baalekera okutyama mu kifo eky'olwekobaano ku mulyango ogwingira mu kibuga, n'abaisuka baalekera agho okukuba enhembo.

¹⁵ Eisanhu mu myoyo gyaife lyawaamu, n'agaali amakina gaafuuka kulira na kwekuba bigwo.

¹⁶ Ghazira akaatutaamu kitiisa. Tukagwireku, kuba twayonoona.

¹⁷ Olw'ekyo, omwoyo gwatulwala era amaiso gaatuwaaku obwogi, tutangaala butangaale.

¹⁸ Olw'okuba olusozi Sioni lwasigalira agho nga tighakaali alubaaku, ebibe ni byonka ebirutambuliratambuliraku nga byagala eky'okulya.

¹⁹ Aye iwe Musengwa Katonda, niiwe ofuga ebyanda n'ebyanda, era ekityamo kyo eky'obwakyabazinga kibaagho mu nse dhoonadhoona.

²⁰ Lwaki otwerabiire obwaga agho? Lwaki otulekuliire agho?

²¹ Wo Musengwa Katonda, twize y'oli, twidha kwira! Twirizeegho ekitiisa kyaife nga bwetwalinga eira.

²² Obwo bwenebwene watusuulira irala ere nga toliirayo kutwiza y'oli? Okusungughala kwo tikuja kukoma?