Okulira 4 - Baibuli Ekibono kya Katonda 2014

Yerusalemu nga kimaze okugwa

¹ Ha, nga kyewuunhisa engeri zaabu ye yalekeramu okumesunkana; zaabu mwenemwene omukenenule n'afuukafuuka! Amabaale geenegeene agaabanga mu kifo ekitukuvu, okwagaanibwa mu nguudo dhoonadhoona edh'omu kibuga nga masuulesuule.

² Abaisuka ab'omu Sioni abaatwalibwanga okuba ab'omughendo ng'oti zaabu mukenenule, buti batwalibwa ng'oti bitamutamu bya itosi.

³ Ni bwebiba ebibe, biyonsa era byalabirira ebyana byabyo, aye abantu bange bakambughala baaba ng'oti ni maaya edh'omu irungu edhitafa ku baana baadho.

⁴ Baleka abaana baibwe enimi dhaabakalira mu kanwa mwaibwe olw'endiwo ey'amaadhi; abaana baasaba emere aye ghaabula agibagha.

⁵ Abo abaalyanga ebiiwulo ebigwanira okuliibwa bakyabazinga, buti balambukira ku nguudo edh'ekibuga; n'abo abaakuzibwa ng'abaana b'abakombe, buti obaagaana nga bali kwebuguya ku mmungo dh'ebikaba.

⁶ Ekibonerezo abantu bange kye baafuna kinene okusinga ekibonerezo ekyagheebwa Sodoma, Katonda kye yazikiriza mu kaseera akazira ghe kaaga.

⁷ Abakungu ab'omu Yerusalemu baali nga batukula okusinga amabaale ag'omugozi era nga beeru okusinga amata; emibiri gyaibwe nga gya maani era nga ginherengeta okusinga eibaale ery'omughendo eryetebwa korali, era nga baboneka bulungi inho ng'oti n'eibaale ery'omughendo eryetebwa saffiro.

⁸ Aye buti mu maiso bairugavu okusinga enziro, era ole ni bw'abaagaana mu ngira takaabamanha. Emibiri gyaibwe gyabakala ng'oti muti mukalu, era gyabeeriipira ku magumba.

⁹ Abaafumitibwanga empiima baafanga bulungiku okusinga abaafanga endhala; kuba bano baalambukanga mpola okutuusa lwe baafanga, olw'okubulwa emere ey'okubabeesaagho nga balamu.

¹⁰ Mu biseera abantu bange bye baazikiriramu, abakazi beenebeene abaamanhibwa okuba abasaasizi, baatuuka okufumba abaana baibwe beene baabafuula emere.

¹¹ Musengwa Katonda yadhuuna obutalekamu, era obusungu bwe bwayaka ng'oti muliro yaateera oluyiira olwayokya Sioni okutuukira irala ku misingi gyakyo.

¹² Mu bakyabazinga boonaboona ni mu bantu abandi boonaboona ab'oku nsi, yali ezira asobola kwikiriza nga ghaligho omuzigu oba omulumbagani yeenayeena, asobola okwingira mu miryango gya Yerusalemu.

¹³ Aye ekyo kyabaagho olw'ebibi eby'abalanzi baamu, n'olw'okwonoona okwa bakabona baamu, abaakiitirangamu abantu abatuufu.

¹⁴ Abalanzi abo ni bakabona abo baatambulatambulanga eyo batyo mu nguudo edh'ekibuga ng'oti batulu, nga boonoonefu olw'omusaayi gw'abantu be baitanga, era ng'olw'ekyo ghazira muntu agema ku bivaalo byaibwe.

¹⁵ Nga kiisi muntu ababonaku abasama busame ati: “Ja ere. Oli mwonoonefu. Ja, ja, ja. Tongema naku.” Kale baatambulatambulanga eyo batyo nga bazira ghe baba, era nga mu nsi dhoonadhoona ezira abasangaaza.

¹⁶ Musengwa mwene yabasansaania, nga takaabafaaku, nga takaata mu bakabona kitiisa, era nga takaagemerwa bakulembeze kivunika.

¹⁷ Twalingirira, amaiso gaatuuka okutunafugha, aye ng'ezira buyambi. Ghaligho eighanga lye twalingirirangaku nga tudhuuba tuti lighanga okutubeera, aye tiryatubeera.

¹⁸ Ng'abazigu batulondoola buli ghe tuta ekigere, baatutiisa n'okutambulira mu nguudo, twawulira mule nga okufa tikuli ghala, ng'enaku dhisigaireyo mbale bubale.

¹⁹ Abazigu nga batubingirira embiro okusingaku n'enkookooma bw'eguluka mu ibbanga; baatubingirira mu nsozi, era baatweteega ni mu irungu.

²⁰ Baasima ebiina okutega kyabazinga, oyo Musengwa Katonda ye yasiiga omuzigo abenga obugheereso bwaife, era baamala baamugemya. Ate ng'oyo ye twali tudhuuba tuti n'anaatulwaniriringa nga tulumbiibwa.

²¹ Imwe abantu ab'e Edomu n'imwe ababa mu Uzi museke inho era musagambe inho nga mukaali. Aye olwaimwe luli kwidha, lwe muligemesebwa ekikopo eky'obusungu bwa Musengwa Katonda. Mulikinhwa mwatamiira mwatoolera n'okubita amadu.

²² Imwe ab'omu Sioni ekibonerezo kyaimwe olw'okwonoona kiwoire, Musengwa Katonda takaayongera kubakuumira mu bunhage. Aye imwe Abaedomu, Musengwa aja kwoleka okwonoona kwaimwe era ababonereze.