Okulira 3 - Baibuli Ekibono kya Katonda 2014

Ekibonerezo, okwenenia n'okusuubira

¹ Ninze ndidhi okubonerezebwa Katonda kye kitegeeza; ninze ndidhi omwigo gwe bwe guluma ng'asungughaire.

² Yansindiikiriza yaanhingiza mu nzikiiza eri bedimudimu.

³ Bwenebwene yanfunta ebifunsi n'omukono gwe olunaku lwonalwona, ng'aziramu na kusaasira.

⁴ Yangoogombya naaweera mu luwu, n'amagumba gange yaagamenhamenha.

⁵ Yanzingiza ku ndhuyi dhoonadhoona, naasigala agho nga ndi kudaagadaaga n'ebizibu kamaala.

⁶ Yanta mu nzikiiza yansibira omwo, naaba ng'oti n'abaafa eira.

⁷ Yanzimbaku ekimante okuneezunguluza nga tighanga kumunuuka kulumuka, era yansibaku endhegere enzito.

⁸ Mba agho naamusaba nga ndira, aye yaaloba okuwulirisa okusaba kwange.

⁹ Buli ghe nhenda okubita azimbagho ekimante eky'amabaale amabaadhe amanene, era aleetera engira dhe mbitamu okuba enzibu.

¹⁰ Aneeteega ng'oti n'ekisolo ekikambwe bwe kyeteega obusolo bwe kirya, era ng'oti n'empologoma ebwama ng'eyenda okutuumira ku nsolo.

¹¹ Yankwekwebya okuntoola mu ngira yange yankankanula, yandekulira agho ntyo nga ndaaga.

¹² Yaadhuumuula akalaso ke yaakaaningiriza, obusaale bwe bunkube.

¹³ Yatoola obulaso bwe mu kiruutu kyabwo, bwanfumitira irala ku mwoyo.

¹⁴ Nafuuka ekisekererwa eri abantu boonaboona, era olunaku lwonalwona bemba enhembo edh'okundheedha.

¹⁵ Yandeetera okudaagadaaga okutaloodheka, kwankaayirira ng'oti n'omuntu ye bakaka ebikaagha.

¹⁶ Yansindika ku mabaale naamenheka amaino, era yanvulunga mu nkungu okwoleka nga bwenzira mugaso.

¹⁷ Omwoyo gwange taguganha kufuna miraala, era nze neerabira ira ekyetebwa isanhu.

¹⁸ Kyenva ni nkoba mule nti okuguminkiriza kwange n'okusuubira kwange mu Musengwa Katonda, bituuse okuwaagho.

¹⁹ Bwe ndidhukira okudaazibwadaazibwa kwange n'okutambulatambula eyo ntyo ng'azira waibwe, mba ng'ali kunhwa eirogo erikaagha.

²⁰ Ekyo nja naakirowoozaaku buli kiseera omwoyo gwangwa mu bigere.

²¹ Aye eriyo kye ndidhukira nairamu eisuubi:

²² Okugonza kwa Musengwa tikukoma n'ekisa kye tikiwa.

²³ Buli nkyo biba ng'oti biyaaka, bwenebwene obwesigwa bwo tibukoma.

²⁴ Nkiidhi bukalamu mu mwoyo gwange nti Musengwa ye neesiga ku nsi. Olw'ekyo eisuubi lyange liri mu oyo.

²⁵ Musengwa mulungi eri abo abamwesiga, mulungi eri omwoyo ogufaayo okukola by'ayenda.

²⁶ Kale kiba kikalamu ole yaasirika, yaateegerera obulokozi obuva eri Musengwa Katonda.

²⁷ Era kiba kikalamu omuntu okwega okuguminkiriza okwo ng'akaali muto.

²⁸ Kale leka omuntu yeenayeena adaazibwadaazibwa Musengwa, atyamenga yenka asiriikirire,

²⁹ era yeewooye abenga gha bigere bya Musengwa Katonda; kuba ghasobola okuba nga ghakaaligho eisuubi.

³⁰ Era omuntu oyo atafangayo ku mikuzi emeka gy'akubiibwa, oba ku bivumo ki by'avumiibwa.

³¹ Musengwa talekulira agho muntu n'amwerabirira irala.

³² Waire asobola okuleetera omuntu okudaagadaaga, aye olw'okugonza kwe okungi okutakoma, amala yaamugemerwa ekivunika;

³³ kuba takikola nga yeeyendeire okudaazadaaza oba okulumya omuntu.

³⁴ Musengwa amanha bweghabaagho omuntu yeenayeena omusibe anhigirizibwa ku nsi kuno.

³⁵ Era amanha bweghabaagho omuntu atakoleirwa kintu mu butuufu.

³⁶ Era yaamanha bweghabaagho omuntu asaliirwa omusango mu bukyamu.

³⁷ Naani asobola okulagira ekintu ni kibaagho okutoolaku nga Musengwa n'asazeegho kibeegho?

³⁸ Ghaligho ekirungi oba ekibi ekigwagho ng'oyo Ali Ghaigulu Yeene ti n'akiragiire?

³⁹ Lwaki omuntu yeemuluguunhia ng'ali kubonerezebwa olw'ebibi bye?

⁴⁰ Ka twekebere tubone ensambo ye twebisaamu, twire ye Musengwa Katonda.

⁴¹ Ka twiguliregho Katonda ow'eigulu emyoyo gyaife era tumusabe.

⁴² “Wo Musengwa twayonoona twakudheemera, era tiwatusonigha.

⁴³ Waidhula obusungu bwakubwikirira, waatubingirira era waatumulungula ng'oziramu na kusaasira.

⁴⁴ Weebwikirira ekire olobe kuwulira nga tuli kukusaba.

⁴⁵ Ife watufuula ng'ebisoodo omuntu bye yeeyeya mu bigere n'aleka agho.

⁴⁶ Abazigu baife boonaboona batuvuma, baatuziimuula.

⁴⁷ Batulumba twatya inho, baatufafaagania era baatuzikiriza.

⁴⁸ Nja naalira amaziga ganfukumuka mu maiso ng'oti miiga, olw'okuzikirizibwa okw'abantu bange.

⁴⁹ Amaiso gange gakuuluula amaziga ekiseera kyonakyona aghazira kulekeramu naire,

⁵⁰ okutuusa Musengwa ali mu igulu lw'alinga ghansi naabona abantu be bwe bali kudaagadaaga.

⁵¹ Amaiso gange bye gabona ebyatuuka ku bakazi ab'ekibuga kyange bindeeta enaku ku mwoyo.

⁵² Abo abeefuula abazigu bange nga bazira na nsonga ntuufu, bandhiiga ng'oti bayiiga nhonhi.

⁵³ Bansuula mu kiina nga ndi mulamu, baamala baakitaaku n'eibaale.

⁵⁴ Bwe nabona ng'amaadhi gatooleire okuumira, naakoba nti: ‘Leero luno nfiire.’

⁵⁵ Wo Musengwa Katonda, nga ndi eyo ku ntobo ey'ekiina nakulirira.

⁵⁶ Wampulirisa bwe nakweghemba nti, ‘Otaloba kumpulira nga ndi kukusaba okumbeera.’

⁵⁷ Bwe nakulirira waseeta kumpi ninze era wankoba oti, ‘Otatya.’

⁵⁸ Wampolezaagho nga ndi ku musango, wamponia okwitibwa.

⁵⁹ Wo Musengwa Katonda, iwe bona ebibi bye bankola, nkusaba obasalire omusango gubasinge.

⁶⁰ Obona nga bwe beeguguna okuneesasuulizaaku, era waabona entegeka dhaibwe dhoonadhoona edh'okunkola obubi.

⁶¹ Wo Musengwa Katonda, owulira bwe bandheedha, era omanha n'entegeka dhaibwe dhoonadhoona edh'okunkola obubi.

⁶² Ebibono abazigu bange bye boogera n'ebidhuubo bye baba nabyo olunaku lwonalwona, biba bya kuunumya nze.

⁶³ Okuva enkyo okutuusa igulo, bemba enhembo edh'okundheedha.

⁶⁴ Wo Musengwa Katonda, baneesasuulizeeku olw'ebyo bye bankola.

⁶⁵ Bateeku ekikolimo obooleke nga bw'oli omukambwe.

⁶⁶ Wo Musengwa Katonda, babingirire ng'osungughaire, era obazikirize baweegho ghansi ghe igulu.”