Okulira 2 - Baibuli Ekibono kya Katonda 2014

Musengwa abonereza Yerusalemu

¹ Ha, Musengwa asungughaire era yeesoomeire okubonereza ekibuga Sioni! Ebintu byamu abantu bye baatwalanga okuba eby'omughendo, abiswire ghansi ng'oti bikaba. Waire ng'ekibuga ekyo n'ekibaire ekityamo eky'obwakyabazinga bwe, Musengwa oyo akirekuliire agho olw'okuba asungughaire.

² Musengwa yazikiriza ebibuga eby'Abaisiraeli ng'aziramu kusaasira naire. Olw'obusungu yamenhamenha ebifo Abayudaaya mwe beewogomanga. Yaasuula obwakyabazinga n'abafuzi baamu ghansi.

³ Amaani Abaisiraeli ge baali nago, Musengwa yasungughala ekibitiriire yaagabamalamu. Yaalekera agho okubabeera, baalumbibwa abazigu. Obusungu bwe bwayakira ku Bayudaaya ng'oti muliro, yaazikiriza buli kintu.

⁴ Yadhuumuula akalaso ke n'omukono gwe omusaadha, yaakabalinzaamu ng'oti muzigu waibwe. Yaita abo boonaboona abaabeeyagazanga. Obusungu bwe bwabookya ng'oti muliro.

⁵ Musengwa yafuuka ng'oti muzigu wa Baisiraeli yaabazikiriza; yaazikiriza ebisaagaati eby'abakungu byonabyona era yaamenhamenha ebifo eby'okwewogomamu byafuuka bifulukwa byereere. Yaaleetera okulira mu Bayudaaya okweyongera.

⁶ Yamenhagho eisinzizo lye ng'ole bw'amenhagho entindi eba ng'eri mu musiri, endhu eyo abantu mwe baajanga olw'embaga edh'ebibinuko ebyalagirwa, yaagizikiriza yafuuka bifulukwa byereere. Musengwa yalekeza agho ebibinuko ebyalagirwa, yaalekeza ni Sabbato. Era olw'obusungu obungi, kyabazinga ni bakabona takaabaliku naire.

⁷ Musengwa yazira alutaari ye, yaalekulira agho eisinzizo lye. Era yaganha abazigu baamenha ebisenge byalyo. Abazigu baakubira mu ndhu ya Musengwa emizira egy'obughanguzi, ng'oti n'Abaisiraeli beene bwe baakubirangamu emizira egy'embaga edh'ebibinuko ebyalagirwa.

⁸ Musengwa yasalagho nga mumalirivu okuzikiriza ekimante ekyezungulwire ekibuga Sioni. Yasooka kukipima n'oluwuuzi olupima, ghabule akasigalagho nga tikamenheibwa. Yakizikiriza n'omukono gwe gwene, ng'obona ebituuti ebirengererwaku n'ebimante ebyali byezungulwire ekibuga nga biri ng'oti biri kulira maziga, era byaba agho bityo nga gabiwoire.

⁹ Endhigi dhaakyo dhaagwa era ebiwumpu byadheebungaku, n'eminhololo egyadhisibanga gyamenhekamenheka. Kyabazinga waamu n'abakungu be bali eyo mu maghanga mu bunhage, era mu kibuga ekyo timukaalimu mateeka. Abalanzi baamu tibakaabonekerwa Musengwa Katonda.

¹⁰ Abasaadha abakaire ab'omu kibuga Sioni batyama agho ku itaka baasiriikirira. Beeyugha enkungu mu mitwe nga beesibye ebikaakaati olw'enaku. N'abaghala baamu boona baakuba amakiryaivu agho ku itaka.

¹¹ Amaiso gaanafiighe olw'okulira, era ntabwirwa mu mwoyo. Amaani gampoire n'enaku yangema olw'okuzikirizibwa okw'abantu bange, n'olw'abaana abato abayonka era n'abo abakuzekuzeemu abalambukira ku nguudo edh'ekibuga.

¹² Balira nga basuubira bakaire baibwe okubagha eky'okulya n'eky'okunhwa. Batondoka baagwa ku nguudo edh'ekibuga ng'oti n'abasaadha abatabaazi be bafumiite. Obulamu obw'abaana abo buja nga buweeragho mu ngalo dha bakaire baibwe.

¹³ Abantu ab'e Yerusalemu, imwe be ngonza oti ki, nkobe ki? Mbageze ku ki? Mbafaananie ki imwe, ekinaabaleetera okusaasirwa? Okuzikirizibwa kwaimwe tikwakukoma oti n'amaadhi ag'enhandha agaidha ni gaabeeyaagho obweye; ghazira aghanga kwizaagho bintu byazikirizibwa.

¹⁴ Abalanzi baimwe, mu kifo eky'okubakobera okubonekerwa okuva ewa Katonda, baabakoberanga bya buguya, ebibi byaimwe baabighembaku bughembe okubafiiriza enkabi. Obukwenda obuva ye Katonda baabubakobera mu busobu, bwabaleetera okudaaliima.

¹⁵ Abantu boonaboona ababita ku kibuga ekyo, bakiziimuula era baakisekerera. Beesiimooza, baatengeesa emitwe nga bavuma ekibuga ekyo Yerusalemu, nga beebuuza bati: “Kino bwene n'ekibuga kye baayetanga ekituukiriire mu bulungi era ekyeyagazanga abantu ab'ensi yoonayoona?”

¹⁶ Abazigu baimwe boonaboona babaziimuula, beesiimooza, baaluma emba nga bakoba bati: “Otyo, tukizikiriiza! Olunaku luno lulongoire lwatuuka twalubonaku, tubaire tumaze entangama nga tuluteegereire.”

¹⁷ Musengwa alwire eira yaatuukiriza ekigendererwa kye, nga bwe yatwesoomera. Era nga bwe yasalagho eira einho, azikiriiza ng'aziramu na kusaasira. Aghaire abazigu baife okusagamba olw'obughanguzi, yaabongera okuba ab'amaani einho.

¹⁸ Imwe abantu ab'omu Sioni, muwowoole Musengwa abawulire! Muwowoole amaziga gakuuluule ng'oti mwiga omusana n'obwire! Mutaganha kuwoleeraku naire waire okumalaku akaseera ng'amaiso gaimwe gabakaze amaziga.

¹⁹ Muzuuke obwire emikuzi egigheraku mulirire Musengwa! Mumukobere ebibali ku mwoyo byonabyona ng'awulira. Mughanike amakono mugoolekeze Musengwa Katonda, nga musabira abaana baimwe abali kulambukira endhala ku nguudo dh'ekibuga.

²⁰ Wo Musengwa Katonda, tulingirire obone bwe tudaaga. Naani ye waali obisiisaaku oti? Kibangaghooku abakazi okulya abaana abaibwe beene, be baakuza obukalamu nga babagonza? Kibangaghooku bakabona n'abalanzi okwitirwa mu kifo kya Musengwa ekitukuvu?

²¹ Abakaire n'abato baagaanibwa nga bafu, nga bagwire agho ghansi ku nguudo edh'ekibuga, abaisuka n'abaguna baitibwa n'empiima. Iwe mwene wabasala ku lunaku lwe wasungughaliraku waabaita ng'oziramu na kusaasira.

²² Wayeta abazigu bange baaneezungulula, ng'oti n'abantu abeesoloiza ku lunaku olw'embaga ey'ekibinuko ekyalagirwa. Era Musengwa Katonda, ku olwo lunaku lwe wasungughaliraku, nga ghazira asobola kukunuuka oba kukuwona. Abazigu bange baazikiriza abaana be nalera ni nkuza.