Okubala 8 - Baibuli Ekibono kya Katonda 2014

Ensambo ey'okuta entaala ku kikondo

¹ Agho Musengwa Katonda yaakoba Musa ati:

² “Koba Aaroni oti, bw'aba ng'ali kuta entaala omusanvu ku kikondo kyadho, adhiteeku dhibe nga dhimulisa mberi wa kikondo ekyo.”

³ Era Aaroni yaakola atyo, yaata entaala ku kikondo kyadho nga dhimulisa mberi wa kyo, nga Musengwa Katonda bweyalagira Musa.

⁴ Ekikondo eky'entaala ekyo baakigheesa mu zaabu kyonakyona okuva ghaigulu ku nsaga dhaakyo okutuuka ku kikolo kyakyo, nga bajiira ku nkola Musengwa Katonda ye yayoleka Musa.

Okutukuza n'okughaayo Abalevi babe aba Musengwa Katonda

⁵ Musengwa Katonda era yaakoba Musa ati:

⁶ “Yawula Abalevi ku Baisiraeli abandi boonaboona, era obatukuze.

⁷ Kola oti: bamansireku amaadhi agatukuzaaku ebibi era obakobe basaleku enviiri edhibali ku mibiri gyaibwe dhoonadhoona. Bayoze engoye dhaibwe, olwo beetukuze.

⁸ Agho baidha kufunayo ente ento enume, n'ekigheebwayo ekijiiraku eky'emere ey'empeke eseereibwa obukalamu era etabwirwamu omuzigo. Era mufuneyo ente ento enume eyindi ey'ekigheebwayo olw'ebibi.

⁹ Agho oidha kweta Abaisiraeli boonaboona beesoloze, memale oyemereze Abalevi agho gha mberi ow'Eweema ey'Okwagaananirangamu ni Musengwa Katonda.

¹⁰ Bw'onaaba oghaayo Abalevi ye nze Musengwa Katonda, Abaisiraeli baidha kuta emikono gyaibwe ku Balevi abo,

¹¹ era Aaroni aidha kubaghaayo ye ndi ng'ekigheebwayo ekiwuubibwa eky'Abaisiraeli, olwo gube mulimo gwaibwe okumpeereza.

¹² Agho Abalevi baidha kugema ku mitwe egy'ente enume dhombi, eyindi mugigheeyo ng'ekigheebwayo olw'ebibi ate eyindi mugigheeyo ng'ekigheebwayo ekyokebwa. Olwo Abalevi batoolebweku ebibi byaibwe.

¹³ “Oidha kutaagho Abalevi abo bagheerezenga Aaroni ni batabane be, era obagheeyo ye nze Musengwa ng'ekigheebwayo ekiwuubibwa.

¹⁴ Otyo bw'oidhanga okwawula Abalevi ku Baisiraeli abandi, babenga bange.

¹⁵ Era baidha kugheerezanga mu Weema ey'Okwagaananirangamu ni Musengwa Katonda, ng'omaze okubatukuza n'okubaghaayo ng'ekigheebwayo ekiwuubibwa;

¹⁶ kuba Abalevi abo bampeereibwa mu bwidhuvu okuva mu Baisiraeli boonaboona. Abo be nonzeegho babe bange mu kifo eky'abaana abalenzi ababeri boonaboona ab'Abaisiraeli.

¹⁷ Bwe naita abaana ababeri boonaboona ab'Abamisiri, natukuza omwana omulenzi omuberi mu buli maka ag'omu Isiraeli, era na buli nsolo ezaalibwa mu luzaalo olusooka olwa inhaayo.

¹⁸ Buti nonzeegho Abalevi babe bange, mu kifo eky'abaana abalenzi ababeri boonaboona ab'Abaisiraeli

¹⁹ Era ntaire Abalevi ng'ekirabo mu mikono gy'Aaroni ni batabane be, bagheerezenga Abaisiraeli mu Weema ey'Okwagaananirangamu ni Musengwa Katonda, era baleeterenga Abaisiraeli abo okutoolebwaku ebibi; balobe kugwirwanga kibamba bwe banaabanga nga baseese kumpi n'Ekifo Ekitukuvu.”

²⁰ Kale Musa ni Aaroni n'Abaisiraeli boonaboona baakola batyo ku Balevi. Baatuukiriza byonabyona Musengwa Katonda bye yalagira Musa okukola ku Balevi.

²¹ Abalevi beetukuzaaku ebibi, era baayoza engoye dhaibwe. Aaroni yaabaghaayo eri Musengwa Katonda ng'ekigheebwayo ekiwuubibwa, era yaabaleetera okutoolebwaku ebibi, baatukuzibwa.

²² Ebyo nga biwoire, Abalevi baaja baagheereza mu Weema ey'Okwagaananirangamu ni Musengwa Katonda, nga balabirirwa Aaroni ni batabane be. Musengwa Katonda bye yalagira Musa bikolebwe ku Balevi abo, n'ebyo abantu bye baabakola.

²³ Agho Musengwa Katonda yaakoba Musa ati:

²⁴ “Lino n'eiteeka erigema ku Balevi: abo abatuusiisa emyaka amakumi abiri n'etaanu n'okusingagho, n'abanaingiranga okugheereza mu Weema ey'Okwagaananirangamu ni Musengwa Katonda.

²⁵ Era bwe banaatuusanga emyaka ataanu, baidha kulekeranga agho okugheereza, bawuumule.

²⁶ Aye banaasobolanga okubeeraku Balevi banaibwe okugheereza mu Weema eyo, aye ti kuba na buvunaanizibwa. Otyo bw'onaagerekeranga Abalevi emirimo gyaibwe.”