Okubala 7 - Baibuli Ekibono kya Katonda 2014

Abakulembeze mu Isiraeli baleeta ebigheebwayo

¹ Olunaku Musa lwe yamaliriza okusimba Weema ey'Okwagaananirangamu ni Musengwa Katonda, yagifukaku omuzigo yaagyawula okuba eya Musengwa Katonda aghalala n'ebintu byamu byonabyona. Era yaafuka ku alutaari omuzigo, yoona yaagyawula okuba eya Musengwa Katonda aghalala n'ebintu ebikozesebwaku byonabyona.

² Agho abakulembeze mu Isiraeli, abaakuliranga enda dha baiseibwe era abaakulira abo abaabala abantu mu Isiraeli,

³ baaleetera Musengwa Katonda ebigheebwayo bino: ebigaali eby'okutambuliramu mukaaga n'ente endaagho ikumi na ibiri, nga kiisi mukulembeze omulala aghaayo ente ndala, ate nga kiisi bakulembeze ababiri baghaayo ekigaali. Baabigheerayo agho mu maiso ag'Eweema ey'Okwagaananirangamu ni Musengwa.

⁴ Agho Musengwa Katonda yaakoba Musa ati:

⁵ “Toola ebigheebwayo ebyo bye baleese bikozesebwe mu mirimo egy'okugheereza mu Weema ey'Okwagaananirangamu ni Musengwa Katonda. Era obighe Abalevi ng'ojiira ku buli mulimo omuntu gw'ali n'okukola.”

⁶ Kale Musa yaatoola ebigaali ebyo n'ente yaabigha Abalevi.

⁷ Yaatoola ebigaali bibiri n'ente ina yaabigha abo abasimuka mu Gereshoni, ng'ajiira ku mirimo gye baali n'okukola.

⁸ Ebigaali ebina n'ente omunaana yaabigha abo abasimuka mu Merari ng'ajiira ku mirimo gye baali n'okukola. Boonaboona baali nga bakulirwa Ithamari mutabane w'Aaroni kabona.

⁹ Aye abo abasimuka mu Kohathi Musa ti yabagha bigaali waire okubagha ente, kuba ebintu ebitukuvu bye baagheebwa okulabiriranga, byali nga biri na kubbeedebwa ku mabega gaibwe.

¹⁰ Abakulembeze abo era baaghaayo ebigheebwayo agho mu maiso g'alutaari ku lunaku lwe yafukibwaku omuzigo, olw'okugighaayo ebe ya Musengwa Katonda.

¹¹ Musengwa Katonda yaakoba Musa ati: “Abakulembeze abo baidha kughangayo ebigheebwayo ebyo mu ngobo, buli muntu olunaku lwe.”

¹² Omukulembeze eyaghaayo ekigheebwayo kye olunaku olwasooka yali Nahashoni mutabane wa Amminadabu, nga n'akulira ekika kya Yuda.

¹³ Ekigheebwayo kye, kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo ng'ekyo n'ekigheebwayo eky'emere ey'empeke.

¹⁴ Era ekigheebwayo kye, kyalimu ni bino: Ekintu ekibaamu obubbaani kirala ekyakolebwa mu zaabu, nga kizitogha guraamu kikumi na ikumi, era nga kiidhwire obubbaani,

¹⁵ ente ento enume ndala, entaama ento enume ndala ey'omwaka omulala, n'entaama enume ndala enkulu; ekyo nga n'ekigheebwayo ekyokebwa.

¹⁶ Era ekigheebwayo kye kyalimu embuzi enume ndala; ekyo nga n'ekigheebwayo olw'ebibi.

¹⁷ Era ekigheebwayo kye kyalimu ni bino: Ente endaagho ibiri, entaama enume itaanu, embuzi enume itaanu n'entaama ento enume itaanu edh'omwaka omulala omulala; ebyo nga n'eby'ekigheebwayo olw'okutabagana. Ebyo Nahashoni mutabane wa Amminadabu bye yaghaayo.

¹⁸ Ku lunaku olwokubiri Nethaneli mutabane wa Zuari nga n'akulira ekika kya Issakari n'eyaghaayo ekigheebwayo kye.

¹⁹ Ekigheebwayo kye kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo ekyo nga n'ekigheebwayo eky'emere ey'empeke.

²⁰ Era ekigheebwayo kye kyalimu ni bino: Ekintu ekibaamu obubbaani kirala ekyakolebwa mu zaabu, nga kizitogha guraamu kikumi na ikumi (110) era nga kiidhwire obubbaani,

²¹ ente enume ndala entaama ento enume ndala ey'omwaka omulala, n'entaama enume ndala enkulu; ekyo nga n'ekigheebwayo ekyokebwa.

²² Era kyabaamu embuzi enume ndala; ekyo nga n'ekigheebwayo olw'ebibi.

²³ Era kyabaamu ni bino: Ente endaagho ibiri, entaama enume itaanu, embuzi enume itaanu n'entaama ento enume itaanu edh'omwaka omulala omulala; ebyo nga n'eby'ekigheebwayo olw'okutabagana. Ebyo Nethaneli mutabane wa Zuari bye yaghaayo.

²⁴ Ku lunaku olwokusatu Eliabu mutabane wa Heloni, nga n'akulira ekika kya Zebuluni, n'eyaghaayo ekigheebwayo kye.

²⁵ Ekigheebwayo kye, kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza, era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo; ekyo nga n'ekigheebwayo eky'emere ey'empeke.

²⁶ Era ekigheebwayo kye, kyalimu ekintu ekibaamu obubbaani kirala ekyakolebwa mu zaabu, nga kizitogha guraamu kikumi na ikumi, era nga kiidhwire obubbaani.

²⁷ Era kyalimu ni bino: Ente ento enume ndala, entaama ento enume ndala ey'omwaka omulala n'entaama enume ndala enkulu; ekyo nga n'ekigheebwayo ekyokebwa.

²⁸ Era kyabaamu embuzi enume ndala; ekyo nga n'ekigheebwayo olw'ebibi.

²⁹ Era kyabaamu ni bino: Ente endaagho ibiri, entaama enume itaanu, embuzi enume itaanu n'entaama ento enume itaanu edh'omwaka omulala omulala. Ebyo nga n'eby'ekigheebwayo olw'okutabagana. Ebyo Eliabu mutabane wa Heloni bye yaghaayo.

³⁰ Ku lunaku olwokuna Elizuri mutabane wa Shedeura, nga n'akulira ekika kya Reubeni, n'eyaghaayo ekigheebwayo kye.

³¹ Ekigheebwayo kye kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo. Ekyo nga n'ekigheebwayo eky'emere ey'empeke.

³² Era ekigheebwayo kye kyalimu ekintu ekibaamu obubbaani kirala ekyakolebwa mu zaabu, nga kizitogha guraamu kikumi na ikumi, era nga kiidhwire obubbaani.

³³ Era kyalimu ni bino: Ente ento enume ndala, entaama ento enume ndala ey'omwaka omulala n'entaama enume ndala enkulu; ekyo nga n'ekigheebwayo ekyokebwa.

³⁴ Era kyabaamu embuzi enume ndala; ekyo nga n'ekigheebwayo olw'ebibi.

³⁵ Era kyabaamu ni bino: Ente endaagho ibiri, entaama enume itaanu, embuzi enume itaanu n'entaama ento enume itaanu edh'omwaka omulala omulala. Ebyo nga n'eby'ekigheebwayo olw'okutabagana. Ebyo Elizuri mutabane wa Shedeura bye yaghaayo.

³⁶ Ku lunaku olwokutaanu Shelumieli mutabane wa Zurishaddai, nga n'akulira ekika kya Simeoni, n'eyaghaayo ekigheebwayo kye.

³⁷ Ekigheebwayo kye kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo. Ekyo nga n'ekigheebwayo eky'emere ey'empeke.

³⁸ Era ekigheebwayo kye kyalimu ekintu ekibaamu obubbaani kirala ekyakolebwa mu zaabu, nga kizitogha guraamu kikumi na ikumi era nga kiidhwire obubbaani.

³⁹ Era kyalimu ni bino: Ente ento enume ndala, entaama ento enume ndala ey'omwaka omulala n'entaama enume ndala enkulu; ekyo nga n'ekigheebwayo ekyokebwa.

⁴⁰ Era kyabaamu embuzi enume ndala; ekyo nga n'ekigheebwayo olw'ebibi.

⁴¹ Era kyabaamu bino: Ente endaagho ibiri, entaama enume itaanu; embuzi enume itaanu n'entaama ento enume itaanu edh'omwaka omulala omulala. Ebyo nga n'eby'ekigheebwayo olw'okutabagana. Ebyo Shelumieli mutabane wa Zurishaddai bye yaghaayo.

⁴² Ku lunaku olwomukaaga Eliasafu mutabane wa Deueli, nga n'akulira ekika kya Gadi, n'eyaghaayo ekigheebwayo kye.

⁴³ Ekigheebwayo kye kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo. Ekyo nga n'ekigheebwayo eky'emere ey'empeke.

⁴⁴ Era ekigheebwayo kye kyalimu ekintu ekibaamu obubbaani kirala ekyakolebwa mu zaabu, nga kizitogha guraamu kikumi na ikumi era nga kiidhwire obubbaani.

⁴⁵ Era kyalimu ni bino: Ente ento enume ndala, entaama ento enume ndala ey'omwaka omulala n'entaama enume ndala enkulu; ekyo nga n'ekigheebwayo ekyokebwa.

⁴⁶ Era kyabaamu embuzi enume ndala; ekyo nga n'ekigheebwayo olw'ebibi.

⁴⁷ Era kyabaamu ni bino: Ente endaagho ibiri, entaama enume itaanu, embuzi enume itaanu n'entaama ento enume itaanu edh'omwaka omulala omulala. Ebyo nga n'eby'ekigheebwayo olw'okutabagana. Ebyo Eliasafu mutabane wa Deueli bye yaghaayo.

⁴⁸ Ku lunaku olwomusanvu Elishama mutabane wa Ammihudi, nga n'akulira ekika kya Efuraimu, n'eyaghaayo ekigheebwayo kye.

⁴⁹ Ekigheebwayo kye kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo. Ekyo nga n'ekigheebwayo eky'emere ey'empeke.

⁵⁰ Era ekigheebwayo kye kyalimu ekintu ekibaamu obubbaani kirala ekyakolebwa mu zaabu, nga kizitogha guraamu kikumi na ikumi era nga kiidhwire obubbaani.

⁵¹ Era kyalimu ni bino: Ente ento enume ndala, entaama ento enume ndala ey'omwaka omulala n'entaama enume ndala enkulu, ekyo nga n'ekigheebwayo ekyokebwa.

⁵² Era kyabaamu embuzi enume ndala, ekyo nga n'ekigheebwayo olw'ebibi.

⁵³ Era kyabaamu ni bino: Ente endaagho ibiri, entaama enume itaanu, embuzi enume itaanu n'entaama ento enume itaanu edh'omwaka omulala omulala. Ebyo nga n'eby'ekigheebwayo olw'okutabagana. Ebyo Elishama mutabane wa Ammihudi bye yaghaayo.

⁵⁴ Ku lunaku olwomunaana Gamalieli mutabane wa Pedahazuri, nga n'akulira ekika kya Manasse n'eyaghaayo ekigheebwayo kye.

⁵⁵ Ekigheebwayo kye kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo. Ekyo nga n'ekigheebwayo eky'emere ey'empeke.

⁵⁶ Era ekigheebwayo kye kyalimu ekintu ekibaamu obubbaani kirala ekyakolebwa mu zaabu, nga kizitogha guraamu kikumi na ikumi era nga kiidhwire obubbaani.

⁵⁷ Era kyalimu ni bino: Ente ento enume ndala, entaama ento enume ndala ey'omwaka omulala n'entaama enume ndala enkulu; ekyo nga n'ekigheebwayo ekyokebwa.

⁵⁸ Era kyabaamu embuzi enume ndala; ekyo nga n'ekigheebwayo olw'ebibi.

⁵⁹ Era kyabaamu bino: Ente endaagho ibiri, entaama enume itaanu, embuzi enume itaanu n'entaama ento enume itaanu edh'omwaka omulala omulala. Ebyo nga n'eby'ekigheebwayo olw'okutabagana. Ebyo Gamalieli mutabane wa Pedahazuri bye yaghaayo.

⁶⁰ Ku lunaku olwomwenda Abidani mutabane wa Gideoni, nga n'akulira ekika kya Benjamini, n'eyaghaayo ekigheebwayo kye.

⁶¹ Ekigheebwayo kye kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo. Ekyo nga n'ekigheebwayo eky'emere ey'empeke.

⁶² Era ekigheebwayo kye kyalimu ekintu ekibaamu obubbaani kirala ekyakolebwa mu zaabu, nga kizitogha guraamu kikumi na ikumi era nga kiidhwire obubbaani.

⁶³ Era kyalimu ni bino: Ente ento enume ndala, entaama ento enume ndala ey'omwaka omulala n'entaama enume ndala enkulu; ekyo nga n'ekigheebwayo ekyokebwa.

⁶⁴ Era kyabaamu embuzi enume ndala; ekyo nga n'ekigheebwayo olw'ebibi.

⁶⁵ Era kyabaamu bino: Ente endaagho ibiri, entaama enume itaanu, embuzi enume itaanu n'entaama ento enume itaanu edh'omwaka omulala omulala. Ebyo nga n'eby'ekigheebwayo olw'okutabagana. Ebyo Abidani mutabane wa Gideoni bye yaghaayo.

⁶⁶ Ku lunaku olweikumi Ahiezeri mutabane wa Ammishaddai, nga n'akulira ekika kya Dani, n'eyaghaayo ekigheebwayo kye.

⁶⁷ Ekigheebwayo kye kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza, era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo. Ekyo nga n'ekigheebwayo eky'emere ey'empeke.

⁶⁸ Era ekigheebwayo kye kyalimu ekintu ekibaamu obubbaani kirala ekyakolebwa mu zaabu, nga kizitogha guraamu kikumi na ikumi era nga kiidhwire obubbaani.

⁶⁹ Era kyalimu ni bino: Ente ento enume ndala, entaama ento enume ndala ey'omwaka omulala n'entaama enume ndala enkulu; ekyo nga n'ekigheebwayo ekyokebwa.

⁷⁰ Era kyabaamu embuzi enume ndala; ekyo nga n'ekigheebwayo olw'ebibi.

⁷¹ Era kyabaamu ni bino: Ente endaagho ibiri, entaama enume itaanu, embuzi enume itaanu n'entaama ento enume itaanu edh'omwaka omulala omulala. Ebyo nga n'eby'ekigheebwayo olw'okutabagana. Ebyo Ahiezeri mutabane wa Ammishaddai bye yaghaayo.

⁷² Ku lunaku olweikumi n'olulala Pagieli mutabane wa Okurani, nga n'akulira ekika kya Asheri, n'eyaghaayo ekigheebwayo kye.

⁷³ Ekigheebwayo kye kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo. Ekyo nga n'ekigheebwayo eky'emere ey'empeke.

⁷⁴ Era ekigheebwayo kye kyalimu ekintu ekibaamu obubbaani kirala ekyakolebwa mu zaabu, nga kizitogha guraamu kikumi na ikumi era nga kiidhwire obubbaani.

⁷⁵ Era kyalimu ni bino: Ente ento enume ndala, entaama ento enume ndala ey'omwaka omulala n'entaama enume ndala enkulu; ekyo nga n'ekigheebwayo ekyokebwa.

⁷⁶ Era kyabaamu embuzi enume ndala; ekyo nga n'ekigheebwayo olw'ebibi.

⁷⁷ Era kyabaamu ni bino: Ente endaagho ibiri, entaama enume itaanu, embuzi enume itaanu n'entaama ento enume itaanu edh'omwaka omulala omulala. Ebyo nga n'eby'ekigheebwayo olw'okutabagana. Ebyo Pagieli mutabane wa Okurani bye yaghaayo.

⁷⁸ Ku lunaku olweikumi n'eibiri Ahira mutabane wa Enani, nga n'akulira ekika kya Nafutali, n'eyaghaayo ekigheebwayo kye.

⁷⁹ Ekigheebwayo kye kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo. Ekyo nga n'ekigheebwayo eky'emere ey'empeke.

⁸⁰ Era ekigheebwayo kye kyalimu ekintu ekibaamu obubbaani kirala ekyakolebwa mu zaabu, nga kizitogha guraamu kikumi na ikumi era nga kiidhwire obubbaani.

⁸¹ Era kyalimu ni bino: ente ento enume ndala, entaama ento enume ndala ey'omwaka omulala n'entaama enume ndala enkulu; ekyo nga n'ekigheebwayo ekyokebwa.

⁸² Era kyabaamu embuzi enume ndala; ekyo nga n'ekigheebwayo olw'ebibi.

⁸³ Era kyabaamu ni bino: Ente endaagho ibiri, entaama enume itaanu, embuzi enume itaanu n'entaama ento enume itaanu edh'omwaka omulala omulala. Ebyo nga n'eby'ekigheebwayo olw'okutabagana. Ebyo Ahira mutabane wa Enani bye yaghaayo.

⁸⁴ Ebyo byonabyona aghalala n'ebigheebwayo, abakulembeze mu Isiraeli bye baaghaayo nga bali kughaayo alutaari ebe ya Musengwa Katonda, ku lunaku lwe yafukibwaku omuzigo. Baaghaayo sowaani ikumi na ibiri edhaakolebwa mu feeza, ni bbakuli ikumi na ibiri nga dhoona dhaakolebwa mu feeza. Era baaghaayo ebintu ebibaamu obubbaani ikumi na bibiri ebyakolebwa mu zaabu.

⁸⁵ Buli sowaani yali ezitogha kilo ndala n'ekitundu, era buli bbakuli yaazitogha guraamu lunaana, kale feeza yeenayeena ye baaleeta yagheramu kilo abiri na musanvu ni guraamu lukaaga (27.6), ng'ojiira ku mbala entongole ey'eisinzizo.

⁸⁶ Mu nsambo n'endala zaabu ye baaleeta yagheramu kilo namba ni guraamu ebikumi bisatu n'abiri (1.32), kuba ebintu ebibaamu obubbaani bye baaghaayo nga buli kirala kiidhwire obubbaani, byali ikumi na bibiri, nga buli kintu kizitogha guraamu kikumi na ikumi, ng'ojiira ku mbala entongole ey'eisinzizo.

⁸⁷ Era baaghaayo ente ento enume ikumi na ibiri entaama enume enkulu ikumi na ibiri n'entaama ento enume ikumi na ibiri edh'omwaka omulala omulala. Ebyo nga n'eby'ekigheebwayo ekyokebwa n'ebigheebwayo byaku eby'emere y'empeke ebijiiraku. Era baaghaayo embuzi enume ikumi na ibiri ekyo nga n'ekigheebwayo olw'ebibi.

⁸⁸ Era baaghaayo ente endaagho abiri na ina, entaama enume enkulu nkaaga, embuzi enume nkaaga, entaama ento enume nkaaga edh'omwaka omulala omulala. Ebyo n'ebigheebwayo, abakulembeze bye baaghaayo nga bali kughaayo alutaari ebe ya Musengwa Katonda, ng'emaze okufukibwaku omuzigo.

⁸⁹ Agho Musa bweyaja mu Weema ey'Okwagaananirangamu ni Musengwa Katonda, okwogera ni Musengwa Katonda, yaawuliranga amamiro nga gava ghaigulu agh'ekisandikiza eky'Esanduuku ey'Endagaano. Gaaviira ghagati agh'ebitonde ebibiri ebiri n'amaghagha ebyetebwa kerubi, gaayogera naye.