Okubala 6 - Baibuli Ekibono kya Katonda 2014

Amateeka agafuga Abanaziri

¹ Agho Musengwa Katonda yaakoba Musa ati:

² “Koba Abaisiraeli oti omusaadha oba omukazi bw'aneeyamanga ku lulwe, ni yeeghaayo ye Musengwa Katonda afuukire irala owuwe ng'aba Munaziri,

³ aidha kwesambanga okunhwa omwenge ogw'emizabbibu n'eby'okunhwa ebindi ebitamiiza. Era taanhwenga mubisi gwonagwona ogukunhiibwa mu mizabbibu, oba okulya ku muzabbibu gwonagwona, ka gube ogukaziibwa oba ogukaali kukazibwa.

⁴ Ekiseera kyonakyona ky'anaamalanga nga yeeghaireyo okuba owa Musengwa Katonda, taalyenga ku kintu kyonakyona ekiva ku mizabbibu, ni bwe dhiba emuuma oba ebiwutu.

⁵ “Ekiseera kyonakyona ky'anaamalanga nga yeeyamye okweghaayo, taasalengaku nviiri. Aidha kubanga muntu wa Musengwa Katonda eyeeghaireyo era omutukuvu. Aidhanga kuleka enviiri dhe dhikulenga, dhirengeedhe.

⁶ Ekiseera kyonakyona ky'anaamalanga nga yeeghaireyo okuba owa Musengwa Katonda, taaseetenga gha mulambo,

⁷ kwereetera kufuuka atali mulongoofu. Omulambo ogwo, ka gube ogwa ise, oba gwa inhina, oba gwa muganda we, oba gwa mwanhina, taaguseetengaku. Aidha kusigalanga nga yeeghaireyo abe wa Katonda.

⁸ Ekiseera kyonakyona ky'anaamalanga nga yeeghaireyo okuba owa Musengwa Katonda, aidha kubanga nga mutukuvu.

⁹ “Omuntu eyeeghaayo okuba owa Musengwa Katonda bw'anaafuukanga atali mulongoofu olw'okuliiraana omuntu afiire ekikutuko, aidha kumalanga enaku musanvu nga tiimulongoofu. Ku lunaku olwomusanvu aidha kusalangaku enviiri ku mutwe gwe, yeetukuze.

¹⁰ Ku lunaku olwomunaana aidha kuleetanga amayemba abiri oba enjiibwa ibiri ye kabona, ku mulyango ogw'Eweema ey'Okwagaananirangamu ni Musengwa Katonda.

¹¹ Agho Kabona oyo aidha kughangayo enhonhi eyindi ng'ekigheebwayo olw'ebibi, n'eyindi ng'ekigheebwayo ekyokebwa, amutooleku ekibi ekyamwidhaku olw'okuliiraana omulambo. Ku lunaku lwene olwo, omuntu oyo aidha kwirangamu okutukuza omutwe gwe,

¹² era airengamu buyaaka okweghaayo okuba owa Musengwa Katonda okumala entangama y'anaamalanga nga yeeghaireyo. Agho aidha kughangayo entaama ento enume egheza omwaka omulala, ebe ekigheebwayo ng'omutango. Olwo ekiseera eky'einhuma kye yamala nga yeeghaireyo okuba owa Musengwa Katonda kinaabanga nga tikikaabalwa, kuba kyayonoonebwa.

¹³ “Lino n'eiteeka erinaafuganga Omunaziri: Ekiseera kye eky'okweghaayo okuba owa Musengwa Katonda bwe kinaawangaku, banaamuleetanga ku mulyango ogw'Eweema ey'Okwagaananirangamu ni Musengwa Katonda.

¹⁴ Aidha kughangayo ye Musengwa Katonda ensolo isatu edhiziraku kikyamu kyonakyona, dhino: entaama ento enume ey'omwaka omulala ebe ekigheebwayo ekyokebwa; n'entaama ento enduusi ebe ekigheebwayo olw'ebibi; era n'entaama enume ebe ekigheebwayo olw'okutabagana.

¹⁵ Era aidha kughangayo ekiibo eky'emigaati egitazimbulukusiibwa, n'egindi egikoleibwa mu buwunga obuseereibwa obukalamu nga gitabwirwamu omuzigo, n'emitono egisiigiibwaku omuzigo, n'ebigheebwayo ebijiiraku bino: eky'emere ey'empeke n'eky'ebyokunhwa.

¹⁶ “Agho kabona aidha kuleetanga ebintu ebyo byonabyona eri Musengwa Katonda, era aghengayo ekigheebwayo olw'ebibi n'ekigheebwayo ekyokebwa.

¹⁷ Era aidha kughangayo entaama ere enume ng'ekigheebwayo olw'okutabagana, n'ekiibo kire eky'emigaati, n'ebigheebwayo ebijiiraku eky'emere ey'empeke n'eky'ebyokunhwa.

¹⁸ Agho gha mulyango ogw'Eweema ey'Okwagaananirangamu ni Musengwa Katonda, Omunaziri gh'anaasalirangaku enviiri ku mutwe gwe ogwatukuzibwa, yaamala yaadhita mu muliro ogunaabanga nga guli kwokya ekigheebwayo olw'okutabagana.

¹⁹ “Agho kabona aidha kutoolanga omukono ogw'entaama ere enume nga gumaze okufumbibwa, era atoole mu kiibo omugaati mulala omunene ogutazimbulukusiibwa n'omugaati mulala omutono gwona ogutazimbulukusiibwa, ebyo byonabyona abite mu ngalo dh'Omunaziri ng'amaze okusalaku enviiri edhooleka okutukuzibwa kwe.

²⁰ Era kabona anaabiwuubanga mu maiso ga Musengwa Katonda ng'ekigheebwayo nga kiwuubibwa. Ebintu ebyo ghalala n'akafumito akawuubibwa n'ekisambi ekigheebwayo, biidha kwawulwangaku bibe bya kabona. Olumaliira lw'ebyo Omunaziri anaabanga wa idembe okunhwa ku mwenge ogw'emizabbibu.

²¹ “Ago n'amateeka aganaafuganga Omunaziri nga yeeyamye. Ekigheebwayo kye eri Musengwa Katonda kiidha kujiiranga ku bweyamo bweyakola ng'Omunaziri. Aye bw'anaasuubizanga okughaayo ekigheebwayo ekisinga obweyamo bwe, anaateekwanga okukituukiriza nga bweyakisuubiza.”

Enkabi Kabona dh'asabira abantu

²² Agho Musengwa Katonda yaalagira Musa

²³ okukoba Aaroni ni batabane be okukozesanga ebibono bino nga basabira Abaisiraeli enkabi:

²⁴ “Musengwa Katonda akughenga enkabi era akukuumenga;

²⁵ Musengwa Katonda abenga wa kisa y'oli era akugemerwenga ekivunika;

²⁶ Musengwa Katonda akulingengaku n'amaiso ag'ekisa era akughenga emiraala.”

²⁷ Musengwa Katonda era yaakoba ati: “Kale ni batyo bwe baidhanga okukozesa eriina lyange nga basabira Abaisiraeli enkabi, era zeena ndidha kughanga abantu abo enkabi.”