Okubala 5 - Baibuli Ekibono kya Katonda 2014

Abantu abatali balongoofu

¹ Agho Musengwa Katonda yaakoba Musa ati:

² “Lagira Abaisiraeli babingengagho mu kifo ghe baasimba weema dhaibwe, abantu boonaboona abali n'endwaire ey'ebigenge, n'abo abava amasira mu mubiri, n'oyo yeenayeena atali mulongoofu olw'okwekonta ku mulambo.

³ Mubingengagho abasaadha n'abakazi boonaboona abatali balongoofu, balobe kwonoona kifo ghe mwasimba weema dhaimwe, ghe mba n'imwe abantu bange.”

⁴ Kale Abaisiraeli baakola batyo nga Musengwa Katonda bweyabalagira, baabinga mu kifo ghe baasimba weema dhaibwe abantu abatali balongoofu boonaboona.

Okutanga olw'omusango

⁵ Era Musengwa Katonda yaakoba Musa ati:

⁶ “Koba Abaisiraeli oti omusaadha oba omukazi bw'anaakolanga ekibi kyonakyona, n'amenha obwesigwa eri Musengwa Katonda, anaabangaku omusango.

⁷ Aidha kwatulanga ekibi kye ky'akoze, aghengayo omutango omwidhuvu olw'ekibi ekyo, era ateerengaku n'ekitundu kirala kirala ku buli bitundu bitaanu eby'omutango ogwo, abighe oyo yaiziizaaku omusango.

⁸ Aye omuntu ye yaizaaku omusango bwaba nga yafa ate nga azira musika ye basobola kugha mutango ogwo, olwo gunaaghebwanga Musengwa Katonda gwaba gwa kabona, okwongereza ku ntaama enume egheebwayo olw'okutoolebwaku ebibi y'ali n'okughaayo.

⁹ Era kiisi kigheebwayo ekitukuvu eri Musengwa Katonda, Abaisiraeli kye banaaghangayo, kinaabanga kya kabona oyo ye bakigemeisa.

¹⁰ Kiisi ekigheebwayo ekinaagemesebwanga kabona kinaabanga kikye ku bubwe.”

Abasaadha abalowookeza mu bakazi baibwe okuba abenzi

¹¹ Agho Musengwa Katonda yaakoba Musa ati:

¹² “Kobera Abaisiraeli oti muka omusaadha asobola okudaaliima yaaloba kuba mwesigwa eri iba,

¹³ omusaadha owundi yaaba naye, aye iba yaaloba kukimanha olw'obutabaagho muntu amugwikiriiza oba amulumiriza, bwona era aba nga yeeyonoine.

¹⁴ Mperaano, iba oyo eibuba lisobola okumugema olw'okuba omukazi we oyo yeeyonoine, oba lyamugema olw'okumulowookezaamu obulowookeze okuba ng'ayenze, ni bw'aba nga bwenebwene tayenze.

¹⁵ Bwe kinaabanga kityo, iba anaamutwalanga ye kabona era yaatwala n'ekigheebwayo ekimwetaagibwaku nga kya kilo ndala ey'obuwunga bwa sayiri, aye taabufukengaku muzigo waire okubutaaku obubbaani, kuba ekyo n'ekigheebwayo eky'emere ey'empeke olw'eibuba, ekigheebwayo olw'okwidhusa ekibi.

¹⁶ “Kabona aidha kuleetanga omukazi oyo emberi, amwemerezenga mu maiso ga Musengwa Katonda.

¹⁷ Agho kabona aidha kufukanga amaadhi mu kibya eky'eitosi agaatukuzibwa, atoolenga ku nkungu eri ghansi mu Weema ey'Okwagaananirangamu ni Musengwa Katonda, agitenga mu maadhi ago okugafuula agakaagha.

¹⁸ Kabona aidha kusibululanga enviiri dh'omukazi oyo, ng'omukazi oyo ali mu maiso ga Musengwa Katonda, era amutenga mu ngalo ekigheebwayo kire eky'emere ey'empeke eya sayiri, ekigheebwayo olw'okwidhusa ekibi. Kabona mwene, aidha kugemereranga mu ngalo dhe ekibya kire ekirimu amaadhi gale agakaagha agaleeta ekikolimo.

¹⁹ Agho kabona aidha kulayizanga omukazi ati, ‘Bw'oba nga tobangaku na musaadha wundi mu buliri, era nga todaaliimangaku n'ofuuka atali mulongoofu, amaadhi gano agaleeta ekikolimo tigaidha kukukola kibi kyonakyona.

²⁰ Aye bw'oba nga wadaaliima ate ng'oliku balo, omusaadha owundi n'aba n'iwe mu buliri, ni weeyonoona,

²¹ Musengwa Katonda afuulenga eriina lyo mu bantu okuba ekikolimo, era aleeterenga omugulu gwo okukutukaku, ozimbezimbe.

²² Leka amaadhi gano agaleeta ekikolimo gakungire mu byenda, ozimbezimbe n'omugulu gwo gukutukeku.’ “Omukazi oyo aidha kwirangamu ati: ‘Amiina, Amiina.’

²³ “Agho kabona aidha kughandiikanga ebibono eby'ekikolimo ebyo ku kintu, amale abinaazengaku n'amaadhi gale agakaagha.

²⁴ Bw'anaamalanga okukola ekyo, aidha kukobanga omukazi oyo anhwe amaadhi ago agakaagha agaleeta ekikolimo, gamuje mu nda, gamuleetere obulumi obubitirivu.

²⁵ Kabona aidha kutoolanga mu ngalo edh'omukazi oyo ekigheebwayo kire eky'emere ey'empeke, ekigheebwayo olw'eibuba, akiwuubenga mu maiso ga Musengwa Katonda era akitenga ku alutaari.

²⁶ Era kabona aidha kuyoolanga omuganda mulala ng'ekiidhukizo ku kigheebwayo eky'emere ekyo, omuganda ogwo agwokere ku alutaari. Ng'amaze ekyo, aidha kukobanga omukazi oyo anhwe amaadhi ago.

²⁷ Bw'anaabanga nga tiyali mwesigwa eri iba era nga yeeyonoona, amaadhi ago olunaaganhwanga ni gamutuuka mu nda, gaidha kumuleeteranga obulumi obubitirivu, azimbezimbe, n'omugulu gwe gukutukeku, era mu bantu be abenga kikolimo.

²⁸ Aye bw'anaabanga nga tiyeeyonoona era nga mulongoofu, amaadhi ago tigaamukolenga kabi koonakoona, era aidha kusobolanga okuzaala abaana.

²⁹ “Eryo n'eiteeka erinaakozesebwanga nga ghaligho eibuba, ng'omukazi aliku iba adaaliimye yeeyonoona.

³⁰ Oba ng'eibuba ligemye omusaadha olw'okulowookeza mu mukazi we okuba ng'ayenze. Omusaadha oyo aidhanga kuleetanga mukazi we oyo mu maiso ga Musengwa Katonda, era kabona aidhanga kukozesa eiteeka eryo ku mukazi oyo.

³¹ Omusaadha oyo taidha kubangaku kibi kimuvunaanibwa, aye mukazi bw'anaabanga nga yayonoona, aidha kubonerezebwanga olw'ekibi kye ekyo.”