Okubala 4 - Baibuli Ekibono kya Katonda 2014

Emirimo egy'Abalevi abasimuka mu Kohathi

¹ Agho Musengwa Katonda yaakoba Musa ni Aaroni ati:

² “Mubale Abalevi ab'olulyo lwa Kohathi, nga mujiira ku nsimuko dhaibwe ni ku nda dhaibwe.

³ Mubale abasaadha ab'emyaka okuva ku makumi asatu okutuuka ku ataanu, abaikirizibwa okwingira ni bakola emirimo mu Weema ey'Okwagaananirangamu ni Musengwa Katonda.

⁴ Omulimo ogw'ab'olulyo lwa Kohathi, n'okulabiriranga ebintu ebitukuvu mu Weema eyo.”

⁵ Musengwa Katonda era yaalagira Musa ati: “Buli lwe munaabanga nga muja okusenguka mu kifo, Aaroni ni batabane be baidha kungiranga mu Weema ey'Okwagaananirangamu ni Musengwa Katonda, baghanuleyo olutimbe olukinzaagho oluli emberi w'Esanduuku ey'Endagaano, era balughembe ku sanduuku eyo.

⁶ Olwo baidha kugighembangaku ekintu ekyakolebwa mu mawu ag'embuzi, era okwo bandhuluzeeku olugoye nga lwonalwona lwa bbululu, memale bagiteeku emiti gyayo egy'okugibbeedesa.

⁷ “Baidha kwandhuluzanga olugoye lwa bbululu ku meeza eteebwaku emigaati egigheereibwayo eri Katonda. Okwo bateeku ebibya n'enkaayi, n'ebintu ebiteebwamu obubbaani, n'ebikopo n'ensugha olw'ebigheebwayo ebifukibwa. Era baidha kutanga ku meeza eyo emigaati egigheereibwayo eri Katonda egya buli lunaku.

⁸ Ebyo byonabyona baidha kubighembangaku olugoye olwa kasaayisaayi era bate ku ngulu kwalwo ekintu ekyakolebwa mu mawu ag'embuzi, memale bate ku meeza eyo emiti gyayo egy'okugibbeedesa.

⁹ “Baidha kufunangayo olugoye lwa bbululu balughembe ku kikondo eky'entaala ni ku ntaala dhaakyo, ni ku makansu dhaakyo edhisala ebisiriiza ku ntambi, ni ku sowaani dhaakyo edhiteebwaku ebisiriiza ebyo, era ni ku bidoome ebibaamu amafuta byonabyona.

¹⁰ Agho baidha kuzingiriranga ekikondo ekyo n'ebikozesebwaku byonabyona mu kintu ekyakolebwa mu mawu g'embuzi, memale babite ku katanda ak'okubibbeederaku.

¹¹ “Agho baidha kughembanga olugoye lwa bbululu ku alutaari eyakolebwa mu zaabu, era okwo baghembeku ekintu ekyakolebwa mu mawu g'embuzi, memale bagiteeku emiti gyayo egy'okugibbeedesa.

¹² Era baidha kutoolanga ebintu byonabyona ebikozesebwa mu Kifo Ekitukuvu babizingirire mu lugoye lwa bbululu, babighembeku ku ngulu ekintu ekyakolebwa mu mawu g'embuzi, memale babite ku katanda ak'okubibbeederaku.

¹³ Baidha kutoolanga ku alutaari eivu, era bayandheku olugoye lwa langi ya nakasooma.

¹⁴ Agho baidha kutanga ebintu ebikozesebwa mu mikolo ku alutaari eyo, bino: ebintu eby'okutwalirangaku amanda agaliku omuliro, ebyuma eby'amaino ng'oti wuuma, ebitiiyo n'ebibya. Ng'olwo bagighembaku ekintu ekyakolebwa mu mawu g'embuzi, era nga bagitaaku emiti gyayo egy'okugibbeedesa.

¹⁵ Agho Aaroni ni batabane bwe banaabanga nga bamaze okughemba ku bintu bire ebitukuvu ebikozesebwa mu Kifo Ekitukuvu, olwo nga saawa yeene etuuse ey'okusenguka, abantu abasimuka mu Kohathi banaidhanga baabbeeda ebintu ebyo ebitukuvu. Aye tibaikirizibwa kugema ku bintu ebyo nga ti bighembe byaku. Bwe babigemaku bafa. Ebyo n'ebintu abantu abasimuka mu Kohathi bye bali n'okubbeedanga.

¹⁶ “Era Eleazari mutabane wa Aaroni kabona, n'anaalabiriranga Weema ey'Okwagaananirangamu ni Musengwa Katonda yoonayoona n'ebirimu byonabyona, bino: amafuta ag'entaala, obubbaani obuwunha akawoowo, ebigheebwayo eby'emere ey'empeke ebya buli lunaku, n'omuzigo ogusiigibwa. Era n'anaalabiriranga Weema eyo, n'ebigirimu byonabyona, n'ebintu ebikozesebwa mu Kifo Ekitukuvu.”

¹⁷ Era Musengwa Katonda yaakoba Musa ni Aaroni ati:

¹⁸ “Mutalekanga bantu basimuka mu Kohathi kufa kuwaagho mu Balevi.

¹⁹ Aye mukolenga muti olwo balobenga kufa nga baseese okumpi n'ebintu ebitukuvu: Aaroni ni batabane be n'abanaasookanga bangira, baagabira buli muntu ky'anaakola ni ky'anaabbeeda.

²⁰ Aye abantu abasimuka mu Kohathi abo batagezanga kuja kulinga ku bintu ebitukuvu, ni bwekaba akaseera obuseera, kuba ekyo kibaviiramu kufa.”

Emirimo egy'Abalevi abasimuka mu Gereshoni

²¹ Agho Musengwa Katonda yaakoba Musa ati:

²² “Bala Abalevi ab'olulyo lwa Gereshoni, ng'ojiira ku nsimuko dhaibwe ni ku nda dhaibwe.

²³ Bala abasaadha ab'emyaka okuva ku makumi asatu okutuuka ku ataanu, abaikirizibwa okungira ni bakola emirimo mu Weema ey'Okwagaananirangamu ni Musengwa Katonda.

²⁴ Omulimo ogw'ab'olulyo lwa Gereshoni gwidhanga kuba gwa kugheereza na kubbeeda bintu.

²⁵ Abo n'abaidha okubbeedanga olugugiriro olwezunguluza oluya lw'Eweema ey'Okwagaananirangamu ni Musengwa Katonda, n'ekintu ekigighembaku eky'omunda, n'ekintu ekigighembaku eky'oku ngulu ekyakolebwa mu mawu ag'embuzi. Era babbeede n'ekintu ekikinza gha mulyango gw'Eweema eyo,

²⁶ n'olugugiriro olwezungulula oluya lwa Weema eyo, n'ekintu ekikinza gha mulyango ogwingira mu luya olwezungulula Weema eyo ni alutaari, n'emigugha gyaku, era n'ebintu byonabyona ebikozesebwa mu kutaagho ebintu ebyo.

²⁷ Aaroni ni batabane be n'abanaalagiriranga Abalevi abasimuka mu Gereshoni bye banaakolanga ni bye banaabbeedanga. Iwe oidha kubagemya obuvunaanizibwa obw'ebintu byonabyona bye banaabbeedanga.

²⁸ Egyo n'emirimo Abalevi abasimuka mu Gereshoni gye banaakolanga mu Weema ey'Okwagaananirangamu ni Musengwa Katonda. Ithamari mutabane wa Aaroni kabona n'anaabalabiriranga mu kukola emirimo egyo.”

Emirimo egy'Abalevi abasimuka mu Merari

²⁹ Agho Musengwa Katonda yaakoba Musa ati: “Bala abantu ab'olulyo lwa Merari, ng'ojiira ku nsimuko dhaibwe ni ku nda dhaibwe.

³⁰ Bala abasaadha ab'emyaka okuva ku makumi asatu okutuuka ku ataanu, abaikirizibwa okungira ni bakola emirimo mu Weema ey'Okwagaananirangamu ni Musengwa Katonda.

³¹ Omulimo gwaibwe mu Weema eyo gwidha kubanga gwa kubbeeda bino: ebikondo eby'Eweema eyo, n'embaawo edhikiikamu, n'empango, n'ebikolo ebyemereraku ebikondo,

³² n'empango edh'oluya olwezungulula Weema eyo, n'ebikolo byadho, n'enkondo edhireega, n'emigugha, n'ebintu ebikozesebwa ku bintu ebyo. Buli muntu oidha kumughanga ekintu ky'anaabanga n'okubbeeda.

³³ Egyo n'emirimo Abalevi abasimuka mu Merari gye banaakolanga mu Weema ey'Okwagaananirangamu ni Musengwa Katonda. Ithamari mutabane wa Aaroni kabona n'anaabalabiriranga mu kukola emirimo egyo.”

Okubala Abalevi

³⁴ Agho Musa ni Aaroni n'abakulembeze b'Abaisiraeli baabala Abalevi abasaadha ab'olulyo lwa Kohathi, nga bajiira ku nsimuko dhaibwe ni ku nda dhaibwe.

³⁵ Baabala Abasaadha ab'emyaka okuva ku makumi asatu okutuuka ku ataanu, abaikirizibwa okungira ni bakola emirimo mu Weema ey'Okwagaananirangamu ni Musengwa Katonda.

³⁶ Baali enkumi ibiri na lusanvu n'ataanu (2,750).

³⁷ Abo n'ab'olulyo lwa Kohathi, abaagheerezanga mu Weema ey'Okwagaananirangamu ni Musengwa, Musa ni Aaroni be baabala, nga Musengwa Katonda bweyalagira Musa.

³⁸ Abasaadha ab'olulyo lwa Gereshoni ng'ojiira ku nsimuko dhaibwe ni ku nda dhaibwe,

³⁹ abaali ab'emyaka okuva ku makumi asatu okutuuka ku ataanu, abaikirizibwa okungira ni bakola emirimo mu Weema ey'Okwagaananirangamu ni Musengwa Katonda,

⁴⁰ baali enkumi ibiri na lukaaga n'asatu (2,630).

⁴¹ Abo n'ab'olulyo lwa Gereshoni, abaagheerezanga mu Weema ey'Okwagaananirangamu ni Musengwa Katonda, Musa ni Aaroni be baabala, nga Musengwa Katonda bye yalagira Musa.

⁴² Abasaadha ab'olulyo lwa Merari, ng'ojiira ku nsimuko dhaibwe ni ku nda dhaibwe,

⁴³ abaali ab'emyaka okuva ku makumi asatu okutuuka ku ataanu, abaikirizibwa okwingira ni bakola emirimo mu Weema ey'Okwagaananirangamu ni Musengwa Katonda,

⁴⁴ baali enkumi isatu na bibiri (3,200).

⁴⁵ Abo n'ab'olulyo lwa Merari, abaagheerezanga mu Weema ey'Okwagaananirangamu ni Musengwa Katonda, Musa ni Aaroni be baabala, nga Musengwa Katonda bweyalagira Musa.

⁴⁶ Abo n'Abalevi boonaboona, Musa ni Aaroni n'abakulembeze b'Abaisiraeli be baabala, nga bajiira ku nsimuko dhaibwe ni ku nda dhaibwe.

⁴⁷ Baabala abasaadha ab'emyaka okuva ku makumi asatu okutuuka ku ataanu, abaikirizibwa okungira okukola emirimo n'okubbeeda ebintu mu Weema ey'Okwagaananirangamu ni Musengwa Katonda.

⁴⁸ Baali kanaana na bitaanu na kinaana (8,580).

⁴⁹ Abo n'abaabalibwa, era buli muntu yaagheebwa omulimo oba ebintu eby'okubbeeda, nga Musengwa Katonda bweyalagira Musa.