Okubala 36 - Baibuli Ekibono kya Katonda 2014

Omugabo ogw'ensikirano ogw'abakazi abaabayira

¹ Agho abakulu ab'enda edhisimuka mu kika kya Gileadi mutabane wa Makiri era mwidhukulu wa Manasse, nga Manasse oyo yali mutabane wa Yosefu, baaja ye Musa ni y'abakulembeze abandi mu Isiraeli.

² Baakoba bati: “Baisebo, Musengwa Katonda yakulagira okugha Abaisiraeli obutaka bwaibwe obw'ensikirano ng'okozesa obululu. Era Musengwa Katonda yaakulagira otoole obutaka obw'ensikirano obwa muganda waife Zelofehadi, obughe baghala be.

³ Aye abaghala abo bwe balibayira mu bika ebindi ebya Isiraeli, olwo obutaka bwaibwe obwo buja kuva ku nsikirano ya badhaadha baife, buje bwongerwe ku butaka obw'ebika ebyo bye baliba nga babayiiremu.

⁴ Era omwaka omutukuvu ogw'Abaisiraeli ni bwe gulituuka ghazira kija kukyukamu. Obutaka bwaibwe buja kuva ku nsikirano ya badhaadha baife, bwongerwe ku butaka obw'ebika ebyo bye baliba nga babayiiremu.”

⁵ Agho Musa yaagha Abaisiraeli ekiragiro kino ekyava ye Musengwa Katonda, ati: “Ab'ekika kya mutabane wa Yosefu, kye bali kukoba kituufu.

⁶ Kale ni kino Musengwa Katonda ky'alagiire ku baghala ba Zelofehadi abo, ati, ‘Bali n'eidembe okubayira omuntu yeenayeena ye baba nga basiimye. Aye omuntu oyo ateekwa kuba nga wa ku nda edhiri mu kika kya Zelofehadi, ise w'abaghala abo.’

⁷ Obutaka obw'ensikirano obw'Abaisiraeli tibwidha kukyusibwanga kuva mu kika kino kwira mu kindi. Buli Muisiraeli aidha kukuumanga obutaka obw'ensikirano obw'ekika kya badhaadha be.

⁸ Era buli mughala yeenayeena anaafunanga obutaka obw'ensikirano mu kika kyonakyona eky'Abaisiraeli, aidha kubayiranga muntu wa ku nda edhiri mu kika kya ise. Olwo buli Muisiraeli asobolenga okuba n'obutaka obw'ensikirano obwa badhaadha be.

⁹ Agho ni, ezira butaka bwa nsikirano bunaakyusibwanga kuva mu kika kire kwira mu kindi. Buli kika eky'Abaisiraeli kiidha kukuumanga obutaka bwakyo obw'ensikirano.”

¹⁰ Kale baghala ba Zelofehadi baakola nga Musengwa Katonda bweyalagira Musa.

¹¹ Mahala, Tiruza, Hogula, Milika, ni Noa, abo nga ni baghala ba Zelofehadi, baabayira batabane ba baganda baiseibwe.

¹² Baabayira ku nda dha batabane ba Manasse, mutabane wa Yosefu. Era obutaka bwaibwe obw'ensikirano bwasigala mu kika eky'enda ya iseibwe.

¹³ Ago n'amateeka n'ebiragiro Musengwa Katonda bye yalagira Musa okukobera Abaisiraeli nga bali e Yeriko okumpi n'omwiga Yorudani mu kiketezo ky'e Moabu eky'oku museetwe.