Okubala 34 - Baibuli Ekibono kya Katonda 2014

Ensalosalo edh'ensi Musengwa Katonda ye yagha Abaisiraeli

¹ Agho Musengwa Katonda yaalagira Musa

² akobe Abaisiraeli ati: “Bwemulingira mu nsi Kanaani, ensi ye ndi kubagha ebe obutaka bwaimwe, ensalosalo dhaayo dhija kuba dhiti:

³ Ensalosalo ey'oku luuyi olw'omukono omusaadha olw'e buvandhuba, eidha kuvanga ku irungu ery'e Zini, ebitirenga ku nsalosalo ey'e Edomu. Ensalosalo ey'e bugwandhuba eidha kuvanga Enhandha Eyomuunhu gh'ekoma mu buvandhuba.

⁴ Agho eidha kukyukanga esimbire ku luuyi olw'omukono omusaadha olw'e buvandhuba, eniineniine Akirabbimu era ebite kumpi ni Zini. Era ku luuyi olwo eidha kukomanga ku Kadeshi Barinea. Olwo eidha kukyukanga esimbire ghagati gh'e bugwandhuba n'oluuyi olw'omukono omugooda olw'e buvandhuba, etuuke mu Hazari Addari, era yeeyongereyo mu Azimoni.

⁵ Ensalosalo eyo eidha kukyukanga okuva mu Azimoni, esimbire ku kaiga ak'e Misiri, era ekomenga ku Nhandha Eyaghagati.

⁶ “Ku luuyi olw'e bugwandhuba, ensalo eidha kubanga Enhandha Eyaghagati.

⁷ “Ku luuyi olw'omukono omugooda olw'e buvandhuba, ensalo eidha kuvanga ku Nhandha Eyaghagati etuuke ku lusozi Hori.

⁸ Bw'enaavanga ku lusozi Hori eidha kujanga etuuke aghaingirirwa e Hamathi okukoma e Zedadi,

⁹ era yeeyongereyo etuuke e Zifuroni, memale ekome e Hazari Enani. Eyo n'eidha okubanga ensalosalo ey'oku luuyi olw'omukono omugooda olw'e buvandhuba.

¹⁰ “Ku luuyi olw'e buvandhuba, ensalosalo eidha kuvanga e Hazari Enani etuuke e Shefamu.

¹¹ Ensalosalo eyo eidha kuvanga e Shefamu, eikirire e Ribula ku luuyi olw'e buvandhuba olwa Aini. Era eidha kweyongeranga okwikirira etuuke ku luuyi olw'e buvandhuba olw'enhandha Kinnerethi.

¹² Ensalosalo eyo eidha kweyongeranga okwikirira, etuuke ku mwiga Yorudani, era ekomenga ku Nhandha Eyomuunhu. “Eyo n'eidha okubanga ensi yaimwe, era edho n'ensalosalo dhaayo okugyezunguluza.”

¹³ Agho Musa yaakoba Abaisiraeli ati: “Eyo n'ensi ye mwidha okugabana nga mukuba obululu, Musengwa Katonda y'alagiire okugha ebika omwenda n'ekitundu;

¹⁴ kuba ab'ekika kya Reubeni, n'ab'ekika kya Gadi, n'ekitundu eky'ekika kya Manasse, baamala ira okugheebwa obutaka obwaibwe, nga bujiira ku nda dha baiseibwe.

¹⁵ Ebika ebyo ebibiri n'ekitundu, byamala ira okugheebwa obutaka bwabyo ere ng'osomoike Yorudani, ku luuyi olw'e buvandhuba ng'olingiriire Yeriko.”

Abakulembeze abaagheebwa ogw'okugabaniamu Abaisiraeli ensi Kanaani

¹⁶ Agho Musengwa Katonda yaakoba Musa ati:

¹⁷ “Gano n'amaina ag'abantu abaidha okubagabaniamu ensi eja okuba obutaka bwaimwe: Eleazari kabona, ni Yoshua mutabane wa Nuni.

¹⁸ Ku abo oidha kwongerezaaku omukulembeze mulala okuva mu buli kika, abo bayambeku mu kugabaniamu ensi yo.

¹⁹ Era gano n'amaina gaibwe: Kalebu mutabane wa Yefunne, okuva mu kika kya Yuda;

²⁰ Shemueli mutabane wa Ammihudi, okuva mu kika kya Simeoni;

²¹ Elidadi mutabane wa Kisiloni, okuva mu kika kya Benjamini;

²² Bukki mutabane wa Yoguli, okuva mu kika kya Dani;

²³ Hannieli mutabane wa Efodi, okuva mu b'olulyo lwa Yosefu, mu kika kya Manasse;

²⁴ Kemueli mutabane wa Shifutani, okuva mu kika kya Efuraimu;

²⁵ Elizafani mutabane wa Parunaki, okuva mu kika kya Zebuluni;

²⁶ Palutieli mutabane wa Azzani, okuva mu kika kya Issakari;

²⁷ Ahihudi mutabane wa Shelomi, okuva mu kika kya Asheri;

²⁸ Padaheli mutabane wa Ammihudi, okuva mu kika kya Nafutali.”

²⁹ Abo n'abantu Musengwa Katonda be yalagira okugabania Abaisiraeli obutaka mu nsi Kanaani.