Okubala 33 - Baibuli Ekibono kya Katonda 2014

Olugendo okuva e Misiri okutuuka e Moabu

¹ Bino n'ebifo Abaisiraeli bye baajanga nga basimbamu weema dhaibwe, bwe baava e Misiri nga bali bikunsu bikunsu, nga Musa ni Aaroni babakulembeire.

² Musa yajanga ng'aghandiika buli kifo kye baavangamu okweyongerayo mu lugendo lwaibwe, nga Musengwa Katonda bweyamulagira. Era bino n'ebifo nga bwe byairaganwangaku.

³ Abaisiraeli baasitula okuva e Ramesesi mu Misiri, ku lunaku olweikumi n'eitaanu olw'omwezi ogusooka mu mwaka ogwo. Olwo n'olunaku olwairirira Ekibinuko eky'Okwidhukiriraku Okubitizibwa. Era Abaisiraeli baajiira mu kitiibwa ng'Abamisiri boonaboona babona.

⁴ Baalekanga ng'Abamisiri bali kuziika abaana baibwe ababeri, Musengwa Katonda be yaita n'ayoleka nga bw'ali n'obuyinza okusinga emisambwa gyaibwe.

⁵ Kale Abaisiraeli baasitula okuva e Ramesesi, baaja baatuuka e Sukkothi, baasimba agho weema dhaibwe.

⁶ Baava e Sukkothi, baaja baasimba weema dhaibwe mu Ethamu ekiri ku mbali okw'eirungu.

⁷ Baava e Ethamu baakyuka baira einhuma, baabita e Pihahirothi ekiri e buvandhuba wa Baali Zefoni, baasimba weema dhaibwe kumpi ni Migidoli.

⁸ Baava agho okumpi n'e Hahirothi, baabita ghagati mu Nhandha Emyufu baatuuka ku irungu ery'e Ethamu. Mu irungu eryo baatambulamu olugendo lwa nnaku isatu, olwo baatuuka e Mara baasimba agho weema dhaibwe.

⁹ Baava e Mara, baaja mu Elimu aghaali ensulo eikumi n'eibiri n'emiti eminaazi ensanvu, baasimba agho weema dhaibwe.

¹⁰ Baasitula okuva mu Elimu, baaja baasimba weema dhaibwe kumpi n'Enhandha Emyufu.

¹¹ Baava agho okumpi n'Enhandha Emyufu, baaja baasimba weema dhaibwe mu irungu ery'e Sini.

¹² Baava agho mu irungu ery'e Sini, baaja baasimba weema dhaibwe e Dofuka.

¹³ Baava e Dofuka, baaja baasimba weema dhaibwe mu Alushi.

¹⁴ Baava mu Alushi, baaja baasimba weema dhaibwe e Refidimu etaali maadhi bantu ge baghanga kunhwa.

¹⁵ Baasitula okuva e Refidimu, baaja baasimba weema dhaibwe mu irungu ery'e Sinai.

¹⁶ Baava mu irungu ery'e Sinai, baasimba weema dhaibwe e Kiburothi Hattaava.

¹⁷ Baava e Kiburothi Hattaava, baaja baasimba weema dhaibwe e Hazerothi.

¹⁸ Baava e Hazerothi, baaja basimba weema dhaibwe e Rithima.

¹⁹ Baava e Rithima, baaja baasimba weema dhaibwe e Rimmoni Perezi.

²⁰ Baava e Rimmoni Perezi, baaja basimba weema dhaibwe e Libuna.

²¹ Baava e Libuna, baaja baasimba weema dhaibwe e Rissa.

²² Baava e Rissa, baaja baasimba weema dhaibwe e Kehelatha.

²³ Baava e Kehelatha, baaja baasimba weema dhaibwe ku lusozi Sheferi.

²⁴ Baava ku lusozi Sheferi, baaja baasimba weema dhaibwe e Harada.

²⁵ Baava e Harada, baaja baasimba weema dhaibwe e Makehelothi.

²⁶ Baava e Makehelothi, baaja baasimba weema dhaibwe e Tahathi.

²⁷ Baava e Tahathi, baaja baasimba weema dhaibwe e Tera.

²⁸ Baava e Tera, baaja baasimba weema dhaibwe e Mithuka.

²⁹ Baava e Mithuka, baaja baasimba weema dhaibwe e Hashimona.

³⁰ Baava e Hashimona, baaja baasimba weema dhaibwe e Moserothi.

³¹ Baava e Moserothi, baaja baasimba weema dhaibwe e Bene Yaakani.

³² Baava e Bene Yaakani, baaja baasimba weema dhaibwe e Hori Haggidigadi.

³³ Baava e Hori Haggidigadi, baaja baasimba weema dhaibwe e Yotubatha.

³⁴ Baava e Yotubatha, baaja baasimba weema dhaibwe mu Aburona.

³⁵ Baava mu Aburona, baaja baasimba weema dhaibwe mu Ezioni Geberi.

³⁶ Baava mu Ezioni Geberi, baaja baasimba weema dhaibwe mu irungu ery'e Zini, ekyo nga ni Kadeshi.

³⁷ Baava e Kadeshi, baaja baasimba weema dhaibwe ku lusozi Hori, ku mbali okw'ekiketezo eky'Abaedomu.

³⁸ Agho Aaroni kabona yaaniina ku lusozi Hori, era yaafiira okwo nga Musengwa Katonda bweyalagira. Ebyo byaligho ku lunaku olusooka olw'omwezi ogwokutaanu, mu mwaka ogwamakumi ana (40), kasookanga Baisiraeli bava mu Misiri.

³⁹ Aaroni oyo yaja okufiira ku lusozi Hori, ng'agheziiza emyaka kikumi n'abiri n'esatu (123) egy'obukulu.

⁴⁰ Agho ghaabaagho kyabazinga Omukanaani ow'e Aradi mu kiketezo ekikalukalu ku luuyi olw'omukono omusaadha olw'e buvandhuba, yaawulira ati Abaisiraeli bali kwidha.

⁴¹ Agho Abaisiraeli baasitula okuva ku lusozi Hori, baaja baasimba weema dhaibwe e Zalumona.

⁴² Baava e Zalumona, baaja baasimba weema dhaibwe e Punoni.

⁴³ Baava e Punoni, baaja baasimba weema dhaibwe mu Obothi.

⁴⁴ Baava mu Obothi, baaja baasimba weema dhaibwe mu kifo ekyetebwa Iye Abarimu, mu biketezo bya Moabu.

⁴⁵ Baava mu kifo ekyetebwa Iyimu, baaja baasimba weema dhaibwe e Diboni Gadi.

⁴⁶ Baava e Diboni Gadi, baaja baasimba weema dhaibwe mu Alumoni Dibulathaimu.

⁴⁷ Baava mu Alumoni Dibulathaimu, baaja baasimba weema dhaibwe mu nsozi edh'e Abarimu, ng'olingiriire Nebo.

⁴⁸ Baava mu nsozi edh'e Abarimu, baaja baasimba weema dhaibwe e Yeriko mu biketezo by'e Moabu eby'oku museetwe, okuliiraana Yorudani.

⁴⁹ Baasimba weema dhaibwe okumpi n'omwiga Yorudani, okuva e Bethi Yeshimothi okutuukira irala mu Abeli Shittimu, mu biketezo by'e Moabu eby'oku museetwe.

Musengwa Katonda agalagira Abaisiraeli nga bakaali kusomoka Yorudani

⁵⁰ Bwe baali eyo e Yeriko, mu biketezo by'e Moabu eby'oku museetwe okuliiraana omwiga Yorudani, Musengwa Katonda yaakoba Musa

⁵¹ ati: “Koba Abaisiraeli oti, bwemunaamala okusomoka Yorudani ni mungira mu Kanaani,

⁵² mwidha kubingangamu abatyamye baamu boonaboona be munaayagaanangamu, muzikirizenga ebifaananie byaibwe byonabyona ebibaadhe mu mabaale, n'ebyo ebyakolebwa mu kyuma ekisaanuusiibwa, era musaaniengagho ebifo byaibwe ebigulumivu eby'okusinzizaamu.

⁵³ Mwidha kutwala ensi eyo mugibeemu, kuba ngibaghaire ebe yaimwe.

⁵⁴ Mwidha kugigabana mu bika byaimwe ni mu nda dhaimwe nga mukozesa obululu. Ekika ekinene mwidha kukigha ghanene, ate ekika ekitono mukighe ghatono. Omuntu akalulu ghe kanaamugha n'aghanaaba aghaghe, ng'agabanira mu kika kya ise.

⁵⁵ Aye bwe mutalisooka kubingamu batyamye be munaayagaanangamu, olwo abo be mulireka okusigalamu baja kubafuukira ng'oti n'ekintu ekikusonka mu liiso era ng'oti n'amawa agakufumita mu mbavu. Baja kubaleetera ebizibu kamaala mu nsi eyo ye mulibaamu.

⁵⁶ Bwe mutalibabingamu, olwo kye nalowooza okukola beene ndikikola imwe.”