Okubala 31 - Baibuli Ekibono kya Katonda 2014

Olutalo ku Bamidia

¹ Agho Musengwa Katonda yaakoba Musa ati:

² “Mubonereze Abamidia nga mwesasuuza olw'ebyo bye baakola Abaisiraeli. Bw'onaamala okukola ekyo oidha kutwalibwa weeyimbe ku bantu bo abaafa.”

³ Kale Musa yaakoba abantu ati: “Mu imwe mwerondemu abantu mubaghe eby'okulwanisa, baje balumbe Abamidia bababonereze nga beesasuuza nga Musengwa Katonda bw'alagiire.

⁴ Mulonde abantu lukumi (1,000) okuva mu buli kika ky'Abaisiraeli, baje balwane.”

⁵ Agho baalonda abantu lukumi lukumi okuva mu buli kika, nga bava mu nkumi n'enkumi edh'Abaisiraeli. Abantu abo baaghera omutwalo mulala n'enkumi ibiri (12,000), nga bagemye eby'okulwanisa era nga beetegeike okulwana mu lutalo.

⁶ Musa yaabasindika okulwana nga baduumirwa Finehasi mutabane wa Eleazari kabona, eyali n'ebintu ebikozesebwa mu Kifo Ekitukuvu, ghalala n'amagwala agafuuyibwa ng'akamanhiso ak'ebiragiro.

⁷ Baalumba Abamidia nga Musengwa Katonda bweyabalagira ng'abita mu Musa. Baita buli musaadha.

⁸ Baita bakyabazinga abataanu ab'Abamidia, bano: Evi, Rekema, Zuri, Huri ni Reba. Era mu lutalo olwo mwe baitira ni Balaamu mutabane wa Beori.

⁹ Abaisiraeli baanhaga abakazi n'abaana abato ab'Abamidia, baabatwala nga basibe ghalala n'ente dhaibwe dhoonadhoona, n'entaama n'embuzi n'ebintu byaibwe ebindi byonabyona.

¹⁰ Baayokya ebibuga eby'Abamidia ni weema dhaibwe.

¹¹ Baatoola ebintu byonabyona bye baanhaga, omwali abantu n'ensolo,

¹² baabitwalira Musa ni Eleazari kabona, n'Abaisiraeli boonaboona abaali beesoloiza mu kifo ghe baasimba weema dhaibwe, e Yeriko mu kiketezo eky'oku museetwe ogw'e Moabu, okuliiraana n'omwiga Yorudani.

Eigye ery'Abaisiraeli liira

¹³ Agho Musa, ni Eleazari kabona, n'abakulembeze ab'Abaisiraeli, baava mu kifo ghe baasimba weema dhaibwe, baaja okweisuusaayo eigye lya Isiraeli.

¹⁴ Musa yaasungughalira abakulu mu igye eryo abaira okuva mu lutalo. Abo n'abaaduumira enkumi n'enkumi era baaduumira ebikumi n'ebikumi eby'abalwani.

¹⁵ Yaababuuza ati: “Lwaki mulese abakazi bano boonaboona nga bakaali balamu?

¹⁶ Mwidhukire nga baali bakazi abo, mu bizibu ebyali e Peori, nga bajiira ku magezi ga Balaamu, baaleetera Abaisiraeli okughemukira Musengwa Katonda baalekera okuba abeesigwa y'ali. Ekyavaamu n'ekibamba okwidha mu bantu ba Musengwa Katonda abo.

¹⁷ Kale mperaano mwite buli mwana mulenzi, era na buli mukazi eyaali abaireku n'omusaadha mu buliri.

¹⁸ Aye abaghala abato abakaali kubaaku na basaadha mu buliri, mubaleke nga balamu, mubasigaze nga baimwe.

¹⁹ Era buli muntu ku imwe eyaita omuntu, n'oyo eyagema ku mufu, asigale eyo kuliya okw'ekifo ghe twasimba weema dhaife, okumala enaku musanvu. Ku lunaku olwokusatu ni ku lwomusanvu mwidha kwetukuza, imwe aghalala n'abantu be mwanhaga.

²⁰ Era mwidha kutukuza buli kivaalo, na buli kintu kya luwu, n'ebintu byonabyona ebyakolebwa mu buviiri obw'embuzi, era n'ebyo byonabyona ebyakolebwa mu muti.”

²¹ Eleazari kabona yaakoba abantu abaali baakava mu lutalo okulwana, ati: “Lino n'eiteeka Musengwa Katonda lye yalagira Musa:

²² Zaabu, feeza, ekyuma eky'ekikomo, ekyuma ekigumu einho, eibaati, ekyuma ekizitogha einho,

²³ na buli kintu ekigumira omuliro, mwidha kukibisa mu muliro olw'okukitukuza. Aye era mwidha kukitukuza n'amaadhi ag'okutukuza. Ate buli kintu ekitaghanga kugumira muliro, mwidha kukibisa mu maadhi ago ag'okutukuza gonka.

²⁴ Muteekwa okwoza ebivaalo byaimwe ku lunaku olwomusanvu, olwo mube abalongoofu. Memale mughange okwidha mu kifo ghe twasimba weema dhaife.”

Abaisiraeli bagabana bye baanhaga mu lutalo

²⁵ Agho Musengwa Katonda yaakoba Musa ati:

²⁶ “Iwe ni Eleazari kabona, n'abakulu ab'ebikunsu mu Isiraeli, mubale ebintu byonabyona ebyanhagibwa mu lutalo, abantu n'ensolo.

²⁷ Memale mubigabaniemu ghabiri, ebindi bibe bya balwani beene abaaja mu lutalo, ate ebindi bibe bya bantu abandi boonaboona.

²⁸ Ku mugabo ogw'abalwani beene abaaja mu lutalo, oidha kutoolaku empooza ya Musengwa Katonda nga ya muntu mulala mulala ku buli bantu abanhage ebikumi ebitaanu. Era oidha kukola otyo ku nte, ku ndogoyi, ku ntaama ni ku mbuzi.

²⁹ Empooza eyo oidha kugitoola ku mugabo gwaibwe, ogighe Eleazari kabona, ebe ekigheebwayo eri Musengwa Katonda.

³⁰ Ku mugabo ogw'Abaisiraeli abandi abasigairegho oidha kutoolaku omuntu mulala mulala ku buli bantu ataanu abanhage, era oidha kukola otyo ku nte, ku ndogoyi, ku ntaama, ku mbuzi, era ni ku nsolo edhindi dhoonadhoona, obighe Abalevi abalabirira Weema ya Musengwa Katonda.”

³¹ Musa ni Eleazari kabona n'abakulu baakola nga Musengwa Katonda bweyalagira Musa.

³² Ku bintu eigye ery'Abaisiraeli bye lyanhaga ku Bamidia ebyasigalagho byali biti: Entaama emitwalo nkaaga na musanvu n'enkumi itaanu (675,000),

³³ ente emitwalo musanvu n'enkumi ibiri (72,000),

³⁴ endogoyi emitwalo mukaaga na lukumi (61,000),

³⁵ n'abantu emitwalo esatu n'enkumi ibiri (32,000); ng'abo n'abaghala abaali nga tibabangaku na basaadha mu buliri.

³⁶ Kale mu kugabaniamu aghabiri, abalwani abaaja mu lutalo beene, baafuna entaama emitwalo asatu n'esatu na kasanvu na bitaanu (337,500).

³⁷ Okwo baatoolaku entaama lukaaga na nsanvu na itaanu (675), ng'empooza ye baagha Musengwa Katonda.

³⁸ Ente dhaali emitwalo esatu na kakaaga (36,000), kwe baatoola ente ensanvu n'eibiri ng'empooza ya Musengwa Katonda.

³⁹ Endogoyi dhaali emitwalo esatu na bitaanu (30,500), kwe baatoola endogoyi enkaaga n'endala ng'empooza ya Musengwa Katonda.

⁴⁰ Abantu baali omutwalo mulala na kakaaga (16,000), kwe baatoola abantu asatu n'ababiri ng'empooza ya Musengwa Katonda.

⁴¹ Musa yaatoola empooza eyo eyali ng'ekigheebwayo eri Musengwa Katonda, yaagigha Eleazari kabona, nga Musengwa Katonda bweyalagira Musa oyo.

⁴² Nga Musa amaze okwawulaku ebintu eby'abalwani abaaja mu lutalo beene, Abaisiraeli abaasigalagho bye baafuna byali biti:

⁴³ Entaama emitwalo amakumi asatu n'esatu na kasanvu na bitaanu (337,500),

⁴⁴ ente emitwalo esatu na kakaaga (36,000),

⁴⁵ endogoyi emitwalo esatu na bitaanu (30,500),

⁴⁶ n'abantu omutwalo mulala na kakaaga (16,000).

⁴⁷ Ku mugabo ogwo Abaisiraeli abaasigalagho gwe baafuna, Musa yatoolaku omuntu mulala mulala ku buli bantu amakumi ataanu, era yaatoola n'ensolo ndala ndala ku buli nsolo amakumi ataanu, yaabigha Abalevi abalabirira Eweema ya Musengwa Katonda. Musa ekyo yakikola nga Musengwa Katonda oyo bweyamulagira.

⁴⁸ Agho abakulu mu igye abaaduumira enkumi n'enkumi edh'abalwani n'ebikumi n'ebikumi eby'abalwani, baidha ye Musa,

⁴⁹ baamukoba bati: “Isebo, ife abagheereza bo tubaze abalwani boonaboona be twaduumira nga baligho boonaboona.

⁵⁰ Era tuleese ekigheebwayo eri Musengwa Katonda nga buli muntu bweyafuna. Tuleese ebintu bya zaabu eby'okwewoomya, ebikomo, empeta edh'oku ngalo n'edh'oku matu n'ebinhere, nga tusaba Musengwa Katonda atutooleku ebibi byaife.”

⁵¹ Musa ni Eleazari kabona, baabatoolaku ebintu ebyo byonabyona eby'okwewoomya bye baaleeta, ebyakolebwa mu zaabu.

⁵² Zaabu yeenayeena abakulu mu igye abo abaaduumira enkumi n'enkumi edh'abalwani n'ebikumi n'ebikumi eby'abalwani, ye baaghaayo ng'ekigheebwayo eri Musengwa Katonda, yagheramu kumpi kilo ebikumi bibiri.

⁵³ Aye abalwani beene abaaja mu lutalo, bale abandi abataali baduumizi, buli muntu yasigaza bye yanhaga ku Bamidia.

⁵⁴ Musa ni Eleazari kabona, baatwala zaabu oyo ye baatoola ku baduumizi abo ab'abaisirukale enkumi n'enkumi n'ebikumi n'ebikumi, baamuta mu Weema ey'Okwagaananirangamu ni Musengwa Katonda, abenga ekiidhukizo eky'Abaisiraeli mu maiso ga Musengwa Katonda.